قصة "الوقاحة تحطم العلاقات"
..
الجــزء الأول..
.
.
.
.
.
.
.
.
.
.
.
.
حسن طالب جامعي.. كانت لافاك بعيدة على المدينة لي ساكن فيها يعني خاصو يكري .. المهم فالأول سكن عند شي ناس من العائلة بينما يبقى يقلب على الكراء .. المهم فالسمانا الأولى .. كان فلافاك وبقاو كالسين هاكدا شي دراري ف لونفي وبداو كايهضرو على الكراء .. شويا تعارف على واحد االدري سميتو معاد .. هضرلو حسن على المشكل لي عندو .. كالو معاد شوف ماتضربش الحساب حنا راه كاريين واحد البيت زوينة غير أنا وواحد الدري ولد البلاد هو ماكايقراش خدام وقليل فين كايجي للبيت وأنا نيت خاصني لي يونسني .. حسن فرح لهاد الأمر وفالنهار الآخر مشا جاب حوايجو وسكنو فالبيت بجوج .. حسن كان مبلي بالبنات .. ففمو غير المصاحبة وأنا مشيت مع هادي درت مع هادي.. دازت واحد المدة جا حسن كال لمعاد راني تعرفت على واحد البنت ولقيتها كاتعرفك..
معاد : وااايلي كاتعرفني أنا.. سميتها ؟؟
..
..
يتبع......
..
..
..
قصة "الوقاحة تحطم العلاقات"
..
الجــزء الثــاني..
.
.
.
.
.
.
.
.
.
.
.
.
.
حسن : سميتها نادية راه كالتلي قرات معاك فالسيزيام..
معاد : آآه عرفتها.. مزيان آآسيدي بصحتك..
حسن : ياكما مانبعد على بنت مدينتك..
معاد : ههههههه مالي والدها وناسيها .. الله يجعلك تا تغتاصبها وأنا مالي ههههه
حسن : هههههه .. آآجي درتلنا شي عشا..
معاد : درتلك السحور لاواه.. واش أنت النهار كـامل دايع فالزناقي مع البنات وباغيها باردة ..
حسن : هههههه الغالب الله..
معاد : شوف دابا باش غاتسما أنت درتي شي حاجة .. الخضرة ها هي كاينة.. سير برعنا بشي عراام لحم .. وأنا نديرلك طاجين 5 إطوال
حسن : لاواه المسمن بكونفيتير عيشة..
معاد : نوض آآصاحبي ولا تبقا بلا عشا..
حسن : أوكي هاني غادي..
بقات العلاقة ديالهم هاكدا ديما ضاحكين .. حسن كان كايكمي .. ومعاد كان ديما كايفورني عليه مرة مرة .. حسن كايسالي فلوس المصروف غير فالتفاتف .. وديما كان معاد كايصوفيه .. واحد النهار الواليدة ديال حسن مرضات وصلاتو الأخبار.. وجات مع الآخر دالشهر .. وتا معاد ماكايضور فجيبو تا ريال .. ولكن كالو شوف كاتخممش لقيت واحد الحل باش غاتمشي لداركم دابا....
..
..
يتبع......
..
..
..
قصة "الوقاحة تحطم العلاقات"
..
الجــزء الثــالث..
.
.
.
.
.
.
.
.
.
.
.
.
.
.
الدري لي كان كاري معاد هو خدام مع واحد الشركة وهو سائق ديال شاحنة .. داك النهار كان فالدار ولكن هو أصلا نهار كايجي للدار كايجي يرتاح حيت كايضرب مسافات وكايعيا وكايجي ينعس .. معاد كان كايحتارمو بزااف وكايعتابرو هو خوه الكبير .. ملي شاف حسن فديك الحالة وشاف أن الأمر فيه الميمة ماقدرش يفوتو .. ومشا عند الدري لي كاري معاه.. كالو خويا يوسف سمحليا والله إلى راني حشمان نطلبك هاد الطلب .. الدري لي معايا الأم ديالو مريضة وخاصو يمشي للبلاد وراك عارف دابا التالي د الشهر تا واحد فينا ماعندو ريال.. بغيتك تكابر معانا وتديه بالكاميون للبلاد..
يوسف : الله ياربي .. ياك لاباس آآخويا ياكما مريضة بزااف ..
معاد : والله ماعرفت هو كالولو راها مريضة فالفراش..
السائق : المهم أنت عارف دابا مايمكنش نصوك حيت غالب عليا النعاس.. هاك هاد 200 درهم عطيها لصاحبك يمشي .. وكولو إلى خصاتو شي حاجة مرحبا.. تا توجد عندو ويردها..
معاد : لهلا يخطيك خويا يوسف والله ماننسا خيرك
يوسف : الله آآودي راكم بحال خوتي الصغار.. غير كونو رجال باش توصلو شي مرتبة عالية ونفتاخر بيكم..
معاد : إن شاء الله خويا يوسف..
حسن خدا الفلوس ومشا للبلاد يشوف ميمتو مالها....
..
..
يتبع.....
..
..
..
قصة "الوقاحة تحطم العلاقات"
..
الجــزء الرابــــع..
.
.
.
.
.
.
.
.
.
.
.
.
.
.
.
وصل حسن لبلادو .. وشاف ميمتو لقاها مريضة طايحة فالفراش .. بقا دوك الأيام تا ولات لاباس .. وفدوك الأيام معاد مافارقوش فالتيليفون ديما يسول فيه .. ولا الأم ديال حسن لاباس وجا بحالو .. المهم مشات الأيام عادي .. وداز داك العام .. وقبل مايسالي العام .. كال حسن لمعاد عافاك العام الجاي ماتنسانيش ملي تلقا الكراء ديرني فبالك باش نكري معاك..
معاد : الله آآودي بلا ماتوصيني راك خويا..
حسن الله ينورك..
المهم داز العام .. حسن مابقاش كاع كايتاصل بمعاد ماكايسول فيه ولو بميساج .. معاد كال يمكن راه شاغلاه الوقت نبقا نسول فيه أنا .. وكان كايسول فيه كاتجيه هضرتو ثقيلة .. ومادار فبالو والو كال راه غير يكون مزير مع الوقت أوصافي..
داز الصيف وفالبداية ديال العام الآخر .. جاب حسن معاه دري آآخر وكال لمعاد شوف عافاك هذا يكري معنا راه ولد البلاد وماعندو فين يمشي.. يبقى معنا هنا..
معاد :.....
..
..
يتبع.....
..
..
..
قصة "الوقاحة تحطم العلاقات"
..
الجــزء الخــامس..
.
.
.
.
.
.
.
.
.
.
.
.
.
معاد : مرحبا الله آآودي.. ماعنديش مشكل..
حسن مشا جاب الدري وكال لمعاد هاهو الدري نشرفك بيه سميتو يونس..
معاد : متشرفين خويا مرحبا بيك..
المهم بدا العام وحسن مابقاش كيف كان مع معاد .. ولا ديما معمر غير مع داك ولد بلادو .. حيت لقاه تا هو عاشق غير فالبنات ومواضيعو كلها بنات .. المهم بقاو ديما كايغوتو ويصدعو معاد بدوك المواضيع .. ومعاد صابر وكال هانيا .. العام يدوز يدوز نصبروو مانديو عيب أحد .. واحد النهار سافر للدار وخلاهم بجوج تما .. ملي رجع لقا داكشي مرون وشي حوايج ديالو تقاسو .. وهرسولو شي حاجات ديالو .. جا هضر معاهم .. وهو يتشاد معاه حسن باغي يدابز معاه .. ومعاد ماباغي يجبد صداع .. كالو شوف آآحسن ماباغي نجبد صداع .. نفرتكو هادشي وكلها يمشي فطريقو ..
حسن : أنت لي خرج أما البيت ماشي ديالك راه كاع كاريين..
معاد نفسو حارة جمع حوايجو .. وخلاهم .. ومشا عند واحد صحابو بينما يقلب على الكراء فبلاصة أخرى...
النهار الآخر بدا كايقلب....
..
..
يتبع.....
..
..
..
قصة "الوقاحة تحطم العلاقات"
..
الجــزء الســادس..
.
.
.
.
.
.
.
.
.
.
.
.
.
.
.
بدا كايقلب .. ولكن لي مرضي راه مرضي .. معاد كـان ماخرجلوش الحي الجامعي ولكن تحط فلائحة الإنتظار .. وفداك الأسبوع بالذات خرجو السميات لي تختارو من لائحة الإنتظار.. ومعاد لقا سميتو .. مشا جاب فلوس التسجيل وتسجل .. هنا تفكر أن حسن مازال كاع مارد ديك 200 درهم ليوسف .. واخا يوسف مابقاش معاهم حيت تزوج وصافي مشا ساكن هو ومراتو .. معاد مابغاش يتعايب مع يوسف .. ضبر على 200 درهم ومشا للقهوة لي موالف كايكون فيها .. وكالو هاك هاد 200 درهم راه ردهالك حسن.. وبداو كايتعاودو تا تجبدات الهضرة .. وكالو يوسف إذن هاد 200 درهم ديالك أنت ماشي هو لي عطاهالك
معاد : وي خويا يوسف.. مابغيتش نتعايب معاك.. أنت عارف قداش كانحتارمك وماننساش أنك أنت لي سكنتني عندك فالأول وماعمري خلصت فلوس الكراء تا بدات كاتخرج لابورس..
يوسف : شوف شد 200 درهم عندك .. راه الرجال بالرجال.. كون ماعرفتك راجل ماغانديرش معاك هادشي كامل..
معاد : ربي يخليك ليا يوسف..
يوسف : أنت خويا.. وبغيت نتشارك معاك واحد الفرحة .. المرأة عندي ولدات ولد.. وماغانسميه إلا بسميتك.. معااااد . هاد السمية عزيــزة عليا حيت مسمي بها إنسان بحالك راجل ومرضي...
..
مشات الأيام وإكتاشف معاد أن حسن وصاحبو ولا كاري معاهم واحد ولد بلادو كايعرفو مزيان.. واحد النهار تلاقاه وكالو آآجي نعاودلك واحد البلان...
..
..
يتبع...
..
..
..
قصة "الوقاحة تحطم العلاقات"
..
الجــزء الســـابع..
.
.
.
.
.
.
.
.
.
.
.
.
.
.
.
.
.
كالو .. آآصاحبي راني كاري مع واحد جوج دراري عالااام والله هههه .. حياتهم كاملة غير بنات ومصاحبة..
معاد : ياك ما بلاوك المصيبة ههه .. أصلا أنت ماجاياش معاك الرومانسية .. تسلم على شي بنت تجرحها بيدك.. موالفين غير البالا والفاس ههه
صاحبو : ماتجرحليش لي سونتيمون آآصاحبي.. زعما أنت تبارك الله كاتخدم فبيرو كليماتيزي .. راه فالصيف كانخدمو فبلاصو وحدة..
معاد : كاتردلي الصرف ههه بصحتك..
صاحبو بدا كايعاودلو وكايوصفهوملو .. وكالو معاد رسا رسا .. واش من المدينة الفلانية..
صاحبو : وي وي هما علاش
معاد : هادوك هما لي كان وقعلي معاهم داك المشكل راك عارف.. كيداير أنت مفاهم معاهم ؟؟
صاحبو : آآخويا السلام السلام.. تا العشرة مامعاشرهمش كاندير ماكلتي بوحدي وشاد كواني ومامسوقلهمش..
معاد : إوا كيفاش البلان لي باغي تعاودلي....
..
..
يتبع........
..
..
..
قصة "الوقاحة تحطم العلاقات"
..
الجــزء الثـــامن..
.
.
.
.
.
.
.
.
.
.
.
.
.
.
.
واحد النهار حسن كان كايآآجوطي شي بنات فالفايسبوك .. وهو يطيح على وحدة كاتجاوبو وشد معاها الخط .. المهم فدوك الأيام بدا كايعاود ليونس البلان .. ولقاها أن ديك البنت بنت جيرانهم ليونس .. ونيت يونس مصاحب مع صاحبتها وبجوجهم كايقراو فلافاك وكاريين فنفس البلاصة .. كال حسن ليونس .. ياك بعدا هانية إلى كملت معاها تكول بنت جيرانكم ولا باغيني نفوتها
يونس : لا لا هانية..
واحد النهار قررو يتلاقاو ب4 ويتحركوا كاملين فواحد العشية .. المهم كل واحد تحرك مع صاحبتو .. والمشكل هو أن صاحبة يونس ماكاتحملش حسن .. مشا حسن مع صاحبتو وكايكولها عرفتي ديك صاحبتك ماكانحملهاش .. كون غير ماكانتش صاحبتك بلا بلا بلا..
من بعد هاد الهضرة كـاملة وصلات ليونس....
..
..
يتبع.....
..
..
..
قصة "الوقاحة تحطم العلاقات"
..
الجــزء التــاسع..
.
.
.
.
.
.
.
.
.
.
.
.
.
إوا جا لعند حسن كالو راه ماشي خدمة تمشي تبقا تعمر البنت على صاحبتها..
حسن : آآصاحبي راه ماكلتلها والو
يونس : آآصاحبي البنت كانت باغية تدخل للدار وأنت شاد صاحبتها
حسن : آآصاحبي واش هي باغية بخاطرها وأنت فالأول كلتيلي هانية إوا صافي
يونس : أوكي المهم ماتبقاوش تعطلو
المهم واحد النهار كانو فالبيت وكانو كالسين وعيطو للدري لي معاهم لي هو صاحب معاد باش يريح معاهم جا ورايحين وغتافقو يجيبو شي حاجة يديرو كاسكروط .. وجات فيونس هو لي غايتسخر ليهم المهم تسخر وبقاو هما فالشومبر .. صاحب معاد مامسوقش غير بغا يديرلهم الخاطر ملي عيطولو .. المهم شويا هز حسن الطيليفون ديال يونس كال هارا نتمزكو نشوفو .. المهم بدا كايخربق فالطيلي .. شويا هو يدخل للميساجات فالفايسبوك والواطساب مع البنت لي مصاحب معاها حسن.. وهنا غاتوقع الكـارثة..
..
..
يتبع.....
..
..
..
قصة "الوقاحة تحطم العلاقات"
..
الجــزء الأخيــر..
.
.
.
.
.
.
.
.
.
.
.
.
.
.
.
لقاه كايسبط فيه فالميساجات .. كالها شوفي آآ سناء عرفتي راكي مصاحبة مع أكبر شلاهبي .. مصاحب مع بزااف دالبنات .. راه غير كايدوز الوقت..
سناء : واايلي هي أنا دابا عير لعبة كايدوز بها الوقت
يونس : واييه راه مايسواش.. أنا بعدا مابقيتش كانحملو .. ومابقيتش كانتحملو فهاد البيت بففففف
قراا حسن داكشي كامل وتصدم من كولشي .. وبقا ساكت ماكال والو.. تال الليل وجا داخل وكال ليونس نوض باغي نهضر معاك ..
يونس : مامساليش راني مريض
حسن : وكايخسر الهضرة واا نوض ****** راه قريت الميساجات ديالك كاملين.. ييه ***** أنا لي جايبك فالأول ومضبر عليك وليتي دابا مامستحملنيش ..
يونس : واااش أنت مريض مصاحب مع بنت بحال ختي وباغيني نسكن
حسن : علاش من الأول ماتكولها علاش بقيتي ساكت ولا ماقادرش تواجهني
يونس بدا كايغوت وحسن كايرد عليه وناضت الروينة تما .. وجا حسن بديك الأعصاب هز الموس باش كاينقيو الخضرة وضربو بيه..
من بعد ناض الغوات جاو الجيران .. وشافو داك العجب وهزو يونس للسبيطار وتما لقاو أن الضرية غير جرحاتو.. وبالتحزار ماوصلاتش الدعوى للمخزن .. وتفرتك داكشي كـامل.. وهنا يونس عاد ندم على معاد.. ولكن فات الفوت.. حيت الشمايت.. كتلاقيهم الوقت غير مع الشمايت بحالهم....
..
..
النهـــاية..
..
..
العبرة : ماعمرك تخلي البنات يكونو هما أولوية فحياتك .. وإلى جاتك شي بنت فطريقك وكنتي أنت وياها فعلاقة.. ماعمرك تدخلها فعلاقتك مع صحابك .. والوقاحة دائما كاتكون صفة فالشمايت .. بالإضافة أن الرجال كايلاقيهم ربي بالرجال ولي مرضي.. كاتكون طريقو مفرشة بالخير...
..
..
تحية للي تابعو القصة وموعدنا فقصة أخرى إن شاء الله
تحيــاتي
.
.
.
.
.
الكــاتب
ليست هناك تعليقات :
إرسال تعليق