الثانية باك آداب وعلوم إنسانية
..
القضية الفلسطينة والصراع العربي الإسرائيلي
..
الجزء 1
..
.
.
.
.
.
آسيدي ف 1947 ديك المنظمة ديال الأمم المتحدة خرجات واحد المشروع باش يقسمو فلسطين لجوج جهات وحدة لفلسطين والأخرى لليهود والأخرى يخليوها تحت النفوذ الدولي يعني ما ديال هادو ما ديال الأخرين .. المهم آسيادنا هاد المشروع رفضاتو فلسطين ورفضاتو حتى جامعة الدول العربية ولكن الصهاينة قبلوه ((وا بسيف ما يقبلوه راه مصلحتهم تما )) .. إوا ف 1948 تسالا الإنتداب البريطاني على فلسطين بالضبط ف ماي 1948 .. هادشي خلا الصهاينة يعلنو قيام دولة إسرائيل حسب التقسيم لي خرج ف 1947 .. من داك النهار شعلات القضية وبدات الحروب مع إسرائيل..
أولها كان ف 1948/1949 سمية هاد الحرب النكبة أو النكسة الفلسطينة .. فهاد الحرب ناضت مصر والأردن وسوريا والعراق ولبنان علنو الحرب على إسرائيل.. ولكن هاد إسرائيل مجهدة آخوتي عاوناتها ميريكان وعاونها الغرب وتحاماو وفعلا انتاصرو فهاد الحرب وكانت النتيجة أنهم توسعو فالنفوذ...
..
يتبع...
.
.
.
لقضية الفلسطينية والصراع العربي الإسرائيلي
..
.. الجزء 2
,,
و ف1956 كانت حرب أخرى ولكن هاد المرة كانت ضد مصر حيت أممت شركة قناة السويس ,, وهاد الحرب كانو فيها الإنجليز وفرنسا وإسرائيل وتحاملو على مصر .. وهاد الحرب كانسميوها العدوان الثلاثي على مصر .. و ف1967 جات حرب أخرى سميتها حرب الستة أيام كانت بين دول الطوق وإسرائيل .. و هاد دول الطوق آآخوتي هي مصر والأردن وسوريا ولبنان .. المهم فهاد الحرب عاود إسرائيل انتصرات وهاد المرة بشكل كبير هادشي خلاها توسع النفوذ مزيان وجمعات الضفة الغربية وقطاع غزة وهضبة الجولان فسوريا وحتى منطقة سيناء فمصر .. كولشي ولا ديالها و فهاد الحرب خرج القرار 242 من عند مجلس الأمن .. وهاد القرار 242 آآسيادنا كايطالب إسرائيل باش تنساحب من الأراضي لي حتلاتها ف 1967.. ا
إوا من مور هاد الروينة كاملة غاديا تبان المقاومة الفلسطينية وبانت واحد المنظمة سميتها .. منظمة التحرير الفلسطيني ف 1964 لي ولا ياسر عرفات هو الرئيس ديالها ف1967 .. هاد المنظمة كانت جامعة شي حركات من بينهم حركة فتح والجبهة الشعبية والجبهة الديمقراطية .. إوا هاد إسرائيل راسها قاسح ماتسوقاتش لدلك القرار 242 ومابغاتش تنساحب من دوك المناطق بالعكس عاد زادت كاتوسع .. إوا من بعد الحرب ديال 1973 تال 1991 هاد المرحلة كاملة كانت بداية للمفاوضات كانت من بينها المفاوضات بين مصر و إسرائيل فشتنبر 1978 سماوها إتفاقية كامب ديفيد .. تافقو أن إسرائيل تنساحب من سيناء فمقابل السفن الإسرائيلية عندها الحق تدوز فالممرات الدولية بحال قناة السويس .. إوا ف 1987 غادي تنوض إنتفاضة أطفال الحجارة آآسيدي هاد الإنتفاضة دوزات سبع سنين مشا ضحيتها 1400 شهيد الربع ديالهم غير أطفال .. هاد الإنتفاضة كانت السبب فظهور حركة حماس بقيلدة أحمد ياسين و ف نونبر 1988 علنو قيام الدولة الفلسطينية .. ولكن الغرب ماتسوقولهومش كاع وماعتارفوش بيها .. ف 1991 كان مؤتمر مدريد لي كانت فيه بداية المفاوضات من جديد هاد المرة بين إسرائيل والأردن من جهة و قضية اللاجئين الفلسطينيين والمياه من جهة أخرى .. موراها ف 2000 كانت إنتفضة الأقصى بالضبط ف 28 شتنبر .. فهاد الإنتفاضة إسرائيل كلات الدق ماتولها شي 1500 واحد وزيد بزاف د الخسائر .. من بعد 2000 تحطمات ديك المسيرة د السلام بالخصوص ملي حزب الليكود شد الحكم فإسرائيل و حركة حماس نجحو فالإنتخابات ديال 2006 ..
..
الخاتمة..
الصراع العربي الإسرائيلي لحد الآن باقي هو هو .. والسبب فهادشي هو أن ميريكان جايا من جيهة إسرائيل ومحاميا عليها بزاااف والهدف هو السيطرة الغربية على الشرق الأوسط كامل .
ليست هناك تعليقات :
إرسال تعليق