..
الجزء الأول..
.
.
.
.
.
.
.
.
.
.
.
.
.
.
.
نور الدين وسفيان بجوج صحابي حنا ولاد مدينة وحدة.. فأيام الليسي ماكناش صحاب كانت معرفتنا عادية وصافي المعرفة دالقراية وصافي سلام سلام.. وهوما أصلا كانو علميين أنا أدبي.. دوزنا الإمتحانات دالباك ونجحت.. داز الصيف جا الموسم الدراسي الجديظ طلعت نتسجل فلافاك وتما نيت نقلب على الكراء.. طلعت فواحد الصباح لافاك ديت الوريقات والمسائل نتسجل.. قررت ندير القانون.. صدفة تلاقيت بنور الدين وسفيان تما..
أنا : السلام عليكم.. آكيفاش بلانكم أنتوما آش جابكم هنا وانتوما علميين
نور الدين & سفيان : الله يهديك واش حنا وجه الفيزيك والماط.. غانديرو غا القانون آخاي
أنا : مزيان.. إوا آشنو دايرين فالسكنى..
ن.د & سفيان : آخاي عاد غانمشيو نشوفو ومنها نقلبو على الدراري راه مايمكنش نكريو غا بجوج غايطيح علينا غالي
أنا : تا أنا نيت راه كانقلب.. صافي نساليو التسجال ونمشيو نقلبو
سالينا ومشينا كانسولو مالين الحوانت.. مالين الحوانت هوما لي كايجيبو الخبار.. لي سولنا نلقاو غا ديور د1500 درهم.. يعني خاصنا أصلا نزيدو الدراري وواخا نزيدو غاتجيك 250 ولا 300 درهم للواحد راه بزااف.. بقينا كاندرورو.. لقينا دار صغيرة ب 1000 درهم.. بقينا نحزروه يخليها ب 800 درهم ونزيدو شي دري ولا جوج وطيحلنا ف200 ولا 150 للواحد.. والو مابغاش كاليك لا أصلا أنا كانكريها ب 1200.. 1300.. غا أنتوما طلبة درت معاكم المزيان.. كلناليه صافي الله يجيب رزق وخليناه.. سولنا واحد وكالينا كاين واحد البيت زوين ب600 درهم.. جاتنا 200 درهم للواحد.. بقينا نتناقشو واش نزيدو شي دري معانا وتجينا 150 للواحد ولا نبقاو غا بثلاثة مرخوفين.. صافي تافقنا نبقاو غا بثلاثة.. رصينا الهضرة مع مول البيت.. وجا كالينا شوفو غانكوليكم من دابا الهضرة.. لا كنتو مبليين ولا كاتسكرو ولا من أصحاب البنات وتدخلوهم غا سيرو قلبو فشي قنت آخر أحسن ليكم...
..
..
يتبع......
..
..
..
كان الحلم يهز الحمل على والديه رجع ملوي ليهم فكفن"
..
الجزء الثاني..
.
.
.
.
.
.
.
.
.
.
.
.
.
.
.
كلناليه لا لا ماتخافش حنا بعاد على داك التخربيق حنا جينا هنا باش نقراو ماشي نتفلاو..
مول البيت : مزيان هادشي تا حنا لي بفينا..
اتفقنا معاه وكلناليه صافي العشية غانجيبو حوايجنا وغانجيبو الفلوس باش غانعطيوك خلاص الشهر.. مشيت أنا دخلت لواحد السيبير تما خديت روشارج وصونيت للواليد..
أنا : آلو الواليد كيداير لاباس
الواليد : الحمد لله، شنو درتو واش تسجلتو وكيف داير داكشي، لقيتو شي سكنى ؟
أنا : آه الواليد لقينا بيت زوين وراه طاح علينا ب 200 درهم للواحد، والما والضوء داخل فديك 200 درهم..
الواليد : صافي مزيانة، ومع من غاتكري ؟؟
أنا : مع سفيان ونور الدين..
الواليد : لا ماعرفتهمش
أنا : ولد أحمد مول الطاكسي وولد حسن داك المعلم دالبناء..
الواليد : آه عرفتهم مزيانين.. ردو البال وديوها فقرايتكم..
أنا : المهم حنا دابا جايين باش غانجيبو جوايجنا
جبنا حوايجنا حطيناهم فالبيت قاديناها وحطينا كل حاجة فبلاصتها.. وارتاحينا داك النهار.. والغد ليه مشينا لافاك لقينا بلي القراية باقي ماتبدا تال بعد سيمانة.. صافي قررنا نهبطو لديورنا ماعندنا مانديرو هنا.. الدراري كالولي مازال غايزيدو واحد النهار تال غدا ويهبطو.. مشيت لدارنا.. ودوزت ديك السيمانة.. ورجعت نهار الأحد بالعشية لقيت البيت مرونة مافهمت والو ياك هادو سافرو لديورهم.. كيفاش ترون هادشي.. بقيت مستغرب.. وأنا نصوني لنور الدين فالتيليفون..
..
..
يتبع.....
..
..
..
كان الحلم يهز الحمل على والديه رجع ملوي ليهم فكفن"
..
الجزء الثالث
.
.
.
.
.
.
.
.
.
.
.
.
.
أنا : آلو خاي نور الدين صافا
ن.د : الحمد لله آخاي وأنت..
أنا : ماشفت بو صافا.. شكون خربق البيت هاكدا آصاحبي..
ن.د : كيفااش ؟! أنا دابا راني فالدار من داك النهار لي مشيتي أنت جيت وراك النهار الآخر تال غدا عاد نجب.. خليت سفيان تما..
أنا : أوكي أوكي تا تجي غدا ونتفاهمو
النهار الآخر تجمعنا كاملين بثلاثة فالدار.. كالينا سفيان سمحولي الدراري راه نهار السبت جاو عندي شي دراري وباتو عندي ونسيت ماجمعتش البيت..
أنا : آصاحبي راه خاص هادشي من دابا يتحد راه إلى جيت أنت تجيب صحابك وأنا صحابي وهذا صحابو راه تولي هادي زريبة.. المهم ماعليش دابا هادي فات وتدير الراس..
بدينا القراية ديك السيمانة كانفيق أنا نقرا كانلقى نور الدين تا هو فايق وكايوجد باش يطلع يقرا.. وسفيان كايبقى ناعس مامسوقش.. دازت الأيام شفت نور الدين مهتم بقرايتو وباغي يقرا.. عجبني وتداخلت معاه أكثر وبقينا نمشيو بجوج ديما ونقراو بجوج تال العشية عاد كايتحرك مع سفيان.. هذاك عشيرو وصحبة سنين.. واحد المرة كنا كالسين.. بجوج وجا داخل سفيان..
الدراري كاينة حلقية فلافاك يالاه نتحركو..
أنا مازعمش عليا وماهضرش معايا وماجاوبتوش أصلا
نور الدين جاوبو : آودي ماعنديش مع داك التخربيق دالفصائل حنا آودي بغينا نقراو..
سفيان : وا يالاه آصاحبي والله تا تستافد تما..
نور الدين : لا غا سير بغيت نراجع شويا
سفيان : يالاه آصاحبي نتحركو تما تعمر راسك...
..
..
يتبع......
..
..
..
كان الحلم يهز الحمل على والديه رجع ملوي ليهم فكفن"
..
الجزء الرابع
.
.
.
.
.
.
.
.
.
.
.
.
.
.
.
نور الدين : لي بغا يعمر راسو يقرا فدارهم.. ماغانحتاجش واحد فاضحنا بالنظام النظام بلا بلا بلا.. يبقى يسب فالبوليس والسيمي وهو غا يوقف عليه بوليسي خارج لونطوراج دلافاك يبقى يقفقف ويبكي.. آسفيان لا كنتي متعاطف معاهم أنا فوتني بغيت نقرا..
سفيان : صافي آصاحبي أنت درتي عليا محاضرة.. غا عنداك نهار أنا يوقعلي شي مشكل فالإدارة ويحلوهلي حيت منتمي وأنت مايتسوقولكش..
نور الدين : آودي غا سير الله يبعد علينا المشاكل..
سفيان مع الأيام صافي تغرسات فيه ديك الشوكة ديال النضال والإنتماء وبلي من تما غايقدر يغير شي حاجة.. أنا ملي كايبقى يهضر هو وسفيان فهاد التخربيق كانبقى غا ساكت.. وماغانهضرش حيت هادشي فاااهمو وعارفو.. عارف الفصائل غا تخربيقة دارتها الدولة باش تحبس الوعي دالطلبة غا وسط لافك.. خلقات عداوة بين الفصائل باش يبقى الصراع غا بيناتهم.. ماكنتش كانبغي نشرحليهم هادشي حيت عندي درتية أن الفصائل بمجرد كاتنتمي ليهم تلقائيا غاتولي بركاك.. يعني أي هضرة غانكولها سفيان غايوصلها.. ونصدقو فمشاكل..
مشات أيام وجات أيام وسفيان مرة مرة كايجيب واحد من الدراري لي معاه فالفصيل.. كان داك الدري عندو الإجازة فالقانون.. وكان كايجيبو يشرحليه.. سفيان ماكان كايكولنا والو حيت من بعد داك النهار فين تناقش مع نور الدين صافي مابقا يكولو والو وكلها ولا دايها فراسو.. وصلو الإمتحانات ديال الدورة الأولى.. وجدناليهم ودوزنا سيمانة قاسحة.. كان الإمتحان مزير بزااف.. ولكن درنا لي فجهدنا وبقينا كانتسناو فالنتائج..
..
..
يتبع....
..
..
..
كان الحلم يهز الحمل على والديه رجع ملوي ليهم فكفن"
..
الجزء الخامس..
.
.
.
.
.
.
.
.
.
.
.
.
.
خرجو النتائج واخا ماعجبوناش ولكن مقارنة بالصعوبة دالإمتحان راه مزيان.. دخلت أنا 3 دالموديلات وبقالي واحد راطراباج.. ونور الدين دخل 2 وبقاولو 2.. ديك الساعة باقي السيسطيم القديم.. نور الدين فالأول بانلي عادي ونفس الهضرة لي كلت أنا كالها.. الحمد لله بعدا رانا مزيان انا خفت كاع مايدخل والو.. بقينا تال الليل بانلي الدري تبدل وغير كايخمم وساهي.. كان معنا سفيان ومابغيتش كاع نسولو.. تعشينا ونعسنا.. الصباح سفيان طلع بحالو للافاك كاينة تما شي حلقية.. بقينا أنا ونور الدين.. سولتو مالك ماشي هو هذاك ؟؟
نور الدين : سفيان فاليدا تا هو 3 دالموديلات.. وكانعرفو أصلا مامسوقش للقراية.. داك الدري لي كان كايشرحلو نفعو آخاي بزااف
أنا : شنو باغي تكول آ نور الدين.. ياكما تا أنت كاتفكى تدخل لداك العالم وديك الروينة وتنتمي
نور الدين : لا لا غا نكول لسفيان يبقى يجيبو للدار يبقى يخدم معانا..
أنا : نور الدين قاسح أحسن من كذاب أنا ماعندي ماندير بيه.. لا باغيه أنت ماتبقاوش تجيبوه للبيت.. سيرو للبوفيط ولا البيبليو وراجعو تما
نور الدين : آودي ماعرفت المهم يكون خير..
دازت واحد ثلاثة أيام وليت نشوف نور الدين رجع كايعمر مع سفيان بزااف كما كتنو قبل مايتناقشو داك النهار كايفيقو ويخرجو بجوج يدخلو بجوج.. صافي دخلني الشك فنور الدين.. وصلات الراطراباج.. الحمد لله فاليديت داك الموديل لي كان باقي وحتى نور الدين فاليدا.. بدات الدورة الثانية عادي.. واحد النهار داخلين قرينا ف2 تال 4 سمعت كاينة مفاطعة وفاتحين حلقية.. جيت خارج من لونفي رميت عيني للحلقية وأنا نتعجب..
..
..
يتبع.....
..
..
..
كان الحلم يهز الحمل على والديه رجع ملوي ليهم فكفن"
..
الجزء السادس
.
.
.
.
.
.
.
.
.
.
.
.
.
.
لقيت نور الدين هو لي وسط الحلقية وصافي حفظ ديك البلابلا ديالهم.. تحية المجد والخلود.. تحية نضالية بلا بلا بلا.. بقيت كانتساءل أوااه كيفاش نور الدين بهاد السرعة قلبولو راسو صافي دغيا كلاوليه دماغو وتفورماطا حتى هو وولا منهم ومايمكنش يعصي أوامرهم.. كانتفكر أنه غايبقى حياتو كاملة هنا.. المخير فهادوك كالس هنا سنواات لا قراية لا والو كايضحكو على راسهم بالنضال والتحرر والتخربيق الخاوي وهوما غواتهم حدو حيوط لافاك.. تفكرت ديك الليلة فين كنا كانهضرو أنا وياه وكالي عرفتي آخاي أنا مابغيت والو من هاد الدنيا.. بغيت نقرا ونولي شي محامي ولا قاضي.. غانخرج واليديا من ديك المحنة.. الواليد غانكوليه حبس الخدمة غا كلس ارتاح الواليد.. والواليدة نشريلها أي حاجة كانت كاتشوف جارتنا لابساها ولكن ماقادراش هي تشريها حيت مافحالناش.. غانسيفطهم للحج إن شاء الله.. عرفتي هاد سفيان صاحبي وبحال خويا مابغيتوش يدخل لهاد الضومين.. غايندم.. بغيتو يديها فقرايتو وإلى فرحنا نفرحو بجوج.. راه دوزنا الحلوة والمرة..
بقيت كاندور هادشي كامل فدماغي وكانكول كيفاش نور الدين تقلب.. علاش آ نور الدين.. الإنتماء لشي فصيل ربما عادي من واحد المنظور.. ولكن نور الدين ماكنتش باغيه يغرق فهاد البحر.. كان قلبي كايخبرني بلي هاد الطريق ماغاتخرجوش..
مشيت للبيت كان فيا الجوع درت كاسكروط.. بقينا تال الليل ها هوما دخلو درنا طاجين تعشينا ونعسنا.. الصباح فقت كانت عندي 8 فطرت ومشيت نقرا.. رجعت ف 11 لقيت نور الدين كايجمع صاكادو ديالو.. سولتو فين غادي ؟؟
..
..
يتبع....
..
..
..
كان الحلم يهز الحمل على والديه رجع ملوي ليهم فكفن"
..
الجزء الأخير..
.
.
.
.
.
.
.
.
.
.
.
.
.
.
.
نور الدين : غانطلع لوجدة آخاي.. غاتكون تما واحد المظاهرة ديال الفصيل ديالنا وغانحضرو تما وغانبقا تما شي أيامات..
شفت فيه وماجاوبتوش وخليتو.. تا سفيان مشا معاه بقيت ديك الأيام بوحدي فالبيت.. حسيت بالراحة والكالم والمورال مزيان.. دازو دوك الأيام ورجعو.. مشات الأيام وأي حلقية كانت فلافاك نلقى نور الدين كايغوت تا هو بديك البلا بلا.. وبدمائنا سننتزع حقوقنا والإدارة ممثلة النظام ستدفع الثمن غاليا.. وداك التخربيق.. وكان ديما كايهضر بعصبية وكايسب فواحد الفصيل آخر.. كانشوف نور الدين كانحس بيه بحال شي روبو محفظينو وكايعاود الهضرة.. هضرتو كلها سبان فالفصيل الآخر وبلي هوما كايتعاملو مع الدولة وووو.. البيت فالحيط لي من جيهتو عمرو بتصاور دوك الشخصيات لي كايعتابروهم قدوة وديما كايبقى يتناقش هو وسفيان ويبرزطولي دماغي بداك الهبال ديالهم.. المهم ماكانتسوقلهمش.. واحد النهار كنا فلافاك كانقراو الأستاذ كايشرح تا شويا كانسمعو الغوات وا مواجهة مواجهة.. خرجنا لافاك كولها مرونة كولشي كايجري يخرج.. أنا ماكانشوف قدامي غا الباب جريت تا أنا وخرجت.. مشيت للبيت نيشان بقيت مريح وبالي مشوش.. وصل الليل سفيان ونور الدين ماجاوش.. تعشيت وتكونيكطيت دخلت للكروب دلافاك تا كانشوف بلي شي طالب تضرب فالمواجهة ضربة خايبة وهزوه خطر للسبيطار.. بقيت هابط فالكروب وأنا نشوف صورة نور الدين هو لي تضرب.. قفزت من بلاصتي وشديت النمرة د سفيان ماكايجاوبش.. ديك الليلة مانعستش.. الصباح ثاني صونيت لسفيان كالي بلي راه فالسبيطار.. مشيت للسبيطار كانجري.. لقيت تما الواليد ديالو.. كايبكي.. بقيت كانسول تا كالولي نور الدين تضرب ضربة خايبة وماقدروش ينقدوه ومات..
نور الدين مات وخلا عائلتو.. مات وخلا ميمتو ماسيفطهاش للحج وماشرالهاش الحوايج لي بغات.. نور الدين ضيع حياتو.. ودوك لي دفعوه وكلاولو عقلو راهم بيخير.. وغايخسرو عليه بيان ويآمبريميوه ويعلقوه فباب لافاك..
نور الدين مات وخلا ميمتو كاتعاني..
..
النهاية
..
..
العبرة : لي بغا يقرا يقرا لراسو ويبعد عليه هاد التخربيق راه ما منوش وماكايوصل لوالو..
ليست هناك تعليقات :
إرسال تعليق