بغيتو تعرفو علاش هادشي كايوقع وشكون كايخلي أغلب الدراري يدلو راسهم ويقدسو البنت ؟؟
..
..
..
ملي كنا صغار تربينا فمجتمع طغات عليه كلمة حشومة وعيب.. ملي كنا صغار رباو فينا فكرة أن البنت فضفة والولد فضفة أخرى.. ملي كنا فالروض فالمدرسة كانو كايديرولنا صف دالبنات وصف دالدراري.. وكان مستحيل شي دري يقدر يكلس حدا بنت.. وحتى إلى حاول غايتعرض لعقاب شديد.. كايبدا أولا أن البنت تقدر تغوت أو تبكي لأنه كلس حداها دري.. لأنهم رباونا على أن الولد بالنسبة للبنت وحش.. والبنت بالنسبة للولد شيء عالي مايمكنش ليك توصلو.. غرسو فينا فكرة أن الحديث بين بنت وولد من الجرائم لي كايعاقب عليها قانون وهمي دخلوه لدماغنا بسيف.. مارباوناش من صغرنا أن الولد والبنت في طريق واحد.. ما رباوش فينا الإحترام فالتعامل مع البنات والبنات مارباوش فيهم أن الولد إنسان بحالهم.... هادشي لي خلا فرااغ عاطفي كبير عند كلا الجنسين (الفراغ العاطفي ماشي هو هذاك لي كايفهموه المكبوتين وعلاه أنه مصاحبة ومضاجعة وووو.. )
ملي كايطلع الدري للإعدادي وكايحس براسو شيئا فشيئا قادر يكسر دوك القيود لي تربى عليهم.. كاتحس بالدري ملي يهضر مع بنت كأنه دار إنجاز عظيم.. وإلى جاوباتو صاافي كايحس بأنه تمرد على قوانين لازماتو صغرو كامل.. وكايبقى الأمر هاكدا طيلة حياتو.. وكل مرة تحدث لبنت كايحس بأنه تمرد على ديك القوانين....
..
لهذا ماتلوموش ملي تشوفو بنت كاتنشر منشور هنا كوووولشي كايجاوبها وبالتفاصيل .. ويآجوطيوها ويآجوطيو كاع البنات لي دارو جيم تما.. في حين الدري إلى سول فحاجة ضرورية تا واحد ماكايتسوقلو وكايبقى المنشور ديالو تما تا يغمال وحد مايجاوبو.. هادشي جاي من التربية من الصغر لي خلات دوك الدراري عاد لقاو متسع فين يتمردو..
هذا بالنسبة للناس العاديين..
أما النوع الآخر فكايكون مريض نفسيا وفاقد ثقتو فنفسو.. فالواقع كايكول مع راسو أنا بهاد الفصالة بهاد الملامح نعجب شي بنت وتهضر معايا ؟؟ أكيد لا.. كايبقى هاكداك تا كاتراكم ديك الأفكار فدماغو وكاتشكل ليه عقدة.. وكايولي الفايسبوك ميدان فين يهضر بحرية كايختفي خلف حساب وتما كايدير طريق باش يعمر الفراغ العاطفي ويهضر مع البنات.. وكاين لي كايدير تصاورو وكايختار دوك التصاور بعناية وأحسن صورة عندو كايحطها.. وهنا كايهين نفسو وهو ماعايقش..
لأنهم فالصغر حبسوه من حاجة لي عادية مارباوهش أن البنت إنسان ممكن تهضر معاها عادي وكيفما كاتكلس حدا صاحبك دري وماكاثارش الغرائز ديالك راه ممكن تكلس حدا بنت كاتقرا معاك بشكل عادي بدون ماثار الغرائز ديالك.. ولكن للأسف فصغرنا رباونا على أن البنت مجرد جسد ومثيرة للغرائز وحشومة تكلس حداها أو تتمشى معاها أو أو أو.... هادشي لي خلانا ولينا نشوفو هادشي كامل وفجميع الميادين ماشي غا المؤسسات التعليمية.. غا هو كاين لي كايربي نفسو من بعد وكاين لي كايبقى مأثر بديك العقدة دالصغر.. !!
ليست هناك تعليقات :
إرسال تعليق