قصة أيوب

الجزء الأول..
.
.
.
.
.
.

.
.
أيوب ولد تزاد فعائلة يمكن نقولو لاباس عليهم .. باه كان تاجر كبير معروف .. أيوب من صغرو عايش فالخير .. باه واخا الفلوس والرزق لي عطاه الله واخا هاكاك ولادو مربيهم أحسن تربية وكولشي كايشهدلهم بأخلاقهم العالية...ايوب كان كيقرا وخا سقط ف الابتدائي لكن الوالد كان كيشجعوو باش اكمل قرايتو وما مقصرش فحقوو اي حاجة بغاها كيوفرها ليه لكن بعد سنين من المحاولات ل النجاح في المشوار الدراسي إكتشف الاب ان الابن ما غيربح وما غيدير والوو ف قرايتووا حيت نقطوو ضعيفة جدا..كما نقول نحن شعب المرقة "سطل" .....أيوب الأن ف عمروو 16 سنة الاب قرر انه يخرج ايوب من لقرايا بعدما قالوو انه غيخدم معاه ف التجارة ايوب فرح فهذا ما كان ينتظره منذ سنين...فعلا بدا الخدمة مع الاب و ستامر وعجباتوو الخدمة ورتاح ليها بعد مرور اربع سنوات ايوب كبر هو الان في سن 20 سنة شاب بالغ قادر على المسؤولية ولا ايوب هو ليشاد لباه و مكلف بكلشي بعد عام ايوب بدات كدور ليه فكرة الزواج فراسوو وخا باقي صغير فكر أنه يجمع راسو ويتزوج وهو ولد 21 سنة...واحد النهار وهو مريح ف الماحال جات واحد البنت داخلة تقدى وهو يهضر معاها......

يتبع.....

.
.
.


الجزء الثاني
.
.
.
.

.
.
.
.
.
.
.
.
.
.
.
دخلات وشافها وهي تعجبو بقات كاتسولو على ثمن شي ثوب تما المهم فالأخير وكاليها بصراحة بغيت نهضر معاك .. هي فرحات وكالتلو آه تفضل كالها تبارك الله آية فالجمال الله يحجبك .. بصراحة عجبتيني بزاف وأنت عارفة مستحيل غانعاودو نتصادفو .. إلى ماعندكش مانع عطيني نمرتك باش يسهال التواصل بيناتنا .. عطاتو النمرة ومشات بقاو كايتواصلو فالمساجات وشافها أنها مناسباه المهم بداك المقدمات دالتعارف المعروفين .. واحد النهار اقتارح عليها يتلاقاو باش يتفاهمو مزيان .. كالتلو أنها خارجة غدا ف4 وتما يتلاقاو .. الغد ليه ف4 خلا المحل للشاب لي خدام عندهم فالمحل ومشا كايتسناها حدا الليسي خرجات وداها لواحد الجردة بداو كايهضرو وسولها على دارهم وكالتليه أنها عايشة غير هي وماماها وبلي باها مات وهي عندها 3 سنين وماعقلاتش عليه .. كالها أيوب إوا باش عيشاتك ماماك كالتلو بشي تقاعد بسيط خلاه باها .. بقاو كايهضرو وكالها أيوب شوفي آ سكينة أنا ماباغي نتصاحب ماوالو أنا باغي نكمل ديني ونتزوج وتكوني حلالي .. بقات ساكتة وهي تشوف فيه وكالتلو...
..
..
يتبع...
.
.
.


الجزء الثالث
.
.
.
.
.
.
.
بقات ساكته وهي تقولوو ايوب خلي من بعد ونجاوبك يلاه نمشيوو راه تعطلت على الدار..وهوما غادين ف الطريق ايوب كان كيحلم بنهار لي غادي اكون هو وسكينة ف نفس الحظة ويكون جامعهم لحلال بعدما قربها ل الدار ودعها ورجع ل الماحال ..هي مشات عند أمها فتحات معها الموضووع قالتلها على ايوب بعد نقاش طويل بين الام و سكينة..سيفطات ميساج ل ايوب قالتلو انه ضروري تشوفوو ف الصباح قبل 8 ناض ايوب مع لفجر بكترت الفرحة هههه مهم مشا تلقاها كان فرحان بالقرار لي غتقولوو باش يحددو يوم العرس... لكن للأسف قالتلوو ايوب خلينا نزيدوو نتعرفوو على بعضياتنا مزيان مازال على الزواج الحال وحنا باقين صغار....مهم بعدما لعبات عليه دور البنت مولات لعقل وتباته والرزانه وعلى انها بنت الناس من الجدوور ...دازت ايام وايام ايوب فاش كيهضر معاها ف تيلفون ولا كيتلقاو فلسانوو غير الزوااج ديما كيجبد ليها الموضوع لكنها هي ديما كتبدل ليه الموضوع مهم بدات الايام كدووز و ايوب كيزيد اتقطع الزغبي رجع كيبغيهاا و كيتشروط وأكثر هههه كيبات يحلم بيها و تا ف الدار غير سميتها لي فبالوو رجع ل ايماات التبرهيش وبدا يكتب سميتها تا هو ف لحيووط وخا لفلوس وكلشي وكترت لبنات لكن هو عشق سكينة و كانت مأثره فيه بزاااف لكن سكينة كانت كتجرجر فيه وكل مرة كتجيه بعذر وبدات كتمسكن عليه واحد النهار قالتلوو نتلقااو ضروري بعدما تلقاوو قالتلوو ايوب بغيتك تساعدنا انا وامي راه ما عندنا باش نخلصوو لكراا ومول الدار غيخرجنا ما كان على ايوب غير البي طلبها و هو يعطيها 1000 درهم مهم شكراتوو و بعد قبلة خفيفة على خده احس ايوب على انه امير زمانه وها هي الايام الجميلة تعووود من جديد....بعدما تفارقوو هو رجع لخدمة وسكينة مشات عند امها كتعاود ليها وهي تقولها الام سمعيني مزيان اش غديري......

يتبع.....
,
,
,


الجزء الرابع
.
.
.
.
.
.
.

قالتلها سمعيني ابنتي ديري علاش تولي وغتانمي فرصتك راه فرصة وحدة كتجي ف العمر والى فوتيها غادي ندموو على ما تبقى من ايامنااا كوني قافزه وجرجريه مزيااان..بعدما سمعات البنت الهضرة دمها قالتلها اه عندك الصح غاندير بهضرتك ا ماما...ايوب عايش ف الاحلام كيرسم احلام و كيلونها ب الوردي غادي و فرحان وكيسبح على الظهر هههه بعد نقاش مع الاب ديالوو.. وصا واحد نجار إصاوبلوو بيت النعااس وبدا كيوجد لحوايج لي ممكن يحتاجهوم ف الحياة الزوجية وتا الاب عطاه الدار لفوق باش ياخد راحتوو معا مراتوو مهم دازت ايام وتلفون بيناتهوم واحد النهار هضرات معاه سكينة قالتلوو راه توحشتك بغيت نشوفك واش انت ما توحشتينيش..أيوب تخلع وتزعزع ههههه جمع لوقفة قالها انا دابااا 5 دقائق هاني عندك ا مراتي لعزيزة هههه سد الماحال ومشا عندها بعدما تلقاها عنقاتوو وقالتلوو توحشتك اراجلي بعدما ريحوو شوية وهي تقولوو يلاه نمشيوو لشي قهوة ولا ريسطوو نبقاو حنا ديما متبعين جرادي هههه قالها هي لي متعاودش مشاوو ريحوو فوحدة ف الطابق الثاني وكان خاوي ما فيهش الناس جا النادل مهم طلبوو لي بغاووو وبدااو كيهضروو على الحياة لي تابعاهم و فرحانين على الخطوة لي غيديروو ف حياتهم...بعد حديث طويل ما بقا ما يتقال وهو ينطق ايوب قالها سكينة كنبغيك وغارق ف حبك..وبغيت هادشي لي بياتنا يكمل ان شاء الله وهي تجاوبوو شداتلوو يدوو و قالتلوو امين و هي تقرب لعندوو وبدات كتغريه بجسدها " ولكم حرية الفهم" هههه مهم ايوب تحل وما بقاا كيفكر فوالوو غير سكينة بعد جلسة طويلة لم تخلوو من الهمس و المس بدات سكينة كتمسكن عليه قالتلوو راه خاصني نشري واحد القفطان وما الى ذلك على انها كاتوجد لعرس بعدما ايوب فهم شنوو كتقصد قالها شنوو خصك واش خصك لفلووس قالتلوو اه خاصاني 5000 درهم قالها لي غالية نرخصها لمراتي وهوما يخرجوو ومشات معاه تا قربوو ل المحال مشا جاب ليها لفلوس و ودعها بعد عناق حار مرافق له قبلات على خدود ايوب المحمرة خجلا ههههه ودعها وما هي الى ايام تا بدااو كيتلقاو يوميا ودائما ما كانت كتير لغريزة ديالو وكتاخد منوو لفلوس بحجة انها محتاجة حوايج لي غيحتاجوهم ف العرس..واحد النهار تافقات هي وأمها أنها ماتكونش فالدار باش يديرولو فخ ويصيدوه زعما راه تهجم عليهم وسط الدار...وصل داك النهار وبعدما هضرات معاه وتافقوو يتلقااو جا ايوب وهي تقولوو سكينة أيوب اليوم غانديك للدار ماما بغات تشوفك قالها انا راه كنحشم.. لكن بعدما قالتلوو امي راه ضريفة وما عندك لاش غتحشم قرر انه يمشي معاها وهما غاديين فالطريق كانوو متشابكين الايدي لكن هي بالعاني عنقاتو وما هي الى أمتار قليلة حتى وقف عليهم واحد السيد.....

يتبع........
,
,
,


الجزء الأخير
.
.
.
.
.
.
.
بعدما كانوو ف الطريق ويد سكينه محتضنه ايوب وقفهم واحد الراجل..وهو يقول سكينة بنتي شنوو هادشي شكون هادا لي معنقاه وهي تنطق والوو ابابا راه غير صديقي...وهنا كانت الصدمت ايوب ف بالوو وكما اخبرته سكينة ان باها ميت لكن ها هو حي يرزق وها هي الأقنعة تسقط من جديد...... بعدما جمع ايوب قواه من هول الصدمة وهو يقول لهداك السيد انا راه قالتلي ان باها ميت وانا راه ناوي لحلال معاها سكينة ما عرفات باش تجاوب مكان عليها غير هربات ل الدار هداك السيد ريح مع ايوب بعدما عاود ليه على علاقتوو مع بنتوو تا هو قالوو على انه طلق ام سكينة لأنها كانت كتخونوو وكتستاغل اصحاب المال. ..بعدما سمع أيوب القصة قرر يبعد على الصداع بمرة وحمد الله حيت ربي دارلو الخير وسكينة باعت نفسها ب ثمن رخيص جدا...بعد مرور سنة ايوب رجع دايها فالتجارة ديالو وهاد المده كانت كافيه.. نسا كولشي واحد النهار جات مرأة مع بنتها تقدا وعجباتو البنت وما كان عليه غير يشوف اختيار الأم ديالوو يكما يسخر ليه الله فشي زوجة صالحة وما يطيحش ف وحدة طماعة....دار راسو أنه ماكاينش الصرف يطلع لدار يجيبو مشا طلع ولقا أمو جالسة بعدما بدا كيضحك فهماتو وعاودلها على أمر البنت لي مع أمها فالمحل هبطات الأم ولقات أنها كاتعرفها معرفة قديمة.. وعوام هادي باش تقطع الإتصال بيناتهم تعجب أيوب لهاد الصدفة وفنفس الوقت فرحان... طلبات الأم من المرأة وبنتها يطلعو وقالتلها لا مزروبة وخدات نمرتها ونعتاتلها الدار وقالتلها أنت لي دوزي عندنا غدا.. فعلا جا الغد ليه دازت عندها وبقاو كايهضرو وفاتحاتها فموضوع ايوب وأنه باغي اكمل دينووو عجباتو أسماء وباغيها ليه ك زوجة.. هضرات الأم مع بنتها وقالتلها آ ماما إلى أنت كاتعرفيهم ناس مزيانين أنا موافقة وتافقو على المسائل ودارو وقت للخطوبة وتخطبات أسماء لأيوب وتفاهمو ومن بعد مدة قصيرة دارو العرس وعاشو بيخير وفسعادة......

العبرة هي : أولا أن الطيبون للطيبات وأي واحد نوا الحلال ربي ماكايخيبوش وكايحميه من أي شر ثانيا دوك الناس لي عندهم الفلوس ماشي كولهم مفسدين وكلهم كيستاغلوو المال ك قوة راه كاينين فيهم ولاد الناس.....

نتمنا القصة تكون عجباتكم وتكونوو خديتوو منها ما س تستغلونه في المستقبل...
,
,
,
الكـاتب & أوكس

إقرأ المزيد

مسلسل "أمواج الفقر"

مسلسل "أمواج الفقر"
..
_____________
الحلقة الأولى
_____________
.
.
.
.
.
.
.
.
.
.
.
.
.
غادي تبدا احداث المسلسل مع عائلة براهيم .. كانت أسرة بسيطة كاتكون من براهيم والزوجة ديالو رحمة و3 دالبنات ودري هو الوحيد فالأسرة .. براهيم كان شاوش فالمقاطعة .. كانو عايشين فدار صغيرة .. ولكن حامدين الله على كل حال .. كان حسن هو الولد الصغير 3 دخواتاتو البنات كاملين كبار عليه .. بقا كايتقاتل براهيم على الزمان تا كبر ولادو كـاملين وكان مربيهم تربية حسنة وكولشي كايشهد عليهم بالخير .. تزوجو البنـات كاملين .. ديك الساعة حسن كـانت عندو 14 عام ملي تزوجات آآخر وحدة فخواتاتو كـانت علاقة حسن بالأب ديالو براهيم بحال الصحاب .. كايتعاودو كولشي .. حسن كـان ضعيف فالقراية.. ماكان كايكمي ماكايتصاحب مع صحاب خايبين .. غير هو الغالب الله القراية ماكاتدخلوش للراس .. وكاينجح غير بالكشايف .. وصل للكاطريام .. دوبل عاماين ..واحد النهار وهو يجي عندو باه وخرج معاه باش يهضرو..
الأب : وهو كايضحك : مالك آآولدي آآ حسن أنت كاع مزلج قد هاكا .. واش كاع ماقادر تخرج من ديك الحفرة د الكوليج
حسن : والله آآ با إلى كانحاول وماكرهتش تا انا نجح ونفرحك ونفرح الميمة..
الأب : شوف آآولدي آآ حسن غانهضر معاك دابا بجدية .. زير راسك هاد العام على الأقل تنجح لليسي وتوصل للباك بعدا تا إلى ماديتيش الباك تقدر تدير شي حاجة بداك النيفو باك
(أحداث القصة بدات فداك الوقت لي كان نيفو باك كاتدير بيه الطايلة)
حسن : صافي آآ با أنا كانواعدك غاندير كل جهدي باش ننجح
الأب : ماشي غير تنجح .. تنجح وتولي تركز مزيان مع قرايتك راه إلى بقيتي بهاد المستوى ماغادير والو فلي جاي..
حسن : كون هاني أنا غانحاول نشري كتب نبقا نقراهم فالصيف باش نثقف شويا ونولي عندي رغبة فالقراية..
الأب : دابا فرحتيني غانمشي وأنا مرتاح
حسن وهو يمزح : با براهيم ارتاح ارتاح ولدك سيواصل الكفاح هههه
الأب : ههههه أنت هو أنت ماكاتبدلش .. الله يخليك آآولدي ديما ضاحك ولكن قرايتك زير فيها وراه إلى مانجحتيش هاد العام غايطردوك
حسن : لا لا إن شاء الله غادي ننجح ونولي أحسن إن شاء الله
الأب : إن شاء الله آآولدي الله ينجحك وبرضي عليك
..
رجعو للدار ولقاو ختهم الكبيرة جات هي وراجلها يدوزو عندهم داك النهار .. داز النهار زوين وكان ولد ختو لحسن عندو 3 سنوات كايلعب فالدار وهي تكولو ميمتو .. هذاك راه غايمشي ويخليلنا القنط إمتا تكبر أنت أبو ركابي وتولدلينا شي واحد يونسنا فالدار ..
حسن وهو يمزح كعادته : الميمة راكي مازالة صغيرة ولديه أنت ههه
الأم : سير تمشي الله يمسخك
دازت الأيام وصلات وقت الإمتحانات د الكاطريام .. فاق حسن فطر ومشا يدوز الإمتحانات وهو خايف .. خايف لا مايدير والو وماينجحش ويخالف الوعد لي عطا لباه .. دازت أيام الإمتحان .. وحسن كايتسنا بالخلعة النتيجة .. داك الوقت ماكانتش كاتجي النتيجة للدار بحال دابا .. كان كايتعلق طابلو فيه أسماء الناجحين .. واحد النهار فالصباح فاق وهو يعيطلو صاحبو ولد الجيران لي كايقرا معاه .. حسن حسن .. راه تعلق الطابلو .. مشا حسن للإعدادية وبقا كايقلب على الإسم ديالو.....
..
..
يتبع.....

.

.

.


مسلسل "أمواج الفقر"
..
_____________
الحلقة الثـــانية
_____________
.
.
.
.
.
.
.
.
.
.
.
.
.
.
وصل النهار لي تعلق فيه الطابلو .. عيطلو صاحبو ومشاو بالزربة للكوليج .. بقا كايقلب حسن على سميتو ومالقاهاش .. عيا مايقلب وعاود الثاني والو..
صاحبو : وازيد قلب آآ حسن راه ربما مع التلفة مابانتليكش
حسن : بففففف واراه ماكايناش آآصاحبي عييت مانقلب.. صافي ضيعتها مع الواليد غايتقلق عليا بالمزيان وأكيد عانخسر علاقتي الزوينة معاه..
صاحبو : شوف شوف تهدن تسنا نمشي نقلب أنا
حسن : آآودي تعيا ماتقلب راه ماكايناش..
بقاو بجوج حدا الطايلو وقرا صاحبو اللائحة كاملة ووالو .. كالو ماكايناش ولكن كيفاش تا لي ناجحين قلال بزااف آواااه غير 3 داللوائح .. بقاو تما وشويا يكولو صاحبو حسن حسن حسن ..
حسن : مالك آآصاحبي
صاحبو : وا راك ناجح
حسن : واش كاتفلا عليا..
صاحبو : ماكانتفلاش .. هادو راه اللوائح ديال الناس لي مانجحوش..
حسن : كيفاش
صاحبو : واراه كاتبينها الفوق قراها
حسن واخا هاكداك ماتيقش ومشا للإدارة يتأكد وأكدولو المسألة وسولهم واش هو ناجح وكالولو آآه .. وفرح بزاااف..
مشا حسن للدار كالها لصحاب الدار وفرحو بزااف حيت أخيرا تفك من ديك الحفرة د الكاطريام..
نجح حسن للسانكيام ودار علوم .. وهو يكولو باه كيفاش أنت داير علوم واش عندك عقل هاد الشعبة ..
حسن : الله يهديك آآ با راه الأداب فيه كثرة الحفاظة وانا ماعنديش مع الحفاظة أما العلوم داكشي غير فهامة وزايدون فالكوليج كنت كانجيب مزيان فالفيزيك والماط..
الأب : إوا أنت تعرف .. المهم زير راسك
حسن : صافي كون هاني
بدا العام الأخر قرا حسن السانكيام مابقا كايقشبل والو كان كايظن أن العلوم هي 1+1 ولا التجربة على الضفادع هههه شاف داكشي مقصح .. بغا يبدل الشعبة .. كالولو مستحيل دابا .. خاصك ضروري تعاود العام عاد فالأول دالعام الجاي تدفع طلب تغيير الشعبة .. داك العام مشا غير هاكاك .. وفالصيف ديال داك العام كان غادي الأب ديالو للخدمة ديالو فالمقاطعة .. كان غادي بالبيكالا وهي تجي طوموبيل بسرعة كبيرة وضرباتو .. طاح للأرض .. جات لومبيلونص هزاتو .. ولحسن الحظ أنه مازال عمرو طويل .. ولكن للأسف تهرس فرجليه .. وخاصو وقت طويل باش يرجع كيف كان .. هنا المقاطعة سمحو فيه وجابو شاوش جديد .. وهو خلاولو جوج فرنك ماكاتكفيهش نهائيا غير بناتو لي كايعاونوه .. وحيت رجالهم الله يعمرها دار ماعمرهوم بخلو عليهم .. مشات الوقت هاكداك وبراهيم صافي بدا كايعيا وكايفقد الأمل أنه يرجع يخدم .. بقالو أمل واحد هو حسن .. حسن واحد النهار كان هو وواحد صاحب الواليد ديالو وتا هو مضاسر معاه .. شافو داك النهار مقلق بزااف وحسن لي كان ديما ضاحك هاد الأيام مقلق ومغبون .. داك السيد تعجب وجا عندو حسن ولدي مالك ؟؟
حسن : إييييه آآبا الجيلالي الوقت صعيبة .. كنت ديما ضاحك وها هي ضحكات عليا..
با الجيلالي : ولدي قوي إيمانك بالله ربي ماكايسد باب تا كايتفتحو بيبان
حسن : وونعم بالله ولكن شوف الواليد دابا راه فالركنة وأنا كانعيا ندير راسي فالقراية ماكانتوفقش..
با الجيلالي : آآجي أنت شحال فعمرك
حسن : عندي 17 وشي شهورا مابقاش بزاف وندير 18
با الجيلالي : إوا عندك الشهادة د الكاطريام .. راه كاين واحد الحل إلى تقبل
حسن : شنا هو آآ با الجيلالي....
..
..
..
يتبع......
..


مسلسل "أمواج الفقر"
________________
الحلقة الثـــالثة
________________
.
.
.
.
.
.
.
.
.
.
.
.
.
.
.
.
.
.
.
الجيلالي : راه كاين داك الكونكور ديال فاكتور راه طالبين شهادة كاطريام
حسن : ولكن أنا راه مازال ماوصلت 18
الجيلالي : آآه عارف .. هو راه ماكايكون تال شهر 5 ديك الساعة أنت غاتكون وصلتيها..
حسن : بففف فين راك آآ شهر 5 .. ماقادرش أنا نشوف الواليد فديك الحالة..
الجيلالي : مالك انت باغي كولشي يجيك بسرعة .. صبر ورضى بقضاء الله.. وبالنسبة للمساعدة د الواليد ديالك أنا نهضرليك مع واحد صاحبي معلم فالبني تبقا تخدم معاه فالسبت والأحد ملي ماتكونش قاري وفالعطل ..
حسن : ربي يخليك آآ با الجيلالي لهلا يخطيك..
دازت الأيام ووصل شهر 5 .. ودفع حسن الضوسي ديالو .. بقا كايتسنا دازت واحد المدة .. عيطولو .. مشا عندهم دوز شي إختبارات ضرورية وتقبل .. ولا حسن فاكتور .. واخا الخلصة د فاكتور قليلة ولكن رغم ذلك كانو عايشين بيخير حيت فداك الوقت كانت مازالة العيشة رخيصة والقليل كايقنع وفيه البركة .. ولا حسن هو لي هاز الدار .. واحد المهار جات واحد المبادرة لديك البوسطة لي خدام فيها حسن .. أنهم كاع دوك لي فاكتور لي خدامين تما كل واحد عطاوه دار .. lمشا حسن وصل هاد الأخبار لدارهم .. بغاو يطيرو بالفرحة لأنهم غايخرجو أخيرا من داك الضيق والتكرفيص .. تحولو للدار الأخرى .. ومشات الأيام .. واحد النهار الأب ديالو تزاد عليه الحال ومرض .. وفالو الأجل ديالو ومات .. ملي مات براهيم خلا حسن مع أمو بقا غير هو وياها .. دازت واحد المدة وفكر حسن أنه يجيب لي يونس ميمتو ويعمر الدار .. كالها أنه باغي يتزوج .. مشات خطباتلو واحد البنت سميتها خديجة .. تزوجها حسن .. ومشات الأمور مزيان .. حملات خديجة وبقاو كاينتاظرو المولود بفارغ الصبر .. دازت 9 شهور وتزادت عندهم بنت سماوها حسناء .. فرحو بها وتمناو لوكان براهيم باقي حي باش يشوف بنت ولدو حسن .. كبرات حسناء وصلات 3 سنوات وبدات كاتلعب فالدار وكال حسن لميمتو إييه آآميمتي الوقت كايطير تعقلي كلي كولتيلي إمتا تا أنت تكبر وتولدلينا لي يونسنا فالدار .. دازت الأيام ووصلات حسناء 4 سنوات .. وهنا عاود الثاني خديجة غاتحمل من جديد .. فاتت 9 شهور .. وفالنهار لي غاتولد .. الأم ديال حسن هي لي قابلاتها أصلا فالولادة د حسناء .. ولكن هاد المرة شافت داكشي صعيب .. وداوها ضغيا للسبيطار وخديجة سخفات .. بقاو مخلوعين عليها لا توقع شي حاجة .. بقاو كايتسناو وهو يخرج عندهم الطبيب كاليهم.....
..
..
..
يتبع....
في الحلقة القادمة
.
.
.


مسلسل "أمواج الفقر"
__________________
الحلقـــــة الرابعـــــــــــة
________________
.
.
.
.
.
.
.
.
.
.
.
.
.
.
.
.
خرج الطبيب كاليهم راه خديجة حـاملة بالتوام .. وماصدقوش وتخلطات الفرحة مع الخلعة .. وسولوه واش هي لاباس .. كاليهم لاباس ولكن غاتبقا مازال فالسبيطار تا تولي لاباس .. دازت شي أيام ولات خديجة لاباس .. خرجوها من السبيطار .. ودوك الأيام كـاملة كـانت حسناء لي هي فعمرها فداك الوقت 6 سنوات .. من نهار شافتهم وهي كاتكولهم غير مراد وكمال مراد وكمال .. وعلى داكشي إختارولهم ديك الأسماء .. مراد وكمـال ..
مشات الأيام ومراد وكمال كايكبرو بين عين والديهم .. دازت 6 سنين عادي .. فاش وصلو الوقت لي غايدخلو المدرسة .. بقا حسن مع مراتو خديجو وكاليها
خديجة مابغيتش كمال ومراد يكونو بحالي نخاف يوليو كما انا والقراية ماتبغيش دخلهم للراس
خديجة : الله يهديك آآحسن داكشي غا مكتاب وكل فيم عطاه الله العقل
حسن : لا لا أنا غانشوف كانفكر ندخلهم لمدرسة خصوصية يقراو الإبتدائي ومن بعد الإعدادي والقانوي يقراوه فالعمومي
خديجة : واش كاتفكر ولا لا .. راه جوج دراري هادوك .. راه أنا امهم وماكرهتش نخرج من دم جوفي ونقريهم فأكبر المدارس ولكن راه مايمكنش .. الخلصة ديالك يالاه كانتكافاو بها مع الزمان.. خليهم فالعمومي وأكيد آآيكونو مخالفين لطريقك
حسن : والله ماعرفت الله يدير لي فيها خير
خديجة : إن شاء الله غير الخير ..
دخل مراد وكمال لمدرسة عمومية بداو كايقراو الإبتدائي جابو مزيان وبدا كايرتاح حسن ويهنا بالو .. مشات الأيام ونقطهم كاتحسن وكايجيو من الأوائل .. حسن فرح أنه من صلبو خرجو دراري أذكياء وصلو للثالث إبتدائي .. واحد النهار وهوماجايين من المدرسة دراري صغار ماعارفين والو فالدنيا وهو يتلاقاهم واحد السيد وبدا كايعيطلهم بالخلعة مرااد مراااد .. كمااال كمااال... شوفو....
..
..
يتبع.....
.
.
.
.


مسلسل "أمواج الفقر"

_______________
الحلقة الخامسة
____________________

بعدما داك السيد بدا كيعيط لمراد وكمال ما فهموو والوو وهو يجي لعندهم وخداهم لواحد الحانوت شرا ليهم وخا مكيعرفوهش لكن الدراري صغار واي حاجة كتغريهم بعدما قالهم خودوو لي بغيتوو انا راه صاحب بابكم وهو لي سيفطني ليكم ناخدكم ل الدار مراد وكمال فرحوو و شراو لي بغاو وهوما ف الطريق غادين لدار حبسهم وهو يقول ليهم باباكم راه مات بكسيدة مراد وكمال ما فهموو والوو مشاو كيجريو وصلوو لقاو الدنيا مقلوبة ناس مجموعة كتبكي ومهم طايحة ل الارض خداتهم الجارة وتما فهماتهم بلي ما بقيش غيرجعوو اشوفوو باهم مراد وكمال ما فاهمينش تا دازت مدة عاد عرفوو وتأكدوو بلي باهم غادر الدنيا وما بقيش غيشوفووه بعد مرور مدة ليست ب قصيرة تا جاهم طلب بالافراغ خاصهم يخرجوو حيت حسن مات وجا ف بلاصتوو موظف جديد ومحتاج ل الدار...فعلا خواو الدار ومشاو عند جارتهم دوزو عندها يامات وما هي الى ايام معدودة حتى وجدوو انفسهم بين دوور الصفيح حيث الام دبرات على براكة ورحلوو ليها وما هي الى سنوات حتى وصلات حسناء لسن 17 سنة و بعد ان اكتملت ملامح الانوثة لديها واصبحت فتاة ناضجة قادرة على المسؤلية ومع اول شخص تقدم ل خطبتها تا قبلات بيه وتزوجاتوو بلا حب بلا مصلحة المهم هو ينقدها من العيشة لي عايشاها و ما تسماش ساكنه ف ديوور القزدير..واقع مر تجرعته الام لعدة سنوااات تحملات ما فيه الكفاية..وكما قال المرحوم محمود درويش.."إن أسباب الموت كثيرة من بينها وجع الحياة"...الام خدمات وتكرفصات لا صحة لا قوة كان كل همها ان تملأ بطون مراد وكمال وذات فجر من أيام الشتاء القارس وجدوو الام ملقية على قارعة الطريق وهي متجهة ل العمل.. بعدما خداوها ل السبيطار وتم الفحص ديالها لقاو على انها كانت حاملة ل سرطان الثدي وهو ما تسبب في مصرعها...
من بعد ما مات الأم مراد وكمال لقاو...

..يتبع

.

.

.


مسلسل "أمواج الفقر"

____________
الحلقة السادسة
_______________

مراد وكمال غايلقاو راسهم فالزنقة وهما ولاد 12 عام تعاطفو معاهم الناس أكيد حيت هما صغار كاين لي كايجيبلهم الماكلة ولا الحوايج .. كمال ورضوان ولا حضنهم هو الزنقة مكرفصين وكولشي محتاقرهم دراري فعمرهم كايبقاو يتعداو عليهم ويضربوهم.. كمال كان هو لي مسؤول على رضوان حيت واخا توام ولكن من صغرهم كان كمال ذكي بزاف على رضوان وعقلو وتفكيرو أكبر من عمرو..
كالو رضوان خويا واش حنا نبقاو هاكدا
كمال : ماتخافش أنا معاك..
رضوان : شنو غانديرو دابا..
كمال عندي واحد البلان فراسي غاتمشي معايا للسوق نبقاو نكريسيو البزاطم للناس
رضوان : لا لا حرام
كمال : تا مالك كاترعد وفين غاتلقا ماتاكل
رضوان : باقيين صغار حنا..
كمال : رضوان الوقت ماكاتعرف كبير ولا صغير الوقت صعابت والزمان قاسح
رضوان : ها أنا نتبعك فين غانوصلو
مشاو للسوق النهار الأول جابو حصيصة طمعو ورضوان تحيد منو الخوف واحد النهار هزو لواحد السيد بزطام وهربو.. بزطام فيه 1000 درهم وكارط كيشي.. كانو تما البوليس كايضورو فالسوق غوت داك السيد وتبعوهم البوليس وشدوهم وحكمات عليهم المحكمة ب 4 سنوات حيت داك السيد يدو طويلة وغرقهم بالمزيان .. داوهم للإصلاحية ومع اول يوم ف الاصلاحية كمال تناقش مع واحد السجين وهوما يدابزوو ومن تما رجعوو محضين وكيعاملهم الموظفين د السجن بحال الحيونات كانوو كيوضعوهم ف سجن انفرادي لا ما لا ماكلة و السجناء تا هوما قامعينهم و مكرفصين عليهم بعد مرور مده بداو كيولفوو جو الاصلاحية وما هي الى لحظات من العذاب حتى مرت السنوات ك لمح البصر و اتى اليوم الذي اطلق فيه صراح مراد وكمال وها هما بعد 4 سنوات يستنشقوون هواء الحرية من جديد.......

يتبع...

.

.

.


مسلسل "أمواج الفقر"
_______________
الحلقة السابعة
_______________
.
.
.
.
.
.
.
.
.
.
.
.
.
.
.

خرج مراد وكمال من الإصلاحية وهما ولاد 17 سنة .. لقاو واقع آخر .. كمال كيما كاتعرفو زعيم ومن صغرو ماكايخافش بالعكس د مراد لي خواف .. خرجو ولقاو راسهم فمواجهة مع قساوة الحياة .. مشا كمال كايضبر على شي خدمة لقا واحد الميكانيك ضبر معاه وهضرلو على خوه وكالو أنا نضبرلو مع واحد مول المحل كبير دالمواد الغدائية .. كمال كايضبر صريف مع الميكانيك ومراد كايضبر صريف مع مول المحل ولقاو بيت صغير ب 300 درهم فالشهر جاتهم 150 للواحد .. دازت واحد الأيام وكلس مراد كايخمم وساكت كالو كمال .. مراد مالك..
مراد : لا والو
كمال : راك خويا + رانا توام وكانحسو ببعضياتنا أكثر..
مراد : كمال أنا عييت وجاتني هاد الخدمة بزاف ودوك الكراطن ثقال عليا بزاف
كمال : آش هادشي .. راه هادي أسهل خدمة وكاتكول هاكدا .. سكت راه كاين لي مالقاهاش.. ترجل وماتكونش ضعيف ..
مراد : بففففف
كمال : بلا ماتبقا تسوط راه خاصك تكون راجل راك مابقيتيش صغير..
مراد : أوكي صافي نسا .. المهم نوض وجدلنا ماناكلو
كمال : تستاهل.. اليوم عندي ليك واحد الطاجين فاعل تارك.. دازت شي أيام خدام مراد فالمحل واحد النهار جابت الكاميون الكراطن دالسلعة ومراد جاي هاز واحد الكرطونة وهو تجيه الدوخة وطاح وطاحو القراعي دالكونفيتير وتلطخات الدنيا .. بدا كايغوت مول المحال وانوض واش جايبك تخدم ولا تضيعني تا كارطونة طيحاتك .. مراد طايح ماكايجاوبش .. جا ياسين دري خدام معاهم فالمحل .. جا عندو مراد مراد مراد لقاه راه سخفان .. مول المحل كايغوت وياسين ماداهاش فيه مشا كايجري لعند كمال للكاراج دالميكانيك .. كمال كمال
كمال : ياسين مالك ياك لاباس ومالك كاتلهت
ياسين : (بصعوبة باش كايهضر) خويا كمال راه خوك مراد طاح فالمحل وسخفان آجي ضغيا نديوه للسبيطار..
كمال : لا مايمكنش.. مشاو كايجريو وتما تشاد كمال مع مول المحل بغا يدابز معاه حيت ماتسوقش لمراد وخلاه طايح تما.. جا ياسين كالو تكالما آ كمال آجي راه ماشي وقت الصداع هادي آجي نهزو مراد للسبيطار .. هزوه وداوه للسبيطار دخلوه بسرعة للمستعجلات بقا كمال تما النهار كامل كايتسنا .. جا خارج الطبيب وهو يصدم كمال بخبر كالو للأسف خوك عندو مرض خطير فالقلب وخاصو يدير عملية
كمال : وشحال المصاريف
الطبيب : 5 دالمليون كمال تصدم وخرج بسرعة وبدا كايفكر منين غايجيب هاد الفلوس باش ينقذ حياة خوه
..
..
يتبع....
.
.
.
.
.


مسلسل "أمواج الفقر"
____________
الحلقة الثامنة
____________
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
خرج كمال كايقلب على شي حل مشا عاود الأمر لمول الكراج لي خدام لقاه ما بإستطاعتو والو .. مشا كايقلب كمال ومالقا والو .. للأسف مالقاش المصاريف ومراد توفا.. بقا كمال معدب فترة طويلة بالخصوص أن مراد كان هو حياتو وكان عزيز عليه .. مشات الأيام وكمال كايحس بنقص كبير فحياتو .. ديما وحداني وديما كايخمم واحد النهار جا عندو صاحبو لي خدام معاه كالو ماتبقاش هاكدا كاتعذب نفسك هادشي مكتاب.. كالو علاش ماتفكر فتبني حياتك ومستقبلك
كمال : كيفاش..
صاحبو : شوف شي بنت الناس وبدا معاها حياتك ..
كمال : الله يهديك واش أنا كاع ماهزيت راسي نزيد المرأة..
صاحبو : أنا غير قتارحت عليك كانتمنالك كل خير.. دازت واحد المدة مول الكراج وسع المحال ولا معروف .. وشاف أن كمال تعلم مزيان .. قرر أنه يزيدو شويا فالخلصة.. فاش تزادت الخلصة كمال بدات كادور فراسو الهضرة ديال صاحبو ولا كايفكر فشي بنت لي يبني معاها حياتو .. واحد النهار كان ماخدامش ومشا بدل حوايجو وخرج يتسارا شاف واحد البنت وعجباتو بزاف .. صافي مع النظرة الأولى ماقدرش يفلتها .. مشا عندها كالها ختي سمحيلي مابغيتش نبسل عليك .. أنا عجبتيني وخفت لا مانعاودش نشوفك مرة أخرى .. وريلي غا داركم ولا باك أو خوك أنا نمشي نهضر معاه باش يكون هادشي مرسم.. وجاوبيني بعدا ياك ما مخطوباش ولا مواعدة شي واحد .. كالتلو لا .. كالها فين داركم .. نعتاتلو البلاصة وكالتلو السمية باش معروف باها فديك الحومة .. كالها واخا وسمحيليا آختي على هاد الوقفة ماديريهاش مني قلة الصواب .. كالتلو لا ماكاين مشكل .. مشا وبالليل بدا كايفكر كيفاش غايمشي لباها وهو بدون عائلة .. قرر أنه يعيط لختو حسناء تمشي معاه بالإضافة لمول الكراج لي خدام عندو .. تافقو ودارو واحد النهار باش يمشيو .. وصل داك النهار ومشاو لديك الحومة وسولو على الدار لقاوها وخرج باها كالولو ممكن ندخلو نهضرو فراحتنا كالهم تفضلو .. كالولو أن كمال طالب يد بنتو.. جاوبهم الأب...
..
..
يتبع....
.
.
.


مسلسل "أمواج الفقر"
________
الحلقة التاسعة..
.
.
.
.
.
.
.
.
.
.
.
.
.
.
.
.
بعدما قرر كمال وحسناء والسيد مول الكراج دالمكانيك انهم يمشيوو يشوفوو البنت لي بغا كمال حددو الوقت ومشاو وصلو ل الدار لي نعتوو ليهم ستقبلهم الاب ورحب بيهم دخلوو بعدما قال ل الزوجة صاوبي ل الضياف اتاي و هو ينطق مول الكراج و حسناء وفاتحوه فالموضوع بعد حديث طويل حكات حسناء ل اب البنت على انهم يتاما و والديهم ماتوو..نطق السيد مول الكراج دالميكانيك قالوو على ان كمال رجل و بدراعوو وانه خدام على راسوو وعلى ان بنتوو غادي تكون ف الحفظ والصون نطق الاب وقالهم خلي نشاورها و نشوفو شنو تقول بعدما ندى الام وقالها قولي لمريم تجي..كمال اول مرة يسم اسم زوجتوو المستقبلية الى بغا الله فعلا جات مريم ماقداش تهز عينيها غير ساكته قالها الاب بنتي هاد الرجل راه جاي يخطبك و بغاك تكوني زوجة ديالوو بعدما شافت مريم ف كمال و هي تحرك راسها على انها موافقة بعدما جابت الام د مريم اتاي وجلسوو مجموعين تحيدات شوية لجشومية د مريم و حسات على انها لقات الرجل لي يستاهل تضحي معاه بحياتها بعدما سالاو ناضو خرجوو وهي حسناء خت كمال توخرات وبدات كتهضر مع مريم بعدما خدات منها النمرة د الهاتف باش تبقى على تصال مع كمال غادروو البيت و مشاو تفارقو بعدما دعاوو مع كمال ان الله اوفقوو ف الخطوة لي دار...كمال خدا النمرة د مريم و مشا القهوة بكترت الفرحة بدا كيفكر امتا يهضر مع مريم دازت لعشية وصل الليل...كمال قيد النمرة بعدما صونا وعاود ما جاوبوو تا واحد بقا مستغرب وما هي الى لحظات حتى جاتوو رسالة من النمرة...شكون معايا ؟؟
جاوب كمال ب رسالة كتب فيها انا كمال امريم جاوبيني...بعدما صونا جوباتوو بدااو الحديث..
هو : لباس عليك سمحو لينا اليوم هجمنا عليكم..
هي : دار داركووم مرحباا
هو : نتمنى كيما وافقتي على طلبي تا انا عمري نطيح بكلمتك ونحافض عليك
هي : ان شاء الله اكون خير ربي اكمل علينا
هو امين
هي : فينك شنو كدير...
بعد حديث طوييل من الاسئلة بدا كمال و مريم كينساجموو مع بعضياتهم و كيتناقشوو على يوم العرس وعلى شنوو غيخصهوم ف عش الزوجية صارحها كمال وقالها على خدمتوو مريم قالتلو المهم هو ما تسمحش فيا ونعيشوو فينما بغيتي المهم هو نكون فرحانة وسعيدة معااك....
.
.
.
.


مسلسل "أمواج الفقر"
.
______________
الحلقة العاشرة
______________

.
.
.
.
.
.
.
.
.
.
.
.

بعد ايام من التعارف كمال ومريم رجعوو كأنهم شخص واحد تفاهموو على كلشي مريم كانت كتسمع هضرة كمال وكان تا هو كيشد بخاطرها وعمروو قلقهاا كان مرة مرة كيشوفها قدام الباب كيسلم عليها وكيمشي فحالوو..دازت 3 أشهر كان كمال كيخدم بليل ونهار ملي شافوو لمعلم ديالو جامع راسوو وفعلا بغا يتزوج قرر انه يزيدوو ف لخلاص كمال شكر لمعلم ديالوو وكان تقريبا كل الاعمال الصعيبة ف الكراج كيديرها بحجة ان لمعلم ديالو كبر ف العمر ومبقاش قادر على هزان لحوايج تقال..واحد النهار قالو لمعلم ديالوو واش كتلاقا بمريم كيف غادية الاموور ديالكم مزيان قالوو لباس حمد الله وهو يقولوو لمعلم وشنوو كتسنااا انا نعاونك باش تعقد و باش تكري مدة د 4 اشهر شي دويرة لي تجمعكم وتبدااو حياتكم بحال كاع الناس ..كمال مكدبتيش المعلم والله راني تعطلت على بنت الناس ربي اخليك وشكرا كيما وقفتي معايا ربي اعوضك..وانا من ليوما غير نخرج نبدا نقلب على شي دار نكريها..خرج كمال و مشا كيسول صمصارة نعتولوو شخال من دار لكن للأسف غالين بزااف تا جا واحد صاحبوو كان كيدوز عندوو لكراج وقالو امي راه عندها واحد الدار جاتها ف الورت وما تاقتش تكريها لشي واحد الى بغيتي يالاه تشوفها و نهضر ليك معاها فعلا مشاو دخلوو كانت دار ديال 70 متر ونقية مشاو عند الوليدة د صاحبوو و كراتها ليه...رجع كمال كيمشي مرة مرة كيبات فيها وبدا كيجهزها بشوية بشوية دازت مدة الدار كاملة اي حاجة ممكن يحتاجوها ف عش الزوجية وفرها كمال..بقات سيمانة على موعد العرس وهو يجي اب مريم وقال لمريم سمعي أبنتي.....
.
.
.
.
يتبع.....
.
.
.


مسلسل "أمواج الفقر"
.
.
______________
الحلقة الأخيرة
____________
.
.
.
.
.
.
.
.
.
.
.
.
.
.
جا الأب قالها بنتي بغيت نهضر معاك قالتلو وخاا قالها انا ف الصالون ملي تكملي وأجي نهضر معاك مريم ما فهمات والوو اول مرة الاب ديالها كيهضر معاها بهاد الطريقة كملات شغلها وهي تمشي عندوو..سولها قالها مريم باقة كتهضري مع كمال قالتلوو اه راه قريب لعرس وهو ينطق أشمن عرس تا انت واش باغة تمشي تكرفصي ف حياتك اش باغة بداك لمزلووط ما عندوو تا الولدين وهي تنطق مريم حشومة ابابا ولديه ميتين الله ارحمهوم وهو يجاوبها قلت لك فسخي عليا ديك الخطوبة وداك تلفون طفيه ولا نهرسوو ليك مريم ما فهمات والوو غير مصدومة حدرات راسها وقالتوو وخا ابابا ومشات غادية وهو يعيط عليها فين غادية باقي ما كملت هضرتي..راه ولد خالتك دخل لبارح من المانياا و خالتك راه هضرات معانا انا وماماك وغادي اجيوو اخطبووك فهاد اليامات يالله سيري تقدي شغالك ونساي عليا داك لمكنسيان لمعفن...مريم ما عارفة ما تقول طلعات لبيتها طفات التلفون و بدات كتبكي دازت ديك الليلة ما نعساتش كتفكر ف الذنب لي غدير فحق كمال وهي ما شافت منوو غير الخير...كمال كيصوني باليل ونهار وكيلقا تلفون طافي معارفش كيف غايدير تا اعرف اخبار مريم و العرس ما بقا ليه والوو بعدما دازت يوماين كمال قرر انه امشي لعندهم ل الدار اسول عليها وهو غادي ف الطريق صادف ام مريم جاية من سوق وهو يسولها الحاجة سلام لباس كلشي مزيان سمحيلي نسولك بعدما سلمات عليه وقالتلو اولدي كمال مريم راه ضاع ليها التلفون دكشي علاش راه عطاتوو يتصااوب و هو يقولها نمشي معاك عيطي ليا عليها نسلم عليها ونمشي وهي تقولوو راه مشات اولدي لحمام وغادي دوز عند خالتها حتى تصاوب تلفونها وراه غادي تهضر معاك انا نقولها ليها...كانت الحاجة خايفة تصدم كمال وداكشي لي خلاها تكدب حيت شافت فيه على انه ولد الناس وما يستاهلش يتجرح ف حياتوو يكفي ان والديه معندوش وقاسى بزااف ف حياتوو...واحد النهار كان اب مريم ف الجامع كيصلي لمغرب بعدما سلاو وجا راجع ل الدار وهو يشوف ولد خالتها لي بغا يخطب مريم واقف جنب واحد الطومبيل بغا يمشي اهضر معاه لكن بانليه ماشي هو هداك وهو كيقرب منوو حتا دخل ل الطومبيل و سمع لهضرة دلبنات و ولقراعي دشراب كيتلاح من شراجم وضحك و ما الى ذلك...ستغرب وتصدم الاب ل المنظر لي شاف..وهو يجي كايجري للدار قال لبنتو ياكما هضرتي مع كمال قالتلو لا راه من نهار قلتيها ليا طفيت التلفون وما بقيتش هضرت معاه..وهو يعنقها قالتلوو بابا مالك قالها ما تقوليلو والوو ابنتي هداك هو الراجل لي يستاهلك سمحيلي ابنتي مشيت نخرج ليك على حياتك..ممكن أنا عماني الطمع لكن والحمد لله لي ربي فيقني وورالي الحقيقة...بعدما حكا ليها داكشي لي شاف طلعات لبيتها وهضرات مع كمال دازت يوماين وهو يبدا العرس وتا اب مريم ما خلاهمش بلعكس عاونهم ودار ليهم عرس كبير و زاد اتت ليهم الدار و بدا كيساعدهم حتى وقفوو على رجليهم ومع مرور الوقت مول الكراج توفا بعدما كتب ل كمال الكراج بسميتوو.. كمال جمع شوية د الصرف وشرا ديك الدار فاش كانوو ساكنين وعاشوو مزياان.......
.
.
.
الى هنا نهاية مسلسل "أمواج الفقر" فصراحة كاملين ولفناه لكن هادي نهاية القصة و ان شاء الله نزيدوكم قصص ومسلسلات أخرين.....
.
.
العبرة كنظن انها باينه اي ان لي فرزقك غتوصلك ويحاول الانسان ما أمكن ما يكونش طماع ومتغويهش دنيا لأن "القناعة كنز لا يفنى"
.
.
.
.



أوكس & الكـاتب

إقرأ المزيد

قصة سقوط القناع...

الجزء الأول..
.
.
.
.
.
.
.
.
.
.
.
.
.
.
غاتبدا القصة من داك النهار لي جات أمال خارجة من الليسي .. صاحبتها تحركات مع الدري لي مصاحبة معاه وبقات غادية فالطريق بوحدها .. وبدات كاتدورلها الأفكار فراسها .. تا انا خاصني نتصاحب مانبقاش بوحدي .. وهي غادية وكاتفكر وهو يجي عندها واحد الدري لابس مزيان ومحسن تحسينة عادية .. كاليها السلام ممكن توقفي واحد الدقيقة نهضر معاك هي بغات تدير راسها ماباغياش ولكن دوك الأفكار لي يالاه بداو كايدورو فبالها غلبو عليها .. كالتلو أوكي كول شنو بغيتي تكول راني معطلة .. كاليها وا ماعندك لاش تزربي جوج دقايق أو صافي .. من قبيلا شفتك انت وواحد البنت وشفتها مشات عند صاحبتها وخلاتك .. دابا انت باش أحسن منك ديك صاحبتك وا أنت زوينة عليها ومهليا فراسك أحسن منها علاش راكي بوحدك راه ألف واحد كايتمنى منك غير بحال هاد الوقفة .. بصراحة هاد الزين كامل خسارة يبقى وحداني .. أنا نجيك من الأخير .. تا أنا كانقلب على شي بنت الناس لي ترافقني ونعيش معاها .. وماغانلقاش ما أحسن منط ومابغيتش هاد الفرصة تفوتني .. أنا بغيت نتصاحب معاك .. جاوباتو وا زربتي عليا .. عرفني على راسك بعدا ؟؟..
..
..
يتبع.....
.
.
.
.


الجزء الثــاني..
.
.
.
.
.
.
. كاليها أنا سميتي أشرف خدام فالعسكر هادي عام باش دخلت للعسكر .. وأنا ماشي من هاد المدينة أنا جديد .. هي سمعات عسكري وهي يطجوو عينيها ههه .. كاليها وأنت شنو سميتك .. كالتليه سميتي أمال وكانقرا فالسيزيام .. كالتليه دابا سمحليا راني تعطلت خاصني نمشي كاليها دابا شنو هو الجواب ديالك وهي تكوليه وا نفكر ونرد عليك .. كاليها ماكاين فين غاتردي عليا راه ماغانلقاكش نرة أخرى وكيغامدير نتاصل بيك خاصكي تخليلي نمرتك .. هي هاديك تبادلو النماري ومشا .. النهار الآخر صونالها وكاليها شنو جوابك دابا .. خاصني نسمع جوابك قبل مانمشي للدار .. حيت غانشد واحد 4 أيام غانمشي للواليدة وإلى كنتي موافقة أكيد غانعاودلها عليك .. البنت تلفات وهي تكولو صافي واخا انا موافقة ..دازت الأيام بداو كايتلاقاو وطاحت فيه بدات كاتبغيه .. لي بغاها كاياخدها .. ديما كايلعب بالجسد ديالها كيما بغا .. صافي تا طلعاتلو فراسو .. واحد الليلة بدا كايقلب يتفك منها .. وبدا كايتجابد معاها الصداع .. ودابز معاها وبدل النمرة .. ومشا خلاها .. واحد النهار هز ديك الكارطة القديمة وهو يخدمها وكايلقا بزااف د الميساجات...
..
..
يتبع.....
.
.
.
.


الجزء الثــالث..
.
.
.
.
.
.
.
.
لقا ميساجات ديال صاحبتها .. كالتليه حشومة هادشي لي درتي فالبنت هي كاتبغيك بزااف وأنت خليتيها .. فخبارك من داك النهار وهي تبكي .. وراه جوج مرات طاحت وسخفات غا بالأعصاب وكاتجي لومبيلونص تا لليسي تديها .. واش غاتخليها هاكدا .. وهو يجاوبها وكاليها عطيني نمرتها راه مشاتلي .. اتاصل بيها كاليها سلام أمال أنا أشرف بغيت نشوفك .. وهي تفرح وكالتلو صافي واخااا .. وهو صافي بقات فيه وبغا يصارحها صافي باش تكرهو .. جا عندها وكاليها شوفي أنا غير كانكدب عليك .. أنا كداب مانسواش .. كالتلو كيفاش .. كالها ها أنا غادي نأكدليك....
..
..
يتبع......
.
.
.


الجزء الأخيــــر..
.
.
.
.
.
.
.
.
.
.
جبدليها لاكارط وكاليها ها أنت .. أنا أولا ماسميتيش أشرف .. أنا سميتي خالد .. هي شافت لاكارط وتصدماات .. هو كال صافي تهنا منها وبلي غاتكرهو ويرتاح .. ساعة زتدت طاحت فيه .. كالتلو أنا صافي مسامحاك ماكايهمنيش . أنا كانبغيك انت وبغيتك تبقى معايا كيما انت .. هي ماعرفت كيف وقعلها .. عند بالها راه كادب عليها غا فالإسم وبلي راه عسكري .. واحد النهار جاتها الهيستيريا وسخن عليها راسها .. ماقراتش وهي تصونيلو وافينك كاليها أنا فالدار .. كالتلو آآجي للجردة فاش كانتلاقاو باغية نشوفك ضروري .. جا عندها وبقاو كالسين وكالتلو واش عرفتي علاش عيطلك كالها عادي كيما ديما ماقريتيش ونجيو نكلسو نهضرو كالتلو لا وتعجب وهي تفتح الطابلية وفتحات الصدافي د قميجتها وكالتلو هارا يدك ههههه .. كالها واش أنت جماقيتي .. شويا شافها نيت سخن عليها راسها وهو يبدا فيها خربقها بالمعقول .. صافي عافها وطلعاتلو فراسو .. دازت شي أيام وهو يجي عندها .. كالها شوفي أنا راه ما عسكري ما تا وزة انا غا طالب ف لافاك .. وكان ديك الوقت جاي نيت من لافاك .. جبدليها لي بوليكوب وكاليها ها انت شوفي وجبدليها لاكارط د الطالب وكاليها صافي تيقتي دابا بلي انا كداب .. ومشا وخلاها وسالا معاها,,,
..
..
النهــــاية
.
.
العبرة : هذا ماكايتسماش حب هذا غير طمع .. ظناتو أنها عسكري غاتعطيه جسدها راه غايعطيها كولشي .. + البنات ماشي أي واحد جا كاليك شي حاجة تيقيه .. ماتكونوش غبيات وتيقو كولشي .....
.
.
.
.
الكـــاتب

إقرأ المزيد

السعادة

حسنا..
..
آتعلمون ما هي السعادة الحقيقية..
السعادة هي عندما تكون أنت سبب إبتسامة صادقة على ملامح والدك أو والدتك.. السعادة هي عندما تنتهي أمك من صلاتها ستشكر هذه المرة الله بدل أن تطلبه .. ستشكره لأنه إستجاب لكل دعواتها في حق إبنها .. السعادة هي عندما تكافح بأقصى طاقتك كي لاترى ذلك الرجل الذي إعترى الشيب رأسه يحمل ولو كيلوغراما واحدا من الأتعاب..
..
السعادة هي عندما يطرق والداك منزل الفتاة التي سحرت قلبك وإستعمرت وجدانك .. السعادة هي عندما تعود متعبا من العمل لتستقبلك بكل رومانيسة تنسيك تعب اليوم بأكمله .. السعادة هي عندما تحصل على إجازة من العمل تأخذ زوجتك وأطفالك ليعيشوا بين حضن جدتهم..
..
السعادة هي عندما يلتقيك أستاذ إبنك ويخبرك أنه تلميذ نجيب وذكي .. وأن نقطه تشهد على ذلك .. السعادة هي عندما تدخل للمنزل فجأة فتسمع صوت تجزيد القرآن لتكتشف أن الصوت صادر من غرفة إبنتك..
..
..
هذه هي السعادة من منظوري والتي تؤطرها أحلامي.. !!
.
.
.
.
.
الكـــاتب

إقرأ المزيد

خيانة زوجية

قصة الزوجة التي خانت زوجها بعد 10 سنوات من الزواج
..
الجـــزء الأول..
.
.
.
.
.
.
.
.
.
.
.
ادريس تزاد فعائلة بسيطة فواحد الفيلاج صغير .. ماكملش قرايتو وصل غا السابعة وماكملش .. كان من صغرو كايبريكولي فأي حاجة وكايضبر على راسو ماكايتسناش باه هو يصرف عليه .. فداك العام طاحت عليه فكرة يدير التكوين .. مشا كالها لواحد النجار كان كايبريكولي عندو .. وهو يكولو باش غاينفعك هاد الديبلوم . كاع ماطفروه لي عندهم ديبلوم سبيسياليزي عاد أنت لي غير كاليفيي .. ادريس ماتسوقش لهضرتو .. وداكشي لي فراسو باغي يديرو .. مشا كايخدم وكايضبر صريف باش غايتسجل .. دوز داك العام غا فالبريكولات كل مرة وفين .. تال العام الآخر .. مشا ليسطيا .. لقى تكوينات زوينة ولكن كاملاهم غير صحاب طيكنيسيان وطيكنيسيان سبيسياليزي .. أما الكاليفيي مافيهاش شي حاجة .. واخا هاكداك ما تأثرش واختار أنه يدير البرونش ديال بلومبي .. مشا للإدارة دفع .. دازت الأمور بيخير وبدا كايقرا وكاينجح .. تال نهار لي غادي يبغي يشد الديبلوم.. هنا غادي.....
..
..
يتبع.....
.
.
.
.


الجـــزء الثـــاني..
.
.
.
.
.
.
.
.
.
.
.
.
.
.
.
فاجآآتو الإدارة مفاجأة سارة .. كالتلو أنه جا من الثلاثة الأوائل .. وهاد الثلاثة الأوائل كاتكون عندهم ميزة أنهم من حقهم يدفعو للطيكنيسيان كأنه عندو نيفو باك .. ادريس فرح بزااف .. وأنه طموحو الكبير مامشاش فالخوا الخاوي .. كالتلو الإدارة أنه هادشي ماشي إجباري هذا أمر إختياري .. كاليهم أكيد أكيد موافق .. كالولو راه غاتقرا عاماين .. بقا ساكت شويا وكيفاش غايساير قرايتو حيت دابا تطورات الأمور وقرايتو آآتخصها بعض المصاريف .. بعد مابقا كايناقش مع راسو كاليهم صافي موافق .. مشا قاد أمورو .. ودفع على أساس أنه يبدا فالطيكنيسيان .. بدا كايقرا وديما النقط د لي كونطرول متميز فيهم وأكثرية فالبراتيك كايبهر الأساتذة كأنه شي واحد معلم منذ سنين فتابلومبييت .. دوز عاماين واستاحق أنه ياخد المرتبة الأولى .. وكالعادة لي جا الأول كايدوز وكايكون عندو الحق يمشي للمستوى الآخر .. جات عندو الإدارة وكالتلو أنك جيتي الأول .. ومن حقك تسجل فالطيكنيسيان سبيسياليزي .. وهو يجاوبهم....
..
..
يتبع....
.
.
.
.


الجزء الثــالث..
.
.
.
.
.
.
.
.
.
.
.
.
.
.
.
.
شاف ادريس راسو انه مايقدرش يكمل حاليا حيت الظروف ماكاتسمحلوش وكايخصو بزااف .. صافي قرر انه يخرج غير بديبلوم طيكنيسيان .. مشا كايدفع بداك الديبلوم .. ودفع نسخة منو ل "لانابيك" .. ومشا لواحد السيد كان كايبريكولي عندو عاودلو شنو كاين ولحسن حظو انه كايعرف معرفة مزيانة واحد السيد مدير ف"لونيب" يعني المكتب الوطني للماء الصالح للشرب .. هضر مع داك السيد .. وكالو سيفطو نجربوه ونشوفو واش يصلاح لينا .. مشا عندهم .. سيفطوه يبقاا يتخصص ف لي فويت ويصاوبهم ولا شي عطب إلى كان فشي دار .. دوز سيمانة كولشي الناس شكروه .. صافي قررو أنهم مايفرطوش فيه وقبلوه .. دازت الأيام .. وصل ادريس 20 سنة بدا كايفكر فالزواج .. واحد النهار شاف واحد البنت وعجباتو .. مشا كالها للأم ديالو .. كالتلو لي عجباتك آولدي نخطبهالك نعتلها ديك البنت .. ومع الفيلاج صغير وكاع الناس معروفين .. عرفاتها الأم .. كالتلو آآه زينب كانتلاقا بأمها فالسوق كايبانو ناس زوينين .. مشاو واحد النهار وخطبوها .. وبقا ادريس كايهضر مع زينب وكايتعارفو اكثر .. واحد النهار بداو كايتناقشو على أمور الزواج وهي تكوليه...
..
..
يتبع.....
.
.
.


الجـــزء الــرابع..
.
.
.
.
.
.
.
.
.
.
.
.
.
.
بدات كاتسولو على الخدمة .. كاليها الخدمة راكي عارفاها .. ومااشي شي حاجة زعما الخلصة على قد الحال ولكن بيخير عايشين بيها .. والسكنى غانسكنو مع دارنا ويلا سهل الله من بعد علاش لا نديرو دارنا بوحدنا .. كالتلو إوا انت دابا غاتزوج واش غاتبقا تصرف على نراتك ولا على والديك .. وبقات كاتبعكك عليه .. وادريس أعدى حاجة عندو هي داك التبعكيك الخاوي .. كالها شوفي آآبنت الناس قاسح أحسن من كذاب .. أنا واليديا ماغانفوتهومش واخا يبقى فيا عرق واحد .. ممكن يسهل عليا الله وندير داري بوحدي .. ولكن واليديا غايبقاو فوق عينيا .. بقاو فالنقاش ومن خلال هضرتها شافها انها ماغاتصلاحلوش .. النهار الآخر كاليها شوفي آآ زينب .. تلاقينا بإحترام غانساليو بإحترام أنا هادي هي عقليتي وأنت الله يجيب لي يفهمك .. صافي فسخو داكشي .. وادريس مازال متشبث بفكرة الزواج.. كالتلو الأم ديالو نشوفولك آآولدي بنت نجية جارتنا .. ماعمري شفت منها العيب وماعمرها خرجات من الدار ديما إلى خرجات كاتخرج هي وأمها .. كالها لي درتيه الواليدة ماعنديش مشكل .. اتافقو على واحد النهار ومشاو....
..
..
يتبع.....
.
.
.


الجـــزء الخــامس..
.
.
.
.
.
.
.
.
.
.
.
.
مشاو عندهم فاتحوهوم فالموضوع .. كالتلهم أمها إلى موافقة البنت ماعنديش مشكل .. وبدات كاتعيطلها .. ابتساام إبتسااام .. ولكن مابغاتش تجي حيت حشمات .. مشات الام خرجات عندها .. وكالتليها مالكي .. كالتليها حشمت ماقدرتش ندخل .. كالتلها غير دخلي هادي غير جارتنا خديجة .. دخلات وكالولها شنو رأيك .. ماجاوباتش وبقات شويا وكالتليهم أنا لي دارتها امي ماعنديش مشكل .. صافي يعني البنت موافقة .. مشات الأمور على حالها .. وتزوج ادريس بإبتسام .. دازت عاماين على الزواج ولداتلو بنت فرحوو بيها بزااف .. وديك البنت دخلات عليهم بالخير .. حيت ادريس فداك العام ترقا فالخدمة وولا تقني يعني مابقاش خدام خدمة مكرفصة ولا هو شاد البيرو .. ولات الخلصة مزيانة .. قرر ادريس أنه يدير دارو بوحدو .. مشا كالها لباه .. كالو آولدي إلى عندك باش غير ديرها .. هادي راه داركم جميع ولكن افتارض دابا انا مت غاتبقا انت وخوتك كاضاربو على هاد جوج متر .. وأنت مزوج وبولادك كايخصك حاجة خاصة بيك .. فرح ادريس لهضرة باه وعرف أن الرضى ديال باه معاه .. مشا كايقلب تا لقا واحد الدار للبيع وشراها .. إوا زاد صلحها وسكن فيها .. دازت 4 سنين وتزاد عندو ولد .. فرح ادريس بزاااف .. حيت تزاد عندو ولد وحيت أجمل حاجة فالدنيا هي تكون عندك بنت وولد .. دازت 4 سنين من بعد وهو ادريس تعيطلو لانابيك...
..
..
يتبع....
.
.
.


الجزء قبل الأخيـــر
.
.
.
.
.
.
.
.
.
.
.
مشا لانابيك يشوف آآش داكشي بغاوه .. لقاهم أنهم عيطولو حيت كـاين واحد الكونكور ديال التقني فمجال بلومبي .. وهاد الكونكور هو ديال الدولة .. كالولو جيب الوثائق ديالك إلى باغي تدوزو .. مشا ادريس كايفكر .. وشاف أن الكونكور ديال الدولة .. يعني هادي فرصة باش غايضمن مستقبلو ومستقبل ولادو مزيان وزيد بزااف د المميزات .. قرر أنه يدفع لداك الكونكور .. فعلا مشا دفع .. دوز وبحكم الخبرة ديالو أكيد دوز الإمتحان وحصل على نتيجة مزيانة بزااف .. وفعلا تقبل .. ولكن للأسف تعين فمدينة أخرى .. تقبل الأمر .. ومشات الأمور مزيان .. كل مرة كايشد كونجي وكايجي لدارو .. وفالصيف كايجيب مراتو وولادو لعندو حيت فالأوقات الأخرى مايصلاحلوش .. حيت كايقراو فالمدرسة .. المهم مشات الأمور .. واحد النهار جا كونجي وكالتلو مراتو خاصك تشري بيسي وتدخل الكونيكسيون الدراري راه كايحتاجو شحال من حاجة فالأنترنيت .. بدون نقاش لبى الطلب .. وهنا لالاهم إبتسام غاتلقا مابغات .. حيت الكونيكسيون بغاتها هي .. تسالا الكونجي د دريس ورجع للخدمة .. وبقات ابتسام ديما حدا البيسي .. كانت قبل ماتزوج بادريس مبلية بالكونيكسيون .. وفعلا واخا ماكاتخرج ما والو وتا إلى خرجات كاتخرج مع أمها .. ولكن فداك التيليفون وداك البيسي لي كان عندها كانت دايرة العجب العجاب .. عاطياها غا للسواعدة الخليجيين ؟؟ .. من بعد ماتزوجات مابقاتش داياها فداكشي حيت ماكانت عندها كونيكسيون و+ دريس فنفس المدينة ماعندها كيدير .. من بعد ما دريس تحول لمدينة أخرى هي لقات السبة ودارت السبة الأخرى بالدراري خاصهم كونيكسيون .. ورجعات لعادتها .. جا الصيف..
..
..
يتبع....
.
.
.


الجــزء الأخيـــر..
.
.
.
.
.
.
.
.
.
.
.
.
.
جا الصيف وكالها ادريس باش يجيو عندو حيت هاد المرة مايصلاحش يجيبهم هو الخدمة تزيرات .. كالتلو هي وا صافي أنت غاتكون مزير مع الخدمة لاش غانجيو هاد الصيف الدراري راه بغاو يدوزوه فدار جدهم .. فرح دريس حيت الدراري عزيز عليهم جدهم ووافق على الأمر.. مشات الأمور هاكداك .. واحد النهار وهو يجي ادريس وصل بالليل .. ومابغاش يمشي يصدعم فدار باه كال مع راسو يمشي يبات فدارو تال الصباح.. مشا لدارو وهو يتصدم .. كايدخل كايلقا إبتسام كاتشطح قدام واحد الخليجي .. إدريس بكثرة الإنفعال كايقلب على أي حاجة يضرب او يقتل .. داك الخليجي ناض هرب بحالو كايجري .. ناض الغوات وفاقو الجيران .. والأخبار دارت بوووم فداك الحي .. راه فلانتة لقاها راجلها مدخلة خليجي كاتفسد هي وياه .. تفرش كولشي ووصل الأمر للمحكمة .. حكمو عليها بتهمة الخيانة الزوجية ضربات عام .. كره ادريس الحياة والعيالات .. باع دارو .. ومشا للمدينة فين خدام .. والأولاد خلاهم فدار جدهم يعمي باه .. ولا غير منسيين ومهمشين .. ماكاين لي يحم عليهم .. ومن بعد خرجات إبتسام من الحبس والديها تبراو منها صافي ولات بنت الزنقة وكاتبيع فلحمها للأسف...
..
..
النهــــــاية
.
.
.
..
العبرة : ماشي أي وحدة كانت ماكاتخرجش من الدار وإلى خرجات كاتخرج مع أمها صافي نسميوها بنت الناس ومربية.. + الأبناء إلى خطاهم حضن الوالدين بجوج راه ماعمرهم غايحسو بالراحة وحياتهم عادي ضيع وتمشي لهاوية
..
..
رأيكم حول القصة ؟؟
.
.
الكـــاتب

إقرأ المزيد

قصة "دعوة مظلوم"

قصة "دعوة مظلوم"
..
الجزء الأول
.
.
.
.
.
.
.
.
.
.
.
.
أشرف تزاد فعائلة ثرية .. الأب ديالو وزير والأم قاضية كبيرة ومعروفة .. كاين غا هو وختو صغيرة عليه بأربع سنوات .. أشرف فعمرو 17 سنة أي حاجة باغيها كايلقاها .. والديه أصلا قليل فين كايشوفهم باه ديما غابر والأم كذلك .. كايخليولو الفلوس بالكثرة .. واحد النهار كان محتاج الفلوس وما لقا والو ووالديه ماعارفش فين غابرين .. تما كال لباه أنه يديرليه كونط فالبنك باش ملي يكون غابر يسيفطلو غا تما فالكونط .. المهم أشرف عاش فواحد الثراء فاحش .. القراية أصلا ماكايتسوقلهاش .. وصل ل 18 عام ويالاه كايقرا فالسانكيام .. أشرف كان كايقرا فليسي بريفي ولكن ديما كايمشي لحدا واحد الليسي عمومي حيت تما كايلقا لي بغا ويقدر يغوي البنات لي تما أما لي كايقراو معاه كولهم ملعقين وفالمستوى ديالو أو أكثر .. المهم واحد النهار كان عاصر قدام داك الليسي عمومي وهي تبانليه واحد البنت .. كان هو واقف حدا طي-ماكس ديالو .. غمزها وجات كاتجري .. شافت الموطور والدري لابس حطة كاتسوا أكثر من خلصة باها هي .. المهم جات عندو وكاليها واش نتحركو من هنا ونهضرو ؟؟
..
..
يتبع...
.
.
.
.


قصة "دعوة مظلوم"
..
الجزء الثاني
.
.
.
.
.
.
.
.
.
.
كالتليه دابا راه 12 ماغايصلاحليش..
أشرف : آه ماعليش .. سمحيلي ماقدمتليكش راسي .. سميتي أشرف
هي : متشرفين أشرف أنا سميتي سارة..
أشرف : سميتك غزالة بحالك .. تبارك الله كاتحمقي..
سارة حشمات وهبطاب راسها : شكرا
أشرف : المهم دابا واش عندك شي وقت بالعشية
سارة : عامرة من 2 تال 6 ولكن ف 4 عندي غير العربية نغيب ماشي مشكل..
أشرف : لا قرايتك هي الأولى تال غدا إلى عندك خاوي
سارة : متفهم تبارك الله عليك.. دار معاها النهار الآخر مع 4 تلاقاو وداها لواحد القهوة ماكايدخلولها غير صحاب اللعاقة .. سارة تلفات هههه نهار على نهار تا بدات كاتولفو .. كايتلاقاها وكل مرة كايتقرب منها .. فالأول ماكانتش كاتبغي.. واحد النهار كاليها أنه غايخرج من القراية وباه غايديرليه مشروع كبير وغايجمع راسو ويديها فمستقبلو.. وهاد الكذبة كانت طعم باش سارة غاتولي فريسة سهلة .. بقات كاتديرلو داكشي لي بغا .. واحد النهار كاليها تمشي معايا للدار بغات تشوفك ماما هههه .. مشات معاه سارة شافت الفيلا قدها قداش .. دخلو للفيلا...
..
..
يتبع...
.
.
.
.


قصة "دعوة مظلوم"
..
الجزء الثالث
.
.
.
.
.
.
.
سارة شافت الفيلا والديكور وتلفات .. نسات كاع علاش راها جايا لتما .. نسات أنه كاليها غايجيبها باش تشوفها ماماه .. هو تأكد أنها تلفات ونسات .. كاليها حبيبة دخلي ماتحشميش .. ديري راسك بحالا فداركم .. هي غير ساكتة وهو كايفرش الطريق بالكلام الحلو كاليها حبيبة نهار تكوني مراتي راه ماغانسكنوش هنا غانبنيو دارنا بوحدنا وتكون أحسن من هاكدا.. دخلو للبيت وبقا كايدوخها بالكلام تا طاحت بين يدو .. بدا كايدير فيها ما بغا .. ملي فاقت من أحلامها لقات الدم .. الشرف مشااا .. سكتها وركبها فالموطور وداها ومن تما ماسول عليها .. ماقدراتش تخبي كالتها لأمها والأخبار بدا كاينتاشر عرف باها بالأمر وقرر يدعي داك الولد .. كايمشي للكوميسارية كايكولولو سير بحالك واش باغي تجرجر فالحباسات واش عارف شكون راك داعي راه ولد أكبر وزير وأكبر قاضية .. كمدها فقلبك وسير بحالك .. تسدو البيبان قدامهم وماكان عليهم غير يكمدوها.. دازت مدة وهو يرجع أشرف لعادتو .. تصاحب مع بنت فنفس الليسي .. واحد النهار دايزة سارة بالصدفة شافتو مع البنت لقاتها صاحبتها .. مشات عندها من بعد .. كالتليها واش عرفتي شكون هذاك
..
يتبع...

.

.


قصة "دعوة مظلوم"
..
الجزء الرابع
.
.
.
.
.
.
.
.
كالتليها واش عرفتي شكون هذاك آ نادية نادية : آه عرفتو أشرف لي كان معاك .. ولكن أنا راه ماشي مكلخة بحالك آ سارة .. أنا ماخليتوش يحط عليا يديه حتى يجيو والديه لدارنا .. ودابا راه خاطبني وأنا خطيبتو .. وغير يقاد شي أمور دواحد المشروع غايكتبو باه فسميتو ونتزوجو .. سارة ماعرفات ماتكول ومشات .. أشرف تعكسولو والديه قبل مايخطب حيت كالولو ماشي من سهمنا ولكن قنعهم من بعد .. المهم شرا الثقة ديال نادية .. ونفس السيناريو لي وقع لسارة وقعليها .. دخلها للدار وحطملها شرفها وهي كاتشوف .. بقات كاتبكي وكاليها نوضي دابا تمشي لداركم .. من بعد ميك عليها .. نادية عاودات لأمها آش وقع وباها تا هو عرف مشاو عندهم للدار وكالو ليهم ولدكم لطخ شرف بنتنا ديرو معنا حل .. جاوبوهم واش عندكم شي دليل آ تريكة الفقراء .. شي واحد إغتصبها وباغيين تلصقو فينا .. حنا ولدنا مادار والو ويدي لالاها .. سيرو خرجو علينا وماتعاودوش تدقو فهاد الباب وجريو طوالكم .. الأسرة وقعلها نفس سيناريو أسرة سارة وبقات البنت بلا شرف.. بقا أشرف فحالتو تال واحد النهار
..
..
يتبع....
.
.
.


قصة "دعوة مظلوم"
..
الجزء الأخير
.
.
.
.
.
.
.
.
بقا أشرف على داك الحال وفالسيزيام ديالو دوبل جوج دالمرات والثالثة صافي الإدارة ماقبلاتوش .. بغا يتدخل باه ولكن أشرف نيت لقاها سبة وكاليهم باغي نخرج .. داك العام جا مع الإنتخابات .. تغير كولشي وباه مابقاش وزير .. تما فداك الوقت كانت حملة دولية فالبحث على رؤوس كبيرة ديال واحد المافيا دالمخدرات لي كان أب أشرف واحد منهم وداك الثراء الفاحش كان من فلوس المخدرات والحرام .. القضية فيها الشرطة الدولية .. سي الوزير ماغاينفعوش المعارف والفلوس ديالو .. حاول يهرب ولكن البوليس كانو دايرين حراسة مشددة على جميع المطارات .. تما لقاو عليه القبض وبدا التحقيق .. وفوسط التحقيق تجبدات مراتو .. لي لقاوها تا هي متورطة فأكبر قضايا تزوير فالمحاكم .. زورات وثائق كانت كاتثبت براءة عدة أشخاص فعدة قضايا ودخلاتهم للحبس .. وهنا حكمات عليهم المحكمة الدولية بالسجن لمدة طويلة وجرداتهم من جميع الثروات ديالهم .. أشرف لقا راسو فالزنقة وداك الثراء كامل مشا في مهب الريح .. باش غايعيش وكيغايدير يولف الأمر .. ماستوعبش حيت عمرو تعلم يعتامد على راسو ديما كايلقاها واجدة .. إذن فين غايصد .. بقا كايدور كايدور كي الهبيل وما لقا تا حل قدامو .. مشا لحدا البحر والأفكار ديالو مخربقة كان متأكد أنه مايقدرش يواجه العالم ولا يعتامد على راسو.. فكان الحل هو أنه تلاح فالبحر وانتاحر..
..
النهاية...
.
.
العبرة : البنات بقاو تعطيو قيمة لراسكم وماتغركومش المظاهر .. البنات لي مخطوبات ماتكوليش هذا خطيبي نمشي معاه فين بغيت .. راه ماحدكم مادرتو العقد دالزواج راه أي حاجة معاه حرام .. + السلطة والتسلط عمرهم كايدومو .. مهما ضحكتي على بنات الناس يجي الوقت يضحك عليك فيه الزمان .. والعيشة د الحرام ما عمرها تدوم...
..
..
.

.

.



الكاتب

إقرأ المزيد

"تعيا ماتطير غاتجيبها فالشبكة"

سلسلة "تعيا ماتطير غاتجيبها فالشبكة"
..
..
الجزء الأول
.
.
.
.
.
.
فداك العام غايبدا التغيير .. كانت فعمري 19 عام .. ساليت العام الأول فلافاك بعدما وقعلي معاهم مشكل ريفزولي عام كامل.. يحرق جد بوهم شدوني نقلت فموديل حيدولي الموديلات كاملين .. لي مانقلتش فيهم ودخلتهوم فالعادية ولكن جد بوه هذاك الموديل عقدني بقالي للراطراباج ومابقاتلي تا طريق من غير نقل نتهنى منو ولكن لي ما قنع بنص خبزة راه ماتقنعو خبزة كاملة ويا الطامع فالزيادة رد بالك من النقصان.. صافي حقدت على الوضعية وخليتهم يديرو ما بغاو لي ليها ليها.. سالا العام والناس كاتجمع حوايجها كلها غايرجع لبلادو.. أنا ماحاملش نرجع.. تفوووو ثاني غانرجع للجحيم والتمرضين دالواليد.. مشكييييلة هادي.. بقيت كالس كانهضر مع راسي.. شوف دابا آشنو غادير.. بفففف والله ماعرفت.. آش غاندير نرجع لداك الجحيم ولديك البلاد د النم لا هي لا ناسها تا حد ما فيه خير.. خاصني شي حل.. آآه تفكرت حسن المعلم دالبني نصونيلو ونبقى هنا واخا نعرف لي غانردو نحطو غا فالكراء.. المهم مانبقاش لهيه حدا الواليد.. مريض فدماغو وغايمرضني معاه.. صونيت لحسن..
حسن : آلو شكون معايا ؟؟
أنا : معاك خالد آصاحبي.. لي كان داك النهار مع سفيان ولد خالتك
حسن : آآه أهلا خووياا خالد .. توحشناك فين هاد الغيبة كانكوليك دوز للدار شي نهار غا تغدا معنا ووالو..
أنا : غا القراية زيراتنا وصافي
خالد : آه دابا ساليتو ياك ؟؟
أنا : آه سالينا وداكشي علاش عيطليك محتاجك فشي حاجة..
خالد : مرجبا تفضل ماتحشمش..
أنا : فينك أنت دابا أنا نجي عندك الهضرة ماتحلاليش هنا..
خالد : أنا دابا فالدار ولكن من هنا 10 دقايق نكون فالقهوة دالرمال لي قدام الباطيمات..
أنا : آه عرفتها هاني جاي دابا نكون تما..
شديت طاكسي وقصدت القهوة دالرمال ماكانتش بعيدة بزااف..
شديت كرسي ديالي وها هو حسن وصل..
خويا حسن صافا بيخير.. نجيك من الأخير.. أنا ماحاملش نرجع لديك الدار.. بغيتك دبر عليا فشي خدمة.. واش ماخاصكش شي خدام ؟؟
حسن : هاد الساعة ماعندي تا خدام وخاصني واحد ولكن الخدمة غانوقفها هاد السيمانة.. المادام ولدات وخاصني نبقى مقابل الدار وداك التوجاد للسبوع والتقدية راك عارف.. نهار الإثنين الجاي غانشد واحد الدار فالحدب.. الأحد بالعشية كون هنا باش الإثنين نبداو.. وهاد السيمانة سير قضيها فداركم ونتلاقاو من بعد..
فرحت بزااف حيت وقف معايا الزهر هاد المرة.. مشيت للدار لي كاريين.. كاع الدراري غايمشيو وخاصني نبقى فيها يعني خاص نهضر مع مول الدار تكون فخبارو.. وغايولي ثمن الكراء كلو علياا نخلصو بوحدي.. صافي تيسرات الأمور ومشات كيما خططليها.. جمعت الفراش على ود الغبرة والريح حيت غانغيب سيمانا جمعتهوم وحطيتهم فوق واحد السداري .. وجمعت شي جوج تبديلات فالصاك ومشيت للدار فرحان.. ولكن لي ماعندو زهر راه ماكاينش عند جد بوه .. حرييييرتي حريييرة مع الواليد....
..
يتبع....

.

.


سلسلة "تعيا ما تطير غاتجيبها فالشبكة"
..
الجزء الثاني..

.
.
.
.
.
.
.
.
.
.
.
.
.
.
.
.
.
.
رجعت للداار.. وبقيت ديك السيمانة ونهار الأحد بالعشية جيت راجع بحالي.. كالي الواليد فين غادي ؟؟
أنا : راجع بحالي الواليد..
الواليد : ياك القراية سالات صافي وكولشي رجع..
أنا : آه الواليد وأنا راجع نخدم تما راه درت مع واحد الدري باش تخدم معاه تما..
الواليد : ايييه باش تلقا مابغيت وتفلس تما..
أنا : (بصوت غير مفهوم) مال دابا هاد المرض ماعمرو يخلينا نديرو شي حاجة بالفرحة ديما خاصو ينغسها علينا..
الواليد : مالك كاتكمكم تما دابا نهرسلك فمك..
أنا : والو الواليد
الواليد : طلع جيب حوايجك وآجي هنا وخدم هنا
المهم طلعت بحالي للمدينة وماسوقتش لهضرتو حيت عارفو غا نسيفطلو الفلوس غايسكت.. الواليد مادي بكل المقاييس.. مشيت وبالليل صونيت لحسن..
آلو حسن معك خالد.. راني جيت.. شنو درنا على ود غدا ؟؟
حسن : نتلاقاو فالزنقة 9 دالحدب غدا مع 7.00 دالصباح (الحدب واحد الحي فالرشيدية)..
أنا : صافي واخا مع 7 تلقاني تما..
صبح الصباح ومشينا تلاقيت بحسن وبديت الخدمة عادي الأمور غادية مزيان.. الدار لي كنا خدامين فيها كانت الدار لي حداها فيها واحد البنت طايبة مسكينة هههه كاتقلب غير مع من .. كل مرة ها هي خارجة دايرة سبة بشي حاجة مرة تسيق العتبة .. مرة تلوح الزبل.. ومرة مرة كاتخرج للحانوت وكاتلمحلي نتبعها.. ولكن أنا كانميك ماباغيش نزرب.. حيت عاارف ولاد الحدب مراض فعقليتهم وربما كاع يكون عندها شي خوها ولا شي واحد كايجيها ونصدق فالمشاكل.. ولكن بقيت كانفكر حيت ضروري خاصني شي لعبة باش نهضر معاها.. ما يمكنش نفلتها.. هادي دجاجة بكامونها.. ومن الفوق زوينة.. وعندها ما عندها من الخيرات التضاريسية هههه ..
سالينا الخدمة وجينا غاديين بحالنا.. بغيت نسول حسن وحشمت وبقيت متردد.. حيت مازال مامضاسرش معاه.. بقيت ساكت شةيا وأنا نزعم كلتلو حسن بغيت نسولك ؟؟
حسن : وي مرحباا خاي خالد
أنا : ديك البنت لي ساكنة فالدار لي حدا الدار لي خدامين فيها كيفاش قوالبها.. شكون هاديك ؟؟
حسن : هههههههههههه
أنا : مالك كاتضحك ؟؟
حسن : هاديك راه بنت................
..
..
يتبع......

.

.

.


سلسلة "تعيا ما تطير غاتجيبها فالشبكة"
..
الجزء الثالث..
..
حسن : هاديك آصاحبي راه بنت سعاد النكافة..
أنا : واش كاتسطى عليا ؟؟ فين كانعرف شي سعاد ولا حليمة..
حسن : آصاحبي سعاد نكافة معروفة راه عليها كنا كانهضرو دبك المرة ملي جا عندي سفيان وكنتي معاه..
أنا : آه ولكن هوما ساكنين ف "تاركة" آش جابهم للحدب ؟؟
حسن : وي وي راهم غير مؤقتين تما حيت كايصلحو دارهم كاملة..
أنا : بيخير غير ماتكونش بنت الحدب باش يسهال البلان
حسن : آشمن بلان النم واش عارف باها مريض فدماغو ؟؟ راه حباس داك الزمر يشدك يخرج روحك.. القتيلة عندو كي شريب الماء..
أنا : (خلعني حسن بديك الهضرة) .. آودي دابا غا كانهضرو صافي نسى الموضوع..
حسن : تخلعتي هههههه .. شوف شي قنت بعد على داك النوع غاتجيبها فراسك..
صافي مشينا وطلعت بحالي أنا للدار دوشت ودرت كاسكروط وخرجت نتسركل شويا.. بقيت كانتجلوق كعادتي بوحدي وليزيات فودني.. تا طاح الظلام ورجعت بحالي حيت خاصني نعس باش نفيق بكري للخدمة.. تعشيت وتكيت كانفكر فشي بلان نجيب بيه ديك البنت.. ههههه ماشي كانحب لا لا ماشي دالحب أنا.. ولكن داك الخير كامل خاصني ندوق حلاوتو بأي طريقة ههههه .. صافي تكيت ودرت فيها رومانسي وكانخمم.. حيت الرومانسية هي الطريق للناموسية.. هههه .. ريحت كانخمم فالبلانات بحال إلى غانخصب اليورانيوم.. شويا داني النعاس.. تا فيقني التيليفون مع 6.30 .. فطرت ولبست حوايج تمارة.. وشديت الطريق ببيكالتي.. 7.00 كنت فالحدب .. بدينا الخدمة.. والبنت مابانتش هاد النهار بقيت غير كانتسنى تبان ولا على الأقل شي حد يبان خارج ولا داخل للدار..
بقيت كانهضر مرة مرة مع راسي.. خالد مالك جد بوك على هاد الحالة واش بنت وحدة لي كاينة راك مدوز شلا بنات.. ياكما سحراتلك فالماكلة دالبارح هههه .. ولا ياكما تلفاتك وبديت كاتحب.. وكانجاوب نفسي.. وا هاد الزين وهاد لاطاي يتلفو لي مايتلف .. صافي شويا تشغلت مع الخدمة ونسيت.. سالينا الخدمة فالعشية وتسنيتها تبان ووالو.. مشينا وخاولت ننسي حسن ومانجبدوش كاع موضوعها .. تحركنا وكيف ديما وصلت للدار دوشت وهاد النهار ماقديتش نخرج.. الخدمة كانت كثيرة اليوم وعييت.. درت كاسكروط وهبطت غير للقهوة لي حدا الدار وريحت.. جا عندي السرباي طلبت نص نص وخديت عندو المود دالويفي وكلست نتكونيكطا.. وتفكرت أن أسهل حل لديك البنت هو هاد العالم دالنم.. ولكن كيف غاندير نضبر الكونط ديالها.. وواش كاع عندها ولا لا ؟؟ وأصلا فين غانلقاها والبارح مابانتش وغبرات.. نسيت عليا داكشي ودخلت كانتكونيكطا مع الرباعة دالمنافقين.. خويا خالد غبرتي توحشناك بلا بلا بلا.. وهوما ولاد الكلاب داك النهار حد ما عقل عليا.. بقيت مريح وهازلهم هبالهم تا شفت الوقت خاصني نطلع للدار. طلعت تعشيت ونعست.. تال الصباح فالخدمة بدينا كالعادة.. تال جوايه ديك 9.00 وهو يتفتح الباب دديك الدار....
..
..
يتبع.....

.

.

.


سلسلة "تعيا تطير غاتجيبها فالشبكة"
..
..
الجزء الرابع..
.
.
.
.
.
.
.
.
فجأة تفتح الباب وخرج واحد السيد فحالة نقية.. وملامحو ماخافياش عليا .. فايتلي شايفو فشي بلاصة ولا أدري فين.. أنا خدمتي كاملة كانت براا .. وحسن خدام الداخل هذا علاش تا حاجة من هادشي ما كايلاحظها.. بقيت كانحاول نتفكر فين شفت هاد السيد ووالو ماتذكرتش.. ومايمكنش يكون باها.. حيت الأوصاف لي عطاني حسن أنه حباس وحشايشي وهذاا مااشي دبال داكشي.. صافي نسيت من بالي داكشي ورجعت للخدمة.. بديت كانغربل فالرملة حيت العجنة لي عند حسن الداخل قريب تسالي وخاصني نوجدها قبل مايكولها (وهادشي داخل فتاحراميات دتمارة باش تبين للمعلم زعما راك على بال وخدام مزيان) .. بقيت مقابل خدمتي .. تال دبك 11.00 عيطلي حسن باش نرتاحو ونقسيو شي حاجة حيت وقت الماكلة هادي.. بقيت مريح مع حسن كانهضرو.. حاولت مانجبدش كاع الموضوع.. ولكن ماقديتش نخبي.. وفلحظة سولتو ..
خاي حسن واش الدار لي حدانا ساكنين فيها ناس أخرين من غير هادوك ولا شنو ؟؟
حسن : علاش ؟؟
أنا : هههه مغربي حتى أنت فدماغك كانسولك وكاتجاوبني بسؤال.. لا غير حيت شفت واحد السيد خارج من تما.. وباينا عليه لاباس عليه نقي ولابس مزيان..
حسن : آآآه هذاك غايكون مول الدار نيت.. وراه هو عمهم هو لي عطاهم يسكنو بينما يساليو الإصلاحات فدارهم.. هذا علاش جايين هاد المسافة كاااملة من تاركة للحدب.. حيت لقاو السكنى فابور بلاش يبقاو يخسرو الفلوس عاد فالكراء.. وهذاك راه أستاذ فثانوية سيجيلماسة..
أنا : هاكداااك.. وأنا كانكول فين شفتو..
حسن : شدينا النميمة فالناس ونسينا راسنا نوض نكملو الخدمة..
نضنا من تما وخرجت أنا لبراا ندخل الطوبية حيت جات.. المهم بقيت خدام عادي.. شويا وهي تبانلي البنت جايا مع أمها.. وشويا جات من موراهم كاميون كبيرة بلاصات قدام الدار وهبطو منها شي رجال وشويا بداو كايخرجو الحوايج دالدار كايشارجيوهم فالكاميون.. تما صافي عرفت أنهم غايرجعو لدارهم.. ولكن فين الاب ؟؟ هادوك لي كايشارجيو لا علاقة لهم بصحاب الدار غا خدامين مع الشيفور دالكاميون.. بقيت كانتساءل.. وهوما كايشارجيو.. وتقريبا الوقت لي سالاو فيه ومشاو هو نفس الوقت لي سالينا فيه الخدمة.. خرجنا وطلعت للدار.. دوشت كالعادة ودرت كاسكروط وضربت دورة غا تما فالحومة .. جا الليل ودخلت تعشيت .. وتكيت وبقيت كانفكر فديك البنت دابا مشات من حدايا.. فين غانلقاها ثاني.. وكيف غاندير نطيحها... بقيت كانفكر تا داني النعاس.....
..
..
يتبع......

.

.

.


سلسلة "تعيا ماتطير غاتجيبها فالشبكة"
..
..
الجزء الخامس..
.
.
.
.
.
.
.
.
فقت فالصباح فطرت لبست حوايج الخدمة وهبطت كالعادة لمكان الخدمة.. صافي نسيت أمر ديك البنت .. حيت بحالي غير تبعد من قدام عينهم البنت غايقلبو 6 ل 9 ويشوفو قنت آخر.. شويا جا عندي حسن كاليا خالد اليوم خاصنا نزيرو شويااا حيت كايخصنا نكملو واحد البيت هاد النهار.. بمعنى تقريبا غانديرو خدمة يوماين.. وغالبا ماغانساليو تا يقرب يطيح الظلام.. كلتليه واخا.. حسن حس بيا ماعجبنيش الحال.. وشاف فيا وهو مبتسم وكالي ههه هادشي تا أنا دزت منو وحاس بيك وعارف شنو فبالك دابا.. وراه كل زيادة عندها مقابل.. كلتليه لا لا هانيا ماكايهمش المهم هو تعجبك خدمتي.. واخا أنا فرحت حيت كالي النهار غايكون طالع وكل خدمة زايدة عندها مقابل.. ولكن ضروري نكولو هانيا باش ندير بلاصتي معاه.. حيت فهاد البلاد ضروري من هاد النفاق باش تدير بلاصتك للأسف.. صافي رجع هو لخدمتو وأنا مقابل خدمتي .. فجأة كايوقف حدا الدار واحد مول الكاطكاط هبط بكوستيم وكالي السلام عليكم..
أنا : عليكم السلام..
هو : حسن كاين الداخل..
أنا : آه راه كاين..
هو : آه أنت لي خدام معاه.. أنا مول الدار آولدي.. راني ثايق فحسن وأنه مايجيب غير لي يخدم مزيان.. تهلاو فالخدمة وتقنوها.. ومن عندي مايخصكم حتى خير..
مشى دخل عند حسن وكملت أنا خدمتي.. ارتاحيت لهاد بنادم .. ماشي شي إنسان لي دافع كبير.. ظريف والتعامل ديالو رائع.. جا خارج وكالي الله يعاونك آولدي ويسهل الأمور.. ديمارا الحديدة ديالو ومشى.. جا خارج حسن عندي وكالي راه مازال غايرجع باش نرد البال.. داكشي لي كان فعلا.. جا ولكن هاد المرة الطوموبيل شفتها عامرة.. هبطو وفديك اللحظة كانشوف دوك لي هبطو وأنا نلوح البالا من يدي وسخن عليا راسي.....
..
..
يتبع....

.

.

.


سلسلة "تعيا ماتطير غاتجيبها فالشبكة"
..
..
الجزء السادس
.
.
.
.
.
.
.
.
.
هبطو من الطوموبيل 3 دالرجال هوما صحاب مول الدار.. ومنهم الأستاذ لي كان سبب فتدميري وتدمير أحلامي.. هو الأستاذ لي شدني فالإمتحانات الأخيرة د لافاك وبسببو مشالي كولشي وريفزولي كاع الموديلات.. شي حاجة سميتها العقل ولا التفكير فديك اللحظة مابقاتش عندي.. حاجة وحدة كادور فبالي هي نهز ديك البالا ونضربو بها للراس.. جا دايز حدايا وأنا نطير عليه شنقتو.. تعقل على هاد الوجه يا ولد الكلبة واش تعقل ولا داير راسك ظريف.. وسط لافاك كاديرو فيها سبوعا وهنا كاتبانو مساكن وظريفين.. ناض الصداع والغوات.. جا حسن كايجري من الداخل تفاجئ بلي واقع وهو يجي شدني وفارقنا.. وبدا كايبرد فيا.. هادوك كانو جايين باش يوريهم مول الدار الدار الجديدة ديالو.. ولكن فالبلاصة رجعو ملي توترات الأجواء.. استمرينا فالخدمة وأنا على أعصابي وحسن معصب كذلك حيت كالي واش باغي تخرج عليا.. صافي وصلات العشية باش نمشيو وهو يجي مول الدار تفاجأنا علاش جا وشنو بغا.. عيط لحسن وعيطلي وجمعنا بجوج.. كال لحسن : أنا عارفك دابا من بعد هادشي ماغاتقدرش تزعم تخلي معك هاد الدري يخدم (أنا) .. ولكن عندك تديرها.. الدري خليه معك مانبغيكش تطردو.. ومن بعد شي نهار نكلسو ونشرحلكوم وحتى أنت لي شدك فالإمتحانات غانشرحلك وتعرف حقيقة ماكاتعرفهاش.. وغدا إن شاء الله بلا ماتخدمو غير ارتاحوا..
خربقني بديك الحقيقة لي كال وشكون هي.. صافي مشينا والعشية دازت كيف ديما وهاد النهار سهرت شويا حيت ماخدامش غدا بقيت مكونيكطي وبالي غير مع لي وقع هاد النهار.. وصلات ديك 2.00 دالليل ونعست وصبحت ناعس تال واحد الوقت.. فقت هبطت للحانوت جبت البيض وماطيشة تغديت.. وأنا نبدا نخمل الدار وثبنت شي حوايج.. وتفكرت أنه اليوم الخميس وكاين السوق فتاركة وغاتكون زاهية.. ساليت شغالي ووصلات العشية وخرجت لتاركة.. والسوق د تاركة تقريبا كاع سكان تاركة غاتلقاهم خارجين تما .. بقيت كانتسركل تما.. وهي تبانلي ديك البنت مع امها.. ماخصنيش نفلتها والحل الوحيد هو نعطيها النمرة.. شديت ستيلو عند واحد الخضار تما كنت كانتقدى عندو يامات لافاك.. كتبت النمرة فورقة وتبعتها.. وصلت حداها ودرت حركة باش تشوفني وشديتلها يدها حطيتلها الورقة.. وكانكول يا ربي عنداك تغوت ونصدقو فمشاكييييل....
..
..
يتبع......

.

.

.


سلسلة "تعيا ماتطير غاتجيبها فالشبكة"
..
..
الجزء السابع..
.
.
.
.
.
.
.
.
.
فديك اللحظة أمها حسات أن شي حاجة كاينة .. ولكن بنتها خدماتها حتى هي عقل .. شدات عندي الورقة وحيدات من الطريق وكالتلي دوز آخويا على أساس أنني مع الزحام وبغيت ندوز حيت زربان.. امها صافي مادات والو فالبلان.. كلتليها شكرا آختي ومشيت.. ضربت الدورة ومشيت تقديت شي خضرة وطلعت للدار وكانتسناها فوقاش تتاصل.. بقيت تال الليل وماصوناتش ولكن سيفطات ميساج .. طزززز تريكة 5 دراهم 50 ميساج .. كالتلي سلام أنا فلانة .. شديت معها الستون.. كالتلي سميتها نادية.. وكلتليها سميتي خالد
أنا كان لازمني نخربقلها الإستراتيجي حيت أي بنت عرفتها ما عمري عطيتها راس الخيط على حياتي كانخربقهم فدماغهم ماكايفهمو والو..
نادية : إوا آخالد شنو كادير فحياتك.. واش كاتخدم فالبناء ولا شنو..
أنا : لا لا كانخدم غير فالصيف باش نجمع مصروف للعام الدراسي.. أنا عندي الماستر هاد العام .. (وااا نمي انت إس 2 ماعندكش عاد 20 عام وعندك الماستر انت شاد الإجازة فالإمتحان دالإعدادي مثلا .. هههه كون سولاتك دابا على شي بلان تحصل) .. ولكن طلعات ماكاتعرف تا زفتة فدوك البلانات وحتى قلدتي ماكانتش تبان فيا 20 .. صحتي كات هازاني .. ما سولاتني تا على آشمن تخصص..
نادية : آه مزيان.. وآشنو ناوي دير من بعد ما تسالي..
أنا : يالاه خديت الإجازة دابا ودفعت للماستر وغانقرا فيه عاماين.. تما أقل حاجة كاع راه نولي أستاذ نيشان بلا امتحان بلا والو (هههههههههه بلا إمتحان غير كاين العصى قدام البرلمان هههه)
البنت سمعات هاد البلان وهي صافي تطج وطااحت بالمزيان..
نادية : آه آه تبارك الله عليك الله يوفقك..
أنا : آمين..وأنت شنو كاديري ؟؟
نادية : غانقرا العام الجاي فالباك.. علوم فيزيك..
أنا : آه بالتوفيق ليك..
نادية : أنت فين ساكن بالضبط
أنا : (هااا حنا بدينا فالأسئلة لي ماكانحملش).. آه انا ساكن فعين العاطي..
نادية : مزيان.. أنا فتاركة..
أنا (أوووف بيخير ماكثراتش الأسئلة) .. بصراحة انا ماعنديش مع البنات آ نادية وكولشي كايكول عليا معقد ولكن أنت بصراحة حالة استثنائية.. دخلتي للخاطر.. وملي تحولنو داك النهار بقا فيا الحال حيت ماغاديش نعاود نشوفك.. ولكن الصدف ثاني جمعاتنا فالسوق.. وماتصوريش فرحتي دابا وأنا كانهضر معاك (تسخينات ما قبل الدخول فالصح ههههه)
نادية : ربي يخليك.. تا انت كون ما شفتك ظريف وولد الناس ما نشدش عندك النمرة..
أنا : (ممممم معايا أنا ماخدامينش هاد القوالب دالبنات).. الله يجيبنا فالصواب
نادية : آمين..
أنا : إوا آنادية إمتا يكون عندك شي وقت نتلاقاو ؟؟
..
..
يتبع.......

.

.

.


سلسلة "تعيا ما تطير غاتجيبها فالشبكة"
..
..
الجزء الثامن
.
.
.
.
.
.
.
.
نادية : بصراحة والله ماكرهت ولكن راك عارف دابا العطلة وماكاينة تا حاجة ندير بها السبة.. ولكن غانلقى فرصة فأقرب وقت..
أنا عرفت البنت سمعات ماستر وأستاذ تلفات
أنا : واخا.. يالاه نخليك دابا راه خاصني نعس..
نادية : صافي بعدا سخيتي
أنا : (آتريكة 5 دراهم راه غاتسالالك ديك 50 ميساج وماتلقاي باش تهضري غدا) .. لا لا ماسخيتش غا خاصني غدا نوض بكري وصافي..
نادية : واخا يالاه تصبح على خير..
نعست وصافي خوبتها من بالي حيت صافي عرفتها دتبا طاحت والصنارة شدات فيها وهي غاتولي تجري مورايا.. نعست وفالصباح فقت فطرت وشديت الطريق للخدمة.. بدينا الخدمة وحسن باقي مقلق من جيهتي.. وفقط باقي مخدمني غير حيت مول الدار طلبها منو.. داز النهار ممل.. حسن ماكايهضرش معايا نهائيا.. فقط إلى بغا شي حاجة كايطلبني نخدمها ويسكت.. بقيت خدام تا وصلات وقت الماكلة وريحت حداه وهو ساكت..
أنا : حسن عارفك مقلق ولكن أنا شنو ذنبي.. دير راسك فبلاصتي.. أنا ماعنديش لمن نمشي وماكانعرف حد يخدمني من غيرك وراني خدمت معاك وراك شفت خدمتي.. أنا ماقصدتش نخسر صورتك أنت.. ولكن خاصك تعرف علاش درت هاكداك.. راك غاتكون بحالي ونفسك حااررة.. عاودتلو البلان كامل..
حسن : بفففففف وعلاش زعما يخسرو ولاد الشعب هاكدا ؟؟
أنا : ماعرفتش.. عند بالهم هوما لي الطوب وحنا كايحسبونا حشرات لا غير..
حسن : صافي ماديرش فبالك وسمحليا.. ومرة أخرى ضبط أعصابك..
أنا : صافي سامحتني ؟؟
حسن : آه صافي والغلط وسوء التفاهم كايوقع عادي هادشي..
فرحت ملي صفيت الخاطر مع حسن.. سدينا الجوع .. ومشينا نكملو الخدمة .. مشات الأمور عادي تا قريب نساليو كانغسلو الماطريال من السيما باش نخرجو .. ها هو مول الدار كايوقف علينا.. كالينا صافي ساليتو.. خالد أنت ملي تجي خارج ويالاه معايا..
سالينا وشد حسن الطريق لدارهم ومشيت أنا مع مول الدار فالطوموبيل.. وكالي واش باغي تعرف علاش دتك الاستاذ دار معاك هاكداك ؟؟
أنا : ماعرفتش واخا حزرتو ورغبتو ووالو ماكانش يسمعني..
مول الدار : دابا غاديرني بحال شي صاحبك مضاسر معاه.. وأنا غانصحك نصيحة لوجه الله.. حيت قصتك فلافاك ولكن ماكنتش عارف شكون هاد الدري وماعرفتك واش انت تال داك النهار فاش جا وتشانقتي معاه .. حيت الأستاذ صاحبي وكايعاودلي..
أنا غانكولك علاش دار معاك هاكداك.. ولكن غاتنسى الموضوع وتحاول تاخد منو عبرة باش مايتعاودش....
..
..
يتبع.....

.

.

.


سلسلة "تعيا ما تطير غاتجيبها فالشبكة"
..
..
الجزء التاسع
.
.
.
.
.
.
.
.
أنا : أكيد.. وراه هادي هي الحياة خاصنا نستافدو من الأخطاء..
مول الداار : هااا أنت برافو عليك دابا عجبتيني.. تعرف سلمى
أنا : شكون سلمى ؟؟
مول الدار : غاتفكر شي سلمى عرفتيها وغير هضر معايا ماتحشمش حسبني صاحبك
أنا : آه سلمى بنت كنت مرتابط معاها فالدورة الأولى وصافي تفارقنا..
مول الدار : هاديك راها بنت داك الأستاذ.. هو صاحبي وشخصيتو ضعيفة وغير كاينتاقم ويضرب فالظهر.. أنت دوزتي مع سلمى العجب العجاب ودخلتيها للدار شحال من مرة ومارستي معها.. وهادشي كولو واحد الدري هو لي مشى عاودو لباها.. ولكن هي نكراات بلي أصلا ماكاتعرفكش وعمرها تصاحبات.. ولكن باها ماتسرطاتلوش وعرف بلي فعلا كانت بينكم شي حاجة.. ومن تما ماحملكش .. وبما أنه ماكابنش منين يدوزلك حيت واخا يبغي كاع يدعيك ماعندو تا حجة وبنتو ناكرة إذن بقالو حل واحد هو ينتاقم.. إلى لاحظتي أنه فالدورة العادية كان ديما حاضيكم فجميع الموديلات.. ولكن انت أكيد ماغاتردش البال حيت دوك الموديلات كنتي موجدلهم وحادر على ورقتك .. كان كايتسناك فقط دير حركة بسيطة ولكن فشلاتلو الخطة حيت انت حدرتي على ورقتك وساليتي وخرجتي بحالك.. فالراطراباج كان عارفك داك الموديل مشكلك عقدة وغادير أي طريقة باش تفاليديه.. وهنا وقعات الواقعة..
دابا ماتجاوبني ما والو أنا غا كلتليك باش تفهم وماتحاول دير والو حيت غاتجيبها غير فراسك.. سير دابا خود عبرة من هادشي وديها فقرايتك..
مشيت بحالي وبالي تخربق بديك الهضرة لي كالي.. بقيت كانفكر فداك الكلب د مراد لي كان زعما صاحبي ولاش زعما دار هادشي.. واخا ما صورو مني والو.. واخا العام ضاع هانيا.. فكرت فديك الهضرة ديال راك غاتجيبها فراسك وميكت وحاولت ننسى لي وقع.. طلعت للدار ونسيت ديك الهضرة بعدما عرفت أنه واخا ضاع عام ولكن تأكدت من حاجة وحدة عمرك تعاود لصاحبك على علاقتك مع بنت مهما كان قريب ليك.. دخلت دوشت وتفكرت التيليفون حيت كانخليه فالدار.. مشيت هزيتو وأنا نلقا بزاااف د الإتصالات برقم مجهول وجوج ميساجات ديال نادية صافي عرفتها تا هي من دوك لي كايصونيو من تيليفون دارهم بلانكوني.. قريت الميساج وكالتلي بالليل نتسناك نهضرو بغيت نكوليك شي حاجة....
..
..
يتبع.....

.

.

.


سلسلة "تعيا ماتطير غاتجيبها فالشبكة"
..
..
الجزء 10
.
.
.
.
.
.
.
.
.
وصل الليل وفيبيت عليها.. وهي تسيفط ميساج..
نادية : على سلامتك.. كيف داز نهارك
أنا : لاباس الحمد لله غير فالخدمة وأنت ؟
نادية : غير مع الشقا دالدار أو صافي راك عارف اليوم الجمعة كايخص نساليو الشغل بكري قبل الصلاة..
أنا : آآه مزيان الله يعاونك
نادية : كولي واش غدا مسالي ؟؟
أنا : آه غدا السبت غانخدمو غا نص نهار.. غانساليو ف 12..
نادية : ماما غدا غاتسافر للبلاد عند خالتي عندها السبوع وغاتبقى تما النهار كامل وربما غاتبات.. وهادي هي الفرصة باش نشوفك.. غدا مع 16.00 نتشافو
أنا : أوكي الزين فرحتيني.. والله متشوق باش نشوفك ونكلس معاك..
نادية : حتى انا فرحانة..
أنا : وفين نشوفك ؟؟
نادية : نتشاوفو فالمنتزه..
أنا : آآه صافي واخا..
دازت الليلة وصبح الصباح وخدمنا داك الصباح.. عاودت لحسن البلان لي كالي مول الدار وبدا كايضحاااك .. وكالي تا أنت مسخوووط مخربقلو بنتو وبغيتو مسكين مايديرش هاكداك.. ولكن غايبقى غير حمار وخوااف .. أنت انتصرتي عليه حيت ماقدش يواجهك..
هضرة حسن زعما رفعاتلي المعنويات ههههه .. سالينا الخدمة ورجعت للدار وكانتسنى 4 توصل.. ستيكيت على الحالة وتهليت فراسي.. ووصل الوقت ومشيت للمنتزه.. بقيت كانتسنى وها هي نادية جاية مهلية فحالتها .. بشاااااخ كاع هذا زهر عندك آخالد.. هادشي كامل طاح فيك.. حسيت براسي فديك اللحظة أنا هو طوم كروز هههه .. ولكن راه القضية فيها ماستر وأستاذ كايدخل بالسلم 11 ومليون فالشهر....
جات سلمت عليها ومشينا ريحنا تحت واحد الشجرة..
أنا : عرفتي آنادية مامتيقش راسي
نادية : علاش
أنا : ماكنتش كانظن أنت بهاد الجمال.. حيت ماعمري حققت فيك مزيان فدوك الأيام.. كانشكر الصدفة لي لاقاتني بيك.. وإن شاء الله نتفاهمو فكولشي..
نادية : دارت راسها حشمات وكالتلي شكرا
أنا : وايلي على شكرا.. دابا صافي حيدي هاد الرسميات.. أنت راكي غاتولي جزء مني ماتحشميش مني.. واخا بصراحة هاد الحشومية زادت زيناتك وهاد الإبتسامة عندك كاتحمق.. الله يدومها نبقى نشوفها ديما فوجهك ونرتاح..
نادية : ههه واخا صافي..
قربت حداها وحطيت يدي فوق كتافها وماظارت تا ردات فعل صافي بقيت شادها شويا ضميتها لعندي وأنا نبوسها.....
..
..
يتبع.....

.

.

.


الجزء 11
.
.
.
.
.
.
.
.
.
.
.
كرهات داك التصرف وحيدات يدي من فوق كتفها وبدات كاتغوت .. وأنا بقيت ساكت بيني وبين راسي كلتليها هههه دايرة فيها عفيفة.. غا صبري مازال الأيام توريك.. خليتها شويا تا سكتات وكلتليها.. نادية سمحيلي والله ماقصدت شي حاجة خايبة.. ولكن راه بصراحة تا واحد مايقدر يتمالك نفسو وهاد الجمال كامل قدامو.. راه غير لي عندو شي مرض لي مايحركوش هاد الزين كامل.. وراه أنا ماقصدتش زعما نآديك.. كنت باغي نعبرلبك على إعجابي ببوسة فقط.. ياك الدراري الصغار ملي كايعجبونا كانمشيو نبوسهم.. واش كانديو فيها شي نوايا خايبة.. بالعكس كايعجبونا وكانبوسوهم ونعبرولهم على الحنان..
نادية : آهااه دابا أنا رديتيني بنت صغيورة..
أنا : وااايلي حتى أنت زعما راكي بعقلك وماخاصكش تفهميني بالمقلوب.. أنا قصدت زعما أنني مانويت فيها والو.. وا صافي دابا حيدي ديك التغوبيشة والله ماجاية معاك.. وأنا كانواعدك آخر مرة نتصرف هاكدا.. يالاه صافي وريني ديك الضحيكة الغزالة ديالك..
نادية : أوووف ماكانبغيش نتعصب ولكن أنت مادرتي فيها مايصلاح..
أنا : آه عارف ولكن صافي ماعمري نعاود.. ماتخليش إوا أول لقاء ديالنا يدوز خايب وأنت عارفة راه العطلة وشوف واش باقي غانعاودو نتلاقاو ولا لا.. أنا عارفك كاتقنطي فالدار وهاد النهار خرجتي خاصك يدوز زوين.. يالاه صافي ماتعصبيش..
نادية : آه عندك الحق..
بقيت كانتعنب عليها وكانصبغ فيها بالكلام المعسول .. باش غانسيفطها فرحانة لدارهم.. حيت عارف البنت غير نسيفطها فرحانة غاتقلب على أي فرصة أخرى باش تلاقاني.. وصل الوقت وخاصنا نرجعو.. صافي وصلنا الباب د المنتزه وكلتليها نادية ماخاصناش دابا نمشيو بجوج راكي عارفة الحضايا كثار ويقدرو يوصلوها لماماك..
نادية : آه عندك الحق.. والله أنت مختلف على كاع الدراري.. ماشي أناني..
أنا : (هههه دابا نوريك ماشي أناني) .. أنت كاتهميني دابا أكثر من راسي..
..
مشات نادية وأنا بعد الستون البسيط لي وقع معها ومع عندي جسد شاااعل غير حاجة بسيطة توقع صافي كانشعل وخاصني نماارس.. بقيت كانفكر وماجاتني غير "تنغير" فراسي .. خاصني نمشي لأقدار (أقدار هي دار الدعارة فتنغير.. ولكن حاليا مابقاش.. حيدوه قبل سنوات قليلة) فيها بنات صفيرات فالسن ماشي بحال ديور الدعارة الأخرين لي فيهم غا الشارفات.. بقيت كانفكر كيفاش غاندير نمشي والخدمة كي نديرلها....
..
..
يتبع......


الجزء 12
.
.
.
.
.
.
.
.
.
.
.
.
.
فجأة تفكرت أنه غدا الأحد ماكانخدموش.. بشااااخ الحاجة ديال الحرام وكاتسرحلها الطريق.. كون نويت دابا شي حاجة زوينة كون راه مالقيتلها حل أو عكزت عليها.. الشيطان ولد الحرااام.. مشيت طلعت للدار وداير فبالي غدا نهبط لتنغير.. دازت الليلة وفالصباح قصدت المحطة.. كاتكون غادي ومخلوغ هههه .. وكاتكول دابا إلى تقلب هاد الكار باش غانمشي أنا.. كنت غادي نفسد.. واخا داك شوي دالتفكير ولكن الشيطان والشهوة دبالك دغيا كاتنسيك.. الكار غادي وحيت تنغير مابعيداش بزااف وصلت ديك 10 تما.. بقيت كانتسركل تما.. وأنا نتلاقا بواحد الدري قرا معايا فلافاك.. وبما أنه عارف الغرض علاش جيت.. شد فيا شدا خايبة ههه .. كالي ملي تسالي دوز للدار تدوش آصاحبي راه نخاف عليك يتقلب الكار وتطلع روحك وأنت على جنابة.. شديت معاه الهضرة شويا ومشا لدارهم.. بقيت كانخربق فالزناقي تا بديت كانشوف بنادم دخلو حيت وقت الغداء وصلات.. تما مشيت دخلت ل "أقدار" ها وحدة كاتطل من الفوق ومسيفطة السطيلة لمول كلينيكس هههه كاتحطلو الفلوس وكايحطلها كلينيكس وكاتجرو بحال شي دلو من شي بير .. وداك العالم ديال دور الدعارة راكم عارفين كيداير.. دخلت لعند وحدة يا حسرتي على الحياة.. كانت زوينة لدرجة لا تصور.. صافي قضيت الغرض وخويت الحمولة ههههه.. خرجت وضربت دورة ولكن نفسي الضعيفة ماقنعهاش داكشي .. رجعت للمكان الخبيث.. دخلت عند وحدة .. كالتلي 50 درهم.. كلتليها واش بيخير.. ماحسابليكش جاي من جنوب إفريقيا.. راه كون هادو لي دزت عليهم هنا كون ولدو مني راه يولدو قدك.. هاكي 20 درهم وتلاحي.. ساليت وداز داك النهار مخربق.. أصلا طريق العاهرات ماكاتخرجش..
رجعت بحالي بالليل وصلت قصدت الحمام نيشان.. جيت داخل وهو يكولي مول الحمام راه قريب نسدو آخويا..
أنا : غير دوش خفيف آخويا ماغانتعطلش..
شفت فيه حابس الضحكة حيت عارف آش واقع.. بالكشايف باش دوشت وارتاحيت من الوسخ دهادوك المرض.. مشيت للدار مافكرت لا فعشا لا والو.. النعاس هو لي مسيطر على دماغي.. طحت خشبة تال الصباح بدا يصوني التيليفون.. فقت وأنا نتفكر أنني ماجبتش فطوري بالليل.. وإلى خرجت نجيبو وعاد نرجع ونطيبو غانتعطل.. سمحت فالفطور ومشيت للخدمة.. داز النهار عادي بحال كاع الأيام.. فالعشية كيف ديما من مور ماكاندوش وندير كاسكروط كانخرج ندور شويا.. خرجت وأنا نصادف نادية وأمها.. شافتني وهي تكول لأمها شي حاجة وشافو فيا بجوج..
يا ويحتااااه آش هادشي..
..
..
يتبع.....

.

.

.


الجزء 13
.
.
.
.
.
.
.
.
.
.
.
.
أنا صافي خربقاتني بداك التصرف هربت من داك القنت مابقيتش كانبان فيه.. تلاحيت للدار بالليل وأنا نسيفطلها ميساج.. آجي أنت آش داك البلان درتي فالعشية ؟؟ واش مريضة فدماغك ؟؟
نادية : لا.. ماما راها بمثابة صاحبتي وكانتعاودو أنا وياها كولشي ماكانخبي عليها والو.. وراه عاودتلها عليك..
أنا : (موووشكييلة هادي) وشنو عاودتيلها عليا والواليد ديالك توصلو الأخبار ؟؟
نادية : عاد دابا جاك تفكر بابا.. علاش ماعمرك سولتيني عليه فين هو وشنو كايدير...
أنا : غا ماجابتهاش الوقت أوصافي.. جاوبيني..
نادية : بابا راه فالحبس محكوم بعام بسبب الحشيش.. تا خرج آخر مرة وكلنا راه دار عقلو .. ومشا خدم شيفور فواحد الشركة وتما قبطوه كايدي الحشيش فالكاميون دالشركة..
أنا : آه الله يطلق سراحو.. بصراحة آنادية راه ماكانش عليك تعاودي لماماك .. مازال حنا عاد بدينا..
نادية : ماتخافش ماما راه كما كلتليك كاتعاملني صاحبتها ماشي بنتها.. وفرحات ملي كلتليها مستواك الدراسي وبلي قريب تخرج وتولي أستاذ..
أنا : (إييه يا بنات الكلاب لو عرفتي حقيقتي كاع ماتلصقيني هاكدا) إن شاء الله..
ساليت معها الهضرة ومشيت ريحت كانخمم فهاد الحريرة كيفاش نفكها ماحدها ماتخوضات بالمعقول.. بقيت كامهضر مع راسي وكانكول.. باها فالحبس وعاد كي دخل يعني باقيلو وقت طويل.. امها عارفاني دابا أنا مخربقلهم الإستراتيجي وعاطيهم معلومات خاطئة.. لاقيت هاد الأفكار كاملين وهي طيح عليا فكرة ماطيحش على الشيطان....
..
..
يتبع.....

.

.


الجزء 14
.
.
.
.
.
.
.
.
.
.
.
.
.
.
صافي نعست كالعادة وكانتسنى غدا يوصل نسالي الخدمة باش فالليل نهضر مع نادية ونبدا فتطبيق الخطة.. وصل الليل ودخلت وبديت كانتميساجا معاها.. سلام سلام لاباس كيداز نهارك والبدايات الروتينية العادية.. ومن بعد كلتليها نادية بغيت نكوليك واحد الحاجة..
نادية : آآه ها أنا كانسمعك..
أنا : نادية أنت من الأول عجبتيني ومابغيتش نفرط فيك وأنا ماشي بحال كاع الدراري مابغيتش نتفلا عليك أنا بغيت معك المعقول.. لهذا قررت نجي نشوف ماماك نهضر معها..
نادية : شنو تكوليها ؟؟
أنا : نتعاود أنا وياها النكت.. وا غانهضرلها عليك.. باش نخطبك من عندها وإلى تفاهمنا واتافقنا من بعد نديرو خطبة رسمية باش تكوني ليا وماتعطيك لحتى واحد حتى دوز هاد عاماين ونتخرج ونجي نديك
نادية : عرفتي مامصدقاااش هادشي.. كنت خايفة تكون غا كاتفلا.. ولكن طلعتي ولد الناس الله يعمرها دار..
أنا : (دابا تشوفي ولد الناس بتقنية HD) أنا بغيتك ليا ولحياتي كاملة وتكوني أم ولادي..
نادية : حتى أنا
أنا : فوقاش تهضري مع ماماك تكوليلها بلي غانجي.. وكوليلها من الأفضل نهار الأحد الجاي تما ماكانخدمش..
نادية : واخا الصباح ونهضر معها..
أنا : أوكي يالاه بونوي تصبحي على خير غدا خدام..
نادية : بونوي..
صبح الصباح وداز كيف ديما.. بالليل ثاني وهي تهضر معايا نادية كالتلي راه كلتها لماما وماتصورش شحال فرحات وكالتلي هذا هو الراجل لي ماعقليتوش موسخة ويتفلا.. وكالتلي صافي نهار الأحد تتسناك.. دازت ديك الأيام بسرعة البرق.. الشيطان ولد الحرام.. وصل نهار الأحد.. لبست مزيان ورشيت ريحة والأناقة والتأنتيكة.. قصدت الدار وهي تحللي نادية وكالتلي دخل مرحبا بيك....
..
..
يتبع......

.

.

.


الجزء 15
.
.
.
.
.
.
.
.
.
.
.
.
دخلت لقيت أم نادية كالسة ريحت تا أنا بدات كاتخوي أتاي كلتليها والله آخالتي ماكانشربو (هاي هاي جيتو تال غابة فليو وكاتشكاو بالرواح) ماكليت ولا شربت تا حاجة من عندهم..
أنا : خالتي ندخلو نيشان فالموضوع.. أنا شفت بنتك وعجباتني.. وأنا مابغيتش نتفلا.. دابا جيت نطلب يدها من عندك باش إلى تفاهمنا غير تسالي العطلة ونسالي الخدمة ونمشي للبلاد نجيب والديا ونديرو خطبة رسمية..
أم نادية : ولدي شنو غانكولك تا واحد ماكره الحلال.. إلى تفاهمنو بجوج مانزيدكم غير الخير..
أنا : حنا مفاهمين وبنتك غاتولي تعيش فجنة معايا وملي نتوظف غانتهلا فيها ونديرها فعينيا
أم نادية : لهلا يحشمنا آولدي..
خرجت من الدار فرحاان نادية خرجات معايا لقدام الباب عند بالها أنا فرحان بالخطبة.. ولكن أنا فرحان لما هو قادم.. نادية غاتولي تخرج معايا بحرية.. فعلا داكشي لي كان وليت الوقت لي نبغيها كاتخرج معايا.. دازت الأيام على داك الشكل واحد النهار ماماها غاتسافر ثاني لواحد العرس حيت بحكم أنها نكافة معروفة ومشهورة كايعيطولها حتى المدن المجاورة.. غاتمشي تدوز تما يوماين.. خرجت مع نادية فديك العشية.. وبقيت كانلعبلها على عقلها حتى قنعتها تمشي تبات معايا فالدار.. مشينا دخلنا ودخلتها تعشينا وبقينا كانهضرو وكانصبغ فيها بالكلام الحلو تا سهات البنت وتخيلات نفسها بطلة من بطلات الأفلام التركية .. شديتها وعنقتها وبقيت كاندوز يدي على خدها وكانكولها أنت آنادية أجمل بنت شفتها فحياتي.. كنت كانظن قلبي قاسح ولكن أنت ديتيه ووليت كانبغيك.. شافت فيا وهي تكولي حتى أنا كانبغيك.. فديك اللحظة قربتها لعندي وبستها ففمها وبقينا فالقبل الحميمية تا صافي البنت مشاات لعالم آخر تما بديت كانحيدلها فحوايجها هزيتها لفوق الفراش وأنا مستمتع بدوك اللحظات.. حتى ساليت.. فاقت من الغيبوبة دالشهوة وهي تشوف راسها تقبات تخلعات ولكن ثبتها وكلتليها هذا عربون باش أنني راه ماغانخليكش وأنت ديالي ماتخافيش.. وماتكولي لماماك والو واخا ؟؟؟
..
..
يتبع......

.

.

.


الجزء 16
.
.
.
.
.
.
.
.
.
.
.
.
.
.
كالتلي صافي واخا.. صبح الصباح فيقتها دخلتها دوشات وسيفطها لدارهم.. كانت باقية شي 20 يوم للقراية.. فهاد 20 يوم دخلتها 3 مرات أيضا ودوزنا ليلة حميمية.. وصلات القراية حبست الخدمة مع حسن.. خلصني فداكشي لي بقالي وأنا نطلع فالنهار الآخر للافاك درت إعادة التسجيل وأنا نجمع حوايجي وغبرت من البلاد بدلت النمرة وغبرت كولشي .. مشيت نيشان لوجدة.. خليتها تما ماعرفت شنو تكون دارت تا إلى بغات ديكلاري ماعندها تا معلومة كولشي عطيتولها غالط وحتى التصاور ماخليتلها تا صورة.. بقى غير حسن كايوصلي الأخبار والجديد.. حيت الأم ديالو كاتعرف أم نادية مزيان.. تال واحد النهار كالي حسن بلي راه باها خرج من الحبس..
أنا بردلي الما فالركابي.. كلتلو أواااه ياك مازال ماكمل عام ؟؟
حسن : وي ولكن دارو محامي وشي تخربيق وعاود ردولهم الحكم غير 4 أشهر.. دوزت واحد 15 يوم كلها مخلوع ومن حسن حظي أنه نهار كانو حدانا فالخدمة ماكانوش عارفين أن حسن هو لي كنت خدام معاه.. دازت 15 يوم وهو يكولي حسن أنهم غايخرجو من هاد البلاد.. باها لقا شي خدمة فشي شركة كبيرة فطنجة غايكون شيفور بحكم تجربتو وواخا مدوز الحبس قرروا يثيقو فيه.. فرحت حيت غايغبرو من تما.. أنا قرايتي نسيتها وبقيت عاطيها غا للصداع والمشاكل والبنات.. ضبرت خدمة فوجدة شديت فيها الستون تال وصلو الإمتحانات فلافاك وقررت نرجع ندوز....
..
..
يتبع......

.

.

.


الجزء 17
.
.
.
.
.
.
.
.
.
.
.
.
.
.
.
رجعت وبداو الإمتحانات كاندخل ماكاندير والو كانشوف الورقة وكانتسنى الوقت يسالي كانسني ونخرج.. صافي كانشوف عام آخر غايمشي من حياتي غير فالخوا الخاوي.. قررت نبقى غير هنا وكنت جامع صرف كثير يكفيني هادشي لي بقا نكري بيت صغير مع الطلبة بثمن مناسب ونريح.. فعلا داكشي لي درت بقيت غا هنا وعاطيها غا النعاس والسهير بالليل.. الدراري كايفيقو الصباح يمشيو يقراو وأنا غير النعاس .. لافاك ماكانشوفهاش .. غا السهير والشاط فالفايسبوك ومامسوقش العالم .. واحد النهار خارج كاننسركل وأنا نتلاقا بحسن.. لقيتو وكالي يالاه تحرك معايا بدينا كانهضرو وكالي راه نادية تزوجات.. خربقلي دماغي وفنفس الوقت فرحت حيت كابوس كان مارضني فحياتي.. كلتلو واايلي وشكون داها ؟؟
حسن : شي واحد خدام مع باها تما..
أنا : آه مزيان واش مافخباركش آش وقعلي معها ،؟
حسن : عااارف كنتي مصاحب معها..
هنا الفيزيبلات دعقلي تخربقو حسن ماعارف والو ؟؟ يعني ماداروش ضجة على لي وقع.. يا إما غاتكون سكتات يا إما كالتها لامها وسكتو وباها ماوصلو والو .. صافي هنا تأكدت أنني أنا لي طحت فالشبكة وبلي هي طلعاتلها .. ها هي تزوجات وأنا بديت كانقز وضيعت عاماين من حياتي بلا فائدة.. دازت ديك الدورة بنفسية مقتولة.. غير كاره حياتي ومدمر وماحاملش راسي.. كانحاول نرجع نقراا ووالو كانشوف داكشي غا تخربيق ونلوحو ونعطيها للنعاس.. فآخر داك العام كنت مكونيكطي وهي تبانلي واحد البنت دخلت لقيتها بنت الرشيدية ودايرة أنها كاتقرا ف ISTA آجوطيتها....
..
..
يتبع......

.

.

.


الجزء 18
.
.
.
.
.
.
.
.
.
.
.
.
.
.
.
بقيت كانهضر معها سلام سلام سميتك ؟؟ زينب وأنت أنا خالد كانقرا فلافاك وأنت ؟
زينب : ليسطيا
أنا : آآه مزيان الله يوفقك..
دازت الهضرة ديالي معها عادي وماتعمقناش فالتعارف سالا العام قررت صافي نحيد مني هاد العقلية المريضة.. نتلاح تا أنا للدار ونبقى مع خوتي وولاد حومتي مانبقاش غير هارب.. فعلا مشيت والأمور ولات غادية بخير هي هاديك.. وبقيت كانشاطي مرة مرة مع زينب.. كانت بنت ضحوكية وماتشوفش منها العيب.. كانهضرو غا مرة مرة.. شويا شويا تا ولات هضرتنا بشكل مستمر.. أنا خويت عقلي من داكشي دالتصاحيب والبلانات الخاوية.. زينب ولات عزيزة عليا وتمنيت شي نهار نشوفها.. وكلتهاليها واحد النهار وكالتلي صافي حتى تجي إن شاء الله ونتشاوفو.. زينب ولات أعز صديقة عندي مايمكنش مانعاودلهاش على راسي ومشاكلي.. داك خالد لي كان كايضحك ويتفلا على البنات مابقاش.. ولا إنسان آخر.. موقر الناس وماكايجبد حد.. داز الصيف ووصلات وقت القراية.. درت فبالي خاصني نطلع ونجمع راسي ونخطي عليا التفلية.. فعلا بديت العام مزياان كانحضر وكانديها فدروسي وديما كاتلقاني بوحدي وخاطيني بنادم.. كولشي مايكول معقد مريض نفساني.. ماشي إجتماعي.... واحد الليلة مكونيكطي مع زينب وكالتلي خالد غدا غانطلع لافاك غانكون تما فالمكتبة دلافاك إلى بغيتي نتشاوفو.. كلتليها واخا صافي.. صبح الصباح مشيت تلاقيت زينب.. يا سلام على شخصية عندها عاملاتني كأنها ماشي أول مرة نتلاقاها.. ضحوكية وشعبية.. زينب زادت دخلات لخاطري وزادت عزازت عليا بزااف....
..
..
يتبع....

.

.


الجزء 19
.
.
.
.
.
.
.
.
.
.
.
.
.
.
ماريحتش معاها بزااف .. بقينا غير واقفين شويا تا تعارفنا ومشات دخلات ومشيت أنا بحالي.. بقات علاقتي مع زينب على داك الشكل.. أنا حيدت ديك العقلية الخبيثة لي كانت عندي.. زينب ماكذبت عليها فحتى حاجة حيت مابقات نيني فحتى حاجة خايبة مابقيتش هارب من واقعي.. دازت الأيام كبرات علاقتي مع زينب ولات أختي لي ماولداتهاش أمي.. كانعاودلها كولشي وكاتعرف عليا كولشي.. داز داك الصيف والحياة ظلامت عليا ثاني.. كانشوف عاماين من حياتي ضاعت فالخاوي وغير فالبنات والتفلية والضحك خسرت بزااف دالحوايج ومشات من قدامي بزااف فرص باش نشد فمستقبلي.. والواليد دائما النكير صباح وعشية صباح وعشية داز الصيف أسود تال بداية الموسم الدراسي الجديد بقيت كانجمع حوايجي باش نرجع وهو يندمني الواليد ديك الليلة على الحياة ومايجي منها.. تمنيت لو أنني ماخلاقيتش فهاد الحياة لي ولات كولها ماديات وحتى حب والديك لازمو الفلوس باش تحصل عليه.. بقى عليا واش ولد فلان وصل وأنت باقي مقابل هاد القراية.. واش ولد فلان فعل وراه خدام وأنت باقي هنا..... شبع فيا هضرة.. حتى مشى كملت الجميع لحوايجي وبقيت متكي فالبيت كل ما سمعت داك المعيور كلما دموعي كايهبطو بغزارة وحرقة شديدة.. كانخمم وكانكول علاش الحياة دايرة هاكدا.. واش المادة والفلوس هما كولشي فالحياة.. كيفاش غانربح فحياتي ويسهل عليا الله فقرايتي ولي والدني ماقادر يكولي حتى سير الله يسهل عليك آولدي.. يمتعني غير بالكلام الزوين ويخليني أنا نواجه مصيري.. مابغيت والو فقط يكون معايا بتعامل زوين.. ولكن عرفت أن حتى حاجة من هادشي ماغادية تكون إلى ماكانوش الفلوس.. الصباح فقت وأنا نصوني لصاحبي سعيد (ماعاودتلكومش عليه فالقصة حيت خليتها تمشي فاتجاه واحد ديال البنات وطريقهم) كان أكثر من خويا يحيد من لحمو باش يفرحني.. لي من دمي ولحمي ومايديروش معايا هاد التصرفات.. صونيت عليه كلتلو خاصني شي صرف باش نطلع.. كالي دوز عندي للخدمة.. هزيت حوايجي ودزت عليه فالخدمة عطاني الأماني وقصدت المحطة....
..
..
يتبع.....

.

.

.


الجزء 20
.
.
.
.
.
.
.
.
.
.
.
.
.
.
طلعت لافاك باش نبدا القراية.. كنت كلي عزيمة باش نتغير جدريا ونديها فقرايتي.. واخا لاحتني الظروف فضومين ماشي ديالي ومابقالي وقت للتدارك والتغيير.. كلت صافي هانيا نكمل هنا ونحاول نبغي هاد الشعبة واخا عمري ارتاحيت ليها ولكن مع الأيام غانرتاح ليها.. بقيت كانفكر فشي حل للسكن. الكراء غايديليا مصروف كثير.. بقيت كانضبر حتى لقيت بلاصة فالحي الجامعي.. مشيت حطيت فيها حوايجي وريحت تما.. وبديت قرايتي وكنت غادي مزيان.. ماكانمشي مع حد ماكانتجمع مع حد.. كلهم ولاد الكلاب يضحكولك دابا ونهار طيح ماتلقى حتى واحد.. حاولت نديها غير فقرايتي.. كنت كل ما هزيت البوليكوب نقرا.. كانشوف فيه ونبغي نلوحو وكانكول واش أنا على آخر أيامي نبقى نقرا الشعر وأبو نواس وأحمد شوقي.. واش هذا أنا هو الضومين ديالي.. الناس وصلو فين والعرب باقيين فالبحور 16 .. ولكن كانعاود نعل الشيطان وكانكول صافي بركة آخالد يكفي ماضاع من حياتك.. وكانصبر وكانقرا داكشي.. دازو الأيام بسرعة وها الإمتحان جا.. كاندخل كانكلس كانحس بلي الحراسة عينهم غير عليا أنا.. كانبقى نكول دابا نوض نخربقها مع شي واحد هنا ولي ليها ليها.. والله حتى نخربق هادشي ونرجع لديك العقلية المريضة راه بنادم كاتسكتلو وطايطغى.. وعاود كانبرد أعصابي وكانكول صافي آخالد راه أنت لي غاتخسر فجميع الحالات صافي تكالما.. كانبرد وكانحدر على ورقتي كانعمرها ونخرج.. وصلنا للموديل الأخير سميتو التواصل واللغات.. كانت فيه الفرنسية والإعلاميات.. غير حطو الورقة مالعبتش معها لانفورماتيك ساليتها فرمشة عين مازال ما سالا حتى تفراق الوراق.. الفرنسية قريت النص أكثر من مرة باش نفهمو.. فهمتو وطحت على الأسئلة ساليتها شفت فبنادم كامل حاصل.. طزززز تريكة عنترة بن شداد حاصلين فلي هو مفيد وكايتماشى مع العصر.. فرقت الأجوبة على هادوك لي حدايا كاملين وكلتلهم آودي غا كونوا رجال راه نموتوا معاكم.. سالاو الإمتحانات وبقينا كانتسناو نهار يتعلقو النتائج.....
..
..
يتبع......

.

.


الجزء 21
.
.
.
.
.
.
.
.
.
.
.
.
.
.
.
خرجو النتائج وكانت صادمة.. فعلا ماشي ليا.. ولكن صادمة لهادوك ولاد الكلاب لي ماحاملينيش.. ماتسرطاتلهومش كيفاش خالد فاليدا كولشي وغير فالعادية.. وطبعا ماقدروش يكولوها فوجهي وصلاتني اخبارهم من بعد.. شفت نقطي لقيتهم مزيانين.. رجعت للشومبر ريحت وأنا نتفكر سعيد لازم نهضر معاه نكولهالو ونشوف اخبارو راه شحال هادي ما هضرت معاه..
آلو خويا العزيز اخبارك كيداير مع شي خدمة..
سعيد : أهلا ولد ميمتي.. ها حنا غاديين مع الوقت.. هادوك مابقيتش معاهم فالخدمة وقعولي مشاكل وخليتهم.. وهاني كانعدي مع الأيام تا يحن الله.. غير خليها على الله..
أنا : بففففف إوا راك عارف هاد بلاد النم صبر أوصافي..
سعيد : كولي شنو درت فامتحاناتك. ؟؟
أنا : الحمد لله فاليديت كولشي.. وأنت آش راك دير..
سعيد : آخويا راني مع الكونكورات وسير وآجي من مدينة لمدينة على الله يقبلونا..
أنا : إن شاء الله ربي غايسهل ماتخممش..
ساايت الهضرة مع سعيد وبقيت كانفكر واش نرجع للدار فهاد العطلة ولا لا.. وعلاش غانرجع باش نمرض ثاني فدماغي.. من الأحسن نكلس هنا.. واخا التحنسيرة والأزمة المهم هو راحة البال.. زينب كانوا باقيين كايقراو.. تكونيكطيت معها فداك الليل.. وكلتليها واش مسالية غدا طلعي عندي ؟؟
زينب : لا غدا قارية بالعشية.. تال بعدو لي غاتكون العشية خاوية ونجي..
أنا : صافي واخا إن شاء الله..
وصلات ديك العشية تسنيت زينب جات ومشينا ريحنا فواحد الجردة.. بقينا كانهضرو ونضحكو.. زينب لي شافها غير هاكدا بوحدها غايكول معقدة مريضة أو ماعندهاش مع بنادم ولكن هي فيها هاد الصفة داك الضحك وداك التقشاب كاديرو فقط مع لي كاتعرف.. دازت العشية زوينة.. نسيت فيها كولشي.. كانت زينب فنفس عمري تقريبا غير هي فايتاني بشي شهور يعني كبيرة عليا شويا.. تمنيت لو أنها فعلا كانت ختي دبصح.. مشيت ومشات الأيام تا بدات الدورة الثانية هنا غاتبدا المعاناة من جديد.....
..
..
يتبع.....

.

.

.


الجزء 22
.
.
.
.
.
.
.
.
.
.
.
.
.
طحت فأزمة مالية.. مابقى عندي حتى ريال.. مابقى عندي حتى ماناكل.. تلات بيا الأيام وليت كانمشي للريسطو دالحي ونصبر وناكل ديك الماكلة المعيافة غير باش نسد جوعي.. بقيت هاكدتك شي أيام صافي صبري بدا كايتقادا.. وليت كانطول آش هاد الحياة دالمرض واش أنا نبقى عايش حياتي غير هاكدا .. فواحد العشية ها هو الواليد كايصونيلي.. شفت النمرة وكانكول آش بغا عندي ثاني.. عاد تفكرني وعاد بانلو يسول فيا..
الواليد : آلو كيداير لاباس عليك
أنا : لاباس الحمد لله وأنت اخبارك واخبار صحاب الدار
الواليد : لاباس الحمد لله.. ياكما خاصك شي حاجة
أنا : (آودي خاصني بزااف) لا لا ماخاصني والو..
الواليد : إوا زير وحاول على الفلوس راه الوقت مزيرة..
أنا : (آودي مابغيت فلوس.. تمنيت غير تكون تحسسني أنك الواليد ونحس بالحنان ديالك أما أنا نعيش تا بالخبز اليابس) واخا..
ساليت المكالمة وبديك الأعصاب رميت التيليفون وسلطتو على الحيط.. كرهت الحياة ومايجي منها.. أنا فأزمة والخدمة ماكايناش.. تفكرت سعيد يصوفيني ولكن كلت بلاش.. حيت عارف الأزمة منبن كايدوز حتى هو وعارف راه غايحيد من لحمو ويصوفيني حيت دارها ديجا.. ولكن خليه لي فيه يكفيه بلا مانزيدو همي حتى أنا.. بقيت كانفكر غير فين نضبر شي حاجة غا نديباني بيها بينما نلقا حل.. ماكان تا واحد قريب ليا من غير سعيد وزينب.. تفكرت زينب وكانكول زعما يكون عندها.. ؟؟ بقيت متردد.. حتى الليل وتكونيكطيت معها.. كلتليها زينب محتاجك فواحد الحاجة إلى تقدري تعاونيني ؟؟
..
..
يتبع......

.

.

.


الجزء 23
.
.
.
.
.
.
.
.
.
.
.
.
.
.
زينب : وي خويا خالد بطبيعة الحال ها أنا كانسمعك..
أنا : (زينب بحكم كانعاودلها كولشي عارفة الظرفية والمشاكل لي كاندوز منها).. خاصني شي صرف نديباني بيه آختي.. راه قصدت الرجال يا حسرة وردوها فوجهي.. بقيتيلي غير أنت إلى عندك باش وراني حشمان منك والله..
زينب : دابا خلينا من هاد الهضرة.. كولي شحال خاصك..
أنا : 200 درهم غير نديباني ويوجد عندي شي صرف نردهالك أنت الأولى..
زينب : ماتردلي مانردلك.. المهم غدا ودوز عندي إن شاء الله..
فالغد ليه مشيت عند زينب لقيتها كاتسناني.. مداتلي 100 درهم .. وكالتلي راه الدار فيها الضياف وراني مخربقة شويا هاك هادي قضي بها بعدا.. شكرتها بزااف ومشيت.. وبقيت كانكول دابا بنت ودارت هادشي كامل وهادوك لي حاسبين راسهم رجال يا حسرة ردوني وماقدر بنادم كاع يشد فيديك وأنت كاطيح.. ماكانسعاكمش يا ولاد الكلاب.. فقط بغيتكم توقفوا معايا فالأزمة لي كاندوز منها حينها راه غانردلكم رزقكم وبالدوبل كاع لا بغيتو غا سدو قمامركم.. كانهضر بيني وبين راسي هاكدا.. والموقف لي دارت معايا زينب ماعمرو يتنسالي حياتي كاملة.. بقيت كانديباني دوك الأيام وكانهضر مع زينب كيف العادة.. تال واحد الليل كالتلي غدا واش مسالي.. راه غانطلع لافاك.. آجي بغيت نشوفك.. كلتليها آه مسالي.. صبح الصباح تلاقينا كيف العادة ضاحكين وكانهضرو نسيت معها كاع دوك المشاكل.. تا وصلنا البلاصة فين غاتمشي بحالها ونمشي بحالي جبدات 200 درهم وكالتلي هاك وديزولي داك النهار غير كما كلتلك كنت مرونة مع الدار عامرة بالناس.. أنا فالأول كلت راه زينب ماكانش عندها وغير هاداكشي لي كان عندها فالأول عطاتولي.. ونسيت أنا كاع الأمر.. مداتهالي وكالتلي شد راني عارفة لي كاين.. مشات ومشيت ومانكدبش عليكم الدموع وقفو فعيني.. كيفاش بنت كاتحمل كل هاد الأوصاف د تارجلييت وواحد دينمو شحال درت معاه وفوقت الحزة خلاني.. كبرات فعيني زينب ولات أعز صديقة لقلبي.. ماشي على الفلوس ولكن على ود دوك المواقف لي دارت.. بقيت شاد الوقت وكانديباني هاكدا وهاكدا.. تا سالات الدورة الثانية وجاو الإمتحانات من جديد.....
..
..
يتبع.......

.

.

.


الجزء الأخير..
.
.
.
.
.
.
.
.
.
.
.
.
.
.
حاولت ننسى كل المشاكل ونركز على الإمتحانات باش نفوت هاد العتبة وتبان الطريق قدامي.. الضومين ماشي ديالي ولكن دارها الطيش وقلة التفكير ودابا راني هنا ماعليا غير نكمل.. كانقرا داكشي كان كايبان ليا ساهل.. وبنادم خاصو غا يدير معاه عقلو.. كنت كانبحث من جميع الجوانب وكنت عارف أن هاد التخربيق مجرد أفكار خاصك توصلها للأستاذ فهمت السيسطيم كيف غادي.. هذا علاش نهار الإمتحان الناس كاتلقاها كاتعمر الورقة من جميع الجهات وكاين لي كايطلب كاع ورقة أخرى تكول عليك كايمرو من مراحل حل معادلة من الدرجة تسعود ههه .. كانشد أنا الورقة طانكتب ما قل ودل.. كانحطها ونمشي.. وصلو النتائج الحمد لله فاليديت كولشي ودرت طلة على لي كانو كايكتبو بزااف لقيتهم ماجايبينش نقط والمخير فيهم يالاه كايوصلها للمعدل وكاع هادوك لي فاليداو كانو فاهمين أن الأمر ماشي مسألة تكتب بزااف ولكن مسألة تبين الفكرة وتوصل للأستاذ أنك على دراية بتلك الأمور.. ساليت العام.. وقررت نبقى تما واخا ساليت ولكن بغيت نبقى شويا دالوقت عاد نرجع للدار.. فدوك الأيام زينب ضياقت عليها الدنيا.. وقعولها مشاكل وولات كارهة كولشي.. حتى الإمتحان دآخر السنة مابغاتش دوزو.. هضرت معها وكلتليها زينب واش أنت مريضة فدماغك ؟؟ واش حتى لآخر لحظة وتضربي كولشي فالزيرو.. بقيت مع زينب باش نقنعها تتراجع على الفكرة لي جات فبالها.. بالخصوص أن المشكل كايتعلق بقرايتها والوالد ديالها.. وجبدلها أمر المصروف والفلوس.. تما تأكدت أن مجتمعنا وعلاقاتما بوالدينا كاتحكمها المادة بالدرجة الأولى.. غير كاتختالف من واحد لواحد.. بقيت كانصبر فزينب.. وهي بقا فيها أنها أصلا دارت ليسطيا ومشات كذلك لضومين ماشي ديالها غير على ود عائلتها باش تنقص عليهم المصاريف.. لأنها الضومين لي كاتبغيه ماتقدرش عليه لأنها إلى بقات تما غاتمرض.. وغايتزاد ثاني مصاريف السبيطارات والدوايات.. دازو أيام تهدنات زينب وقررات أنها تتخلى على ديك الأفكار لي كانو فعقلها.. مشات دوزات الإمتحان ديالها.. فالنهار لي غانرجع فيه هضرت معها كلتليها زينب فينك بغيت نشوفك قبل مانمشي..
زينب : غاتلقاني غير فليسطيا..
هبطت عندها باش نكولها بسلامة ونمشي بحالي.. تلاقيتها وجينا غاديين بدات كاتسولني على الأحوال وكانهضرو شويا.. تا وصلنا البلاصة لي غانتفارقو فيها كالتلي ياك ماخصك باش تمشي للدار.. كلتليها لا عندي ربي يخليك شكراا بزااف.. سلمت عليها ومشيت.. وكانفكر فالجملة الأخيرة.. البنت فعز الأزمة ديالها وكاتصرف معايا هاكدا.. فعلا عمري وعمري غانصادف شي صديقة بحال هادي.. مشيت ودازو أيام هضرات معايا كالتلي أنها نجحاات.. فرحاتني بزااف.. ماعمري حسيت بزينب شي وحدة برانية.. كانحس بها ختي وكبرات معايا.. وبقات علاقتي مع زينب هاكدا وأمنيتي أنه داك لي غايكتبولها ربي باش يديها يكون ولد الناس حيت بنت بحال هادي تستحق تعيش فسعادة حياتها كاملة.. قلبها الكبير.. ومواقفها شاهدة عليها.. أنا شفت فكل الأحداث لي وقعاتلي خديت عبرة وحدة أن مجتمعنا مجتمع مادي بامتياز.. وحتى والدينا كبرو فجهل خلا ديك الفكرة تغرس فدماغهم.. عرفت أن طريق البنات ماكاتخرجش.. حيت المخيرة فيهم غاتزوج وتمشي وتخليك.. عرفت أن الإنسان ملي كايصفي نيتو كايلاقيه ربي بالناس المزيانين.. ومن نهار قررت نتبدل لاقاني ربي بزينب لي واخا نهضر حتى نعيا ماغانساش الخير لي دارت فيا.. عرفت أن تمارة مادايماش.. عرفت أن قرايتي هي لي غاتوصلني.. وهي لي غاتخلي الحياة تضحكلي.. !!
..
..
النهاية

إقرأ المزيد