المتصل : آلو الكـاتب.. نحن نعرف خبرتك في حل هكذا مشاكل ونحن في حاجة لمساعدتك..
الكاتب : شوف خطينا دابا من هاد الهضرة واش كاتضحك عليا .. هضر بالداريجة ولا غانقطع..
المتصل : لم أفهم كثيرا من كلامك.. فلهجتكم المغربية صعبة يا أخي.. أنا لا أمزح .. نحن فعلا في حاجة ماسة لمساعدتك..
الكـاتب : أوكي أوكي صافي قطع راه غايديشارجالي الطيليفون والناس فباج صوت الصمت كايتسناوني يالاه تلاح .. غدا الصباح نكون تما..
قطع الإتصال وفالصباح مشيت خديت بيكالتي العجيبة راكم كاتعرفوها .. بعدما صلحتها مزياان .. وقررت ماندوزش من شمال إفريقيا .. وندوز لتركيا من طريق اليونان .. المهم ضربت فالبيدال الضربة الأولى جبتها فإيطاليا مرورا فوق سطح البحر .. والضربة الثانية جبتها فاليونان شربت كاس أتاي مع ولد خالة أرسطو .. وأنا ندخل لتركيا.. لقيت الإمبراطورية حالتها حالة آآصاحبي .. قلالو عندهم الموارد المالية .. وتجمعو عليهم الكريديات .. وتا الجيش ديالهم ولا ضعيف .. إييه يا الأيام كيف كنتو وكي وليتو.. وخسارة أنا ماعيطولي تا فات الفوت والإمبراطورية غاطيح غاطيح .. ومن بين العوالمل هادو لي ذكرتلكم .. بالإضافة أن بزااف د الدول بغاو يستاغلو هاد الوضع باش يطيحوها بمرة.. هنا التمركز الإمبريالي على شي وسائل... جا عندي داك خينا وكالي : أخي الكـاتب.. ساعدت العديد من الأشخاص والعديد من الدول لحل مشاكلهم .. أراك الآن لا تحرك ساكنا..
الكـاتب : واش أنتوما مرااض آآصاحبي .. تا فات الفوت عاد معيطينلي .. راه هادشي خارج منكم كـاينين الغدارة فوسط منكم..
هو : أووووف..
الكـاتب : شوف بلا ماتسوط .. أصلا أنتوما ماقديتوش تدخلو عندنا .. وصلتو الجزائر وحبستو .. وإلى جينا نشوفو راه ماشغليش غيلا بغيت ندير الخير..
هو : أنا لا تهمني إمبراطورية .. أقل الإيمان نريد أن تبقى دولة تركيا لنا..
الكـاتب : هااا لي كلنا .. أنتوما كل كايصرب على مصلحتو .. داكشي باش دايرين فيكم مابغاو..
..
مشا بحالو ومشيت شريت تعبئة شارجيت الكونيكسيون .. شويا وهو يتكونيكطا الشريف حسين .. كالي شوف الكـاتب .. بعد من هاد الصداع أوكي.. ماشي شغلك ياك أنتوما فالمغرب ماوصلكم حد .. إوا تكمش
الكـاتب : آآهيا هصر مزيان ولا نركب بيكالتي ونجي ندير فيك شي جريمة..
الشريف حسين : المهم أنت خليك بعيد..
الكـاتب : آآودي لي عطا الله عطاه دابا .. بحالكم لي خلاو هاد الأمة اللور اللور..
المهم بريطانيا بدات كاتحرض العرب باش يديرو ثورة "الثورة العربية" .. وإستاغلات جوج ريوس لي هما ماكماهون فمصر .. والشريف حسين.. ومن بعد خرجات ديك المعاهدة د سايكسبيكو .. لي كاتكول باش فرنسا وبريطانيا يقسمو الغلة هههه .. غادي يقسمو الشرق الأوسط .. وهاد سايكسبيكو هي كلمة مركبة من جوج أسماء سايكس هو وزير خارجية بريطانيا .. وبيكو هو وزير خارجية فرنسا .. هنا هاد التمركز الإمبريالي بدا كايضعف الإمبراطورية العثمانية باش طيح فأسرع وقت.. إوا هاد الإمبرياليين لقااو نيت مابغاو حيت لقاو مساعدات غير مباشرة .. حيت فوسط تركيا نايضة الروينة .. جا عندي داك خينا عاود الثاني باغي تركيا تبقى ليهم..
الكـاتب : شوف غادي نعطيك واحد الحل .. غادي ديرو جمعية ولا حزب.. سميوها جمعية الإتحاد والترقي ولا حزب تركيا الفتاة .. وسيرو ديرو إنقلاب على السلطان عبد الحميد ..
هو : ربي يحفظك آآخويا الكـاتب..
الكـاتب : آآشمن يحفظني .. راه عطيتك خطة شيطانية باش طيح راجل من الرجال لي عرفاتهم الوقت .. الله يسمحلي وصافي..
إوا داكشي لي دارو .. وطيحو السلطان عبد الحميد .. وناضت حملة التتريك .. تا حاجة عربية ماتبقا.. إوا ف 1919 خونا وصل المبتغى ديالو وحكم تركيا .. هاد خينا آآخوتي هو "مصطفى كمال" ينعل جد بوه ماكنتش عارف راه هو .. تمسكن تا تمكن.. ف 1920 .. خرجات واحد المعاهدة سميتها سيفر .. حتمات على تركيا توقيعها بعدما إنهزمت فالحرب العالمية الأولى وفقدات النفود ديالها فجميع الأراضي وبقاتلها غير منطقة الأناضول .. إوا من بعد سيهم مصطفى كمال .. ماعجبوش الحال وناهض هادشي وأسس دولة تركيا ف 1923 .. أنا ماعجبنيش الحال .. حيت ماكنتش عارف هاد الروينة نايضة من الأول .. وكان كايحسابني بلي ناس السلطان عبد الحميد هما لي عيطولي ساعة ماشي هما للأسف .. وبهاكا طاحت الإمبراطورية .. وأنا ركبت بيكالتي ورجعت.. :(
وفتحت الباج باش نعاودلكم هادشي تستافدو .. ولكن زاد بقا فيا الحال حيت أنتوما مامسوقينش وماكاتعجبكومش الإستفادة وكايعجبوكم غير التفاهات :)
..
..
النهـــاية..
.
.
.
.
الكــاتب
ليست هناك تعليقات :
إرسال تعليق