مسلسل "كفاح الوصول"

مسلسل "كفاح الوصول"..
__________
الحلقة الأولى
__________
.
.
.
.
.
.
.
.
.
.
..
.
غادي تبدا الأحداث ملي سعيد دا الباك .. دفع لبزاف د المدارس ولكن حتى مدرسة ماقبلاتو فكان الحل ديالو هو لا فاك .. تسجل سعيد فلافاك كان جاه داكشي ممل وماعاجبوش .. الوقت كايدوز وسعيد ماكايدير والو .. وصلات وقت الإمتحان ماكان حافظ والو مشا ضبر على شي نقلات .. دوز الإمتحان وقدر يفاليدي 3 دالموديلات بالنقيل وبقالو موديل آخر للراطراباج .. سعيد عجباتو القضية ومشا عاطيها للزهو والنشاط ومامسوقش .. ديك الوقت كانت جات مع لابورس .. شد لا بورس وسمع واحد صاحبو بلي غايهبطو لواحد المدينة قريبة حيت تما كاينة واحد دار الدعارة فيها بنات 16 و17 عام .. يعني غادي يمشيو يفسدو .. سعيد عمرو عاش داك الشي المهم تافق هو وصاحبو يتلاقاو مع 7 دالصباح فالمحطة .. صاحب سعيد كان إستغلالي وكان عارف أن سعيد نية بزاف .. فكان باغي يستاغلو باش هو يخلص كولشي .. المهم جا الوقت شدو الكار مشاو .. تما فديك البلاصة صاحب سعيد كان عارفها مزيان وقضا غراضو .. أما سعيد دخل عند وحدة ولقاتو نية وضرباتلو الصرف بدون ما يدير والو هو تقولب وعند بالو دار شي حاجة .. المهم رجعو ولقا راسو طب فديك لابورس كاملة ومشات فالخاوي .. رجعو وبقات أيام قليلة للراطراباج .. مشا وجد النقلة ديالو ..
وفالقاعة د الإمتحان جبد كاينقل وماكانش عارف بلي واحد من دوك الأساتذة لي فالحراسة أصعب أستاذ وماكايرحمش .. المهم بدا كايكتب وداك الأستاذ شك فيه وعرفو كاينقل جا كالو نوض وقف
سعيد : ما عندي والو آ أستاذ
الأستاذ : وقف دابا نشوفو..
سعيد : ها هو واقف
الأستاذ : هضر بإحترام
سعيد ملي وقف طاحو النقلات كاملين
الأستاذ : جيب وراقك وعطيني الرقم الوطني ديالك
سعيد : علاش آ أستاذ
الأستاذ : غاندير بيك تقرير ومحاولة غش
سعيد : لا آ أستاذ حرام عليك .. شوف آ أستاذ ها أنت حيدلي الورقة وعطيني ورقة أخرى نعاود من جديد
الأستاذ : ماتزيدش تناقش معايا التقرير غايتدفع للإدارة مع ورقتك هذا هو القانون آ ولدي..
سعيد : عيب عليك آ أستاذ واش ما بقيتش فيك دير راسك بلاصتي ولا ديرني بلاصت واحد من ولادك..
الأستاذ : كانطلب منك تنساحب باش ماتزيدش تكبر الأمور على راسك وتكون العواقب وخيمة..
سعيد خرج وكايخسر الهضرة وكاره الوضعية ولكن ضغيا برد الوضع حيت كال مع راسو موديل ما دا ما جاب راني دخلت 3 وهاد الموديل نعاودو العام الجاي هانيا .. دازت الأيام وعيطلو صاحبو فالتيليفون راه تعلقو النتائج مشا يشوف شنو دار داك الأستاذ واش بصح دفع التقرير ولا لغاه..
..
يتبع....
.
.
.
.


..
مسلسل "كفاح الوصول"..
...
________
الحلقة الثانية
________
.
.
.
.
.
.
.
.
.
.
..
.
سعيد لبس حوايجو وطلع لافاك لقا النتائج تآآفيشات .. بدا كايقلب على سميتو مالقاهاش .. تعجب ومافهم والو وماعرفش دابا واش مفاليدي ولا لا .. مشا للسكولاريطي .. لقا تما واحد الموظف..
سعيد : السلام آآ أستاذ ..
الموظف : عليكم السلام آآولدي آآش حب الخاطر
سعيد : أنا آ أستاذ مشيت ل لي ليسط د النتائج ومالقيتش سميتي..
الموظف طلب من سعيد الإسم والرقم الوطني .. مشا دخل المعلومات فالبيسي ورجع عندو.. كالو آآولدي أنت تحرمت من السوميسطر كاملة عندك حالة غش
سعيد : كيفاش آآ أستاد ولكن أنا تقبطت غير فموديل واحد علاش يمشيولي الأخرين..
الموظف : هذا هو القانون آآولدي .. وحمد الله ملي ما وقفوكش من الدراسة
سعيد تصدم وخرج من لافاك طالعلو الدم .. كانت ديك الوقت العطلة د إنتهاء الدورة الأولى .. مشا جمع حوايجو ورجع لدارهم حيت هو من مدينة أخرى وساكن فالحي الجامعي .. رجع للدار وبقا ساكت ما عرف مايكول لصحاب دارهم .. دازت شي أيام وصلات الأخبار كاملة للواليد ديالو .. (صحاب الحسنات موجودين) .. جا عندو باه كايغوت بقا على ديك الحالة ديما مارضو فراسو .. واحد النهار سعيد طلعلو الدم وهز صاكو وخرج من الدار .. وصحاب دارهم عند بالهم رجع للقراية وتا هو داكشي لي كالهم .. ولكن هو مشا هرب لواحد المدينة أخرى عند واحد صاحبو .. تما ضبر على خدمة كايبريكولي فيها .. نسا القراية..
واحد النهار كالو صاحبو سعيد واش مامعولش ترجع تقرا
سعيد : وا راه عاودتلك آآش وقعلي معاهم والله ما عندي كانة نرجع..
صاحبو : واش أنت مريض سحابلك هاد البريكولات غايدومولك
سعيد : ماتمرضنيش عافاك خليني عليك
صاحبو : أنا غير هضرت معاك أوصافي..
سعيد مرضاتو هضرت صاحبو مشا خرج من عندو ومشا كرا بوحدو وبقا خدام .. المهم تا خرجات لابورس الثانية .. تجمعات مع الخلصة د الخدمة فاش خدام وجمع صريف .. وشرا بيسي وموديم .. سعيد فتح كونط فايسبوك وبدا كايتكونيكطا .. واحد النهار كالس كا يآجوطي فالبنات آآكسيبطاتو وحدة..
بدا كايهضر معاها كالتلو أنا سميتي لبنى.. وأنا من المدينة فلانية
سعيد : وايلي أنا ماشي من تما ولكن كانقرا تما ف لافاك..
لبنى : متشرفين خويا .. أنا كانقرا فالسيزيام
سعيد : آآه متشرفين .. دخلتيلي لخاطري ماكرهتش ملي نجي نشوفك
لبنى : علاه أنت ماراكش هنا راه باديا القراية
سعيد : لا أنا دابا مسافر شويا
لبنى : آآه مزيان..
سعيد بقا شي أيام قليلة ورجع للحي الجامعي و لافاك..
هضر مع لبنى وكاليها نتلاقاو.. دارت معاه الوقت والبلاصة .. والغد ليه شد طاكسي ومشا يتلاقا معاها..
..
يتبع....
.
.
.



..
مسلسل "كفاح الوصول"
..
___________
الحلقة الثالثة
____________
.
.
.
.
.
.
.
.
.
..
.
شد سعيد الطاكسي ومشا هبط لليسي فاش كاتقرا لبنى حيت كان بعيد شويا على لافاك .. مشا للبلاصة فين دارت معاه شويا وها هي جات..
لبنى : السلام عليكم .. سعيد هذا ياك ؟؟
سعيد : وي ختي هو هذا .. أنت لبنى لا ؟؟
لبنى : وي هي أنا..
سعيد : تبارك الله .. ماكنتش كانتصور غاتكوني بهاد الجمال..
لبنى : شكرا..
تحركو لواحد البلاصة تما ورا الليسي وكلسو وسعيد كان مرتابك وهاد العالم د البنات جديد عليه .. ولكن واخا هاكاك ديك الخرجة لي هرب عند صاحبو وخدم تعلم فيها بزاف د الحوايج .. كايعرف يهضر وكايعرف يتعامل .. وديك النية لي كانت فيه ما بقاتش وولا حافظ سواريه مزيان .. المهم كلسو وبداو كايهضرو.. سعيد : لبنى يا ما مشغولة آختي وصدعتك .. ولا ياكما تكوني مرتابطة ولا شي حاجة ويشوفني معاك .. ما بغيتلك تا مشكل آختي ..
لبنى : لا لا ماكاين والو أنا كنت مرتابطة ولكن تفارقت معاه بسباب شي مشاكل..
سعيد : آه مزيان.. نجيك من الآخر آآختي .. أنا عجبتيني بزاف وهادشي ملي كنا كانشاطيو وعجباتني عقليتك .. ماكايهمنيش الزين بقدر ماكاتهمني العقلية و أنت تبارك الله جمعتيهم بجوج..
لبنى : بصراحة فاجأتيني بهاد الهضرة ما عرفت ما نكوليك .. واش تعطيني شويا الوقت نفكر..
سعيد : واخا خودي راحتك..
صافي مشاو كل مشا لغراضو .. الغد ليه تكونيكطا معاها و كاليها لبنى شنو درتي فداكشي كاع مارديتي عليا
لبنى : لا ماشي داكشي غير كلت تا نتلاقاو أخسن
سعيد : آآه واخا . إمتا عندك شي وقت.
لبنى : غدا مع 17.00
سعيد كان غايطير من الفرحة واخا ماكانش عارف القرار شكون هو واش الرفض ولا القبول .. جا النهار الأخر وصلات الوقيتة شد الطاكسي ومشا عندها وكالتلو بلي راها وافقات كان فرحان .. المهم مشات العلاقة ديالهم عادي .. وصلات العطلة د الصيف رجع هو لدارهم .. هنا ثاني غايبدا الصداع مع الواليد ديالو .. نوض الخمار وأنت كالس كي الحلوف واش ما عندك نفس .. داز عندو داك الصيف بحال الجحيم .. وصلات البداية د العام الأخر .. سعيد كره من لافاك وبغا يبدل .. مشا تسجل ف ISTA وتقبل .. وكان خاصو 600 درهم ديال التسجيل .. باه مابغاش يعطيهالو وبقا مدابز معاه و والو .. سعيد ماكان عندو تا حل ومشا تسلفها عند صحابو .. تسجل عادي و الأمور غادية عادي .. واحد النهار بدا كايهضر هو ولبنى و ديك الوقت ولا كايبغيها بزاف .. المهم بداو يهضرو و وصلو لقاضية المو د باص ديال الفايسبوك .. تافقو كل واحد يكون عندو المو د باص ديال الأخر .. سعيد كان دكي بزاف ولبنى كانت غبية شويا .. هو شد المو د باص مشا كايقلب الميساجات القدام و بالضبط الأيام الأوالى فين تعرف عليها كايشوف هضرتها مع صحاباتها و الناس لي كاتعاودلهوم كولشي .. حيت الميساجات الجداد كانت لبنى ماكاتهضرش كاع فهادشي وكانت كاتبين أنها صادقة باش سعيد يشوف داكشي ويزيد يطيح فيها .. ولكن هو كان دكي
وهنا غادي يتصدم سعيد بداكشي لي غايشوفو..
..
يتبع....
..
.
.
.



..
مسلسل "كفاح الوصول"
..
_________
الحلقة الرابعة
_________
.
.
.
.
.
.
.
.
.
.
..
.
سعيد فتح الكونط ديال لبنى ورجع للميساجات ديالها مع صاحبتها .. وبدا كايقلب .. ولقا الهضرة ديالهم
بجوج
أسماء : عاوديلي كيداير فارس أحلامك الجديد هههه
لبنى : هههه مسكين نية وباينة عمرو جرب هاد التخربيق دالمصاحبة..
المهم مشاو الميساجات الأخرين عادي ما فيهم تا حاجة مهمة تال داك التاريخ فين كان سعيد تلاقا مع لبنى وعتارفليها ب حبو وبلي كايبغيها.. تما دخل للكونفيرصاصيون لي كاتوافق داك التاريخ
لبنى : أسماء عرفتي راه تلاقيت سعيد اليوما و كاليا كايبغيني والسيد طاح ديال بصح
أسماء : وايلي .. إوا وأنت ؟؟
لبنى : مالي انا ؟؟
أسماء : واش ماكاتحسي بوالو من جيهتو ؟؟
لبنى : الله يهديك أنا راه درتو غير باش ننسى ياسين والسيد نيت طاح على وجهو..
سعيد فالبلاصة مشا هضر مع لبنى وطالعلو الدم .. وبدا كايكوليها واش أنا مشيت معاك بنيتي وكانبغيك وأنت كدبتي عليا .. واش هادشي لي نستاهل .. صافي تزايدو فالهضرة وتفارقو ..
كانت تما الدورة الأولى سالات الدورة الأولى وسعيد فالعطلة مشا رجع لديك المدينة فاش كان خدام باش يجمع مصروف .. المهم خدم دوك الأيام وباقي ما تخلص حيت مازال ماوصل وقت الخلاص وخاصو ضروري يرجع يقرا حيت راكم عارفين القوانين ديال ليسطيا ماشي هي لافاك .. كاين الغياب والصرامة .. المهم رجع وبقا شي أيام تا وصلات الوقت ديال الخلاص .. مشا للإدارة يطلب الإذن د الغياب كالهم بغيت سيمانة ضروري حيت خاصني نمشي لواحد المدينة خدمت وخاصني نمشي نتخلص .. المدير مابغاش كالو أقصى مدة هي 3 أيام .. ناض الغوات تما وضارب مع المدير وضربو بواحد الدفتر و كالو الله ينعل بوكم أنتوما وقرايتكوم .. وخرج هرب من ليسطيا وسمح فيها ..
سعيد صافي كره كولشي وطالعلو الدم من كولشي .. تا حاجة ماكاتصدقلو
هز صاكو ومشا لديك المدينة يتخلص بقا كايتسنا نهار السبت .. فديك الوقت سمع أنه كاين شي واحد كايحرك للخاريج وكايضبر لبنادم الخدمة تما و كولشي .. ولكن طالب مليون ونص .. سعيد ما عندوش وكالها لصاحبو ..
سعيد : مانكدبش عليك سمعت شي هضرة د الحريك وبغيت نزطم..
صاحبو : مريض أنت واش عارف فين غادي
سعيد : عافاك ماتمرضنيش بالنصائح ديالك راه هادشي لي خلاني نهرب من الدار
صاحبو : واش أنت عندك مليون ونص
سعيد : لا
صاحبو : هاد خينا راه كايكون ديما .. خدم ومن هنا للصيف تقدر تجمعها
سعيد : أوكي صافي
مشات الأيام واحد النهار سعيد توفاتلو الواليدة ديالو .. هضر معاه باه فالتيليفون مابغاش يجاوبو .. اتاصل بيه بإستمرار وملي جاوبو كالو سعيد ولدي أمك ماتت .. سعيد صافي تصدم .. سمح فالخدمة ورجع للدار .. بقا غير فمدينتو كايبريكولي مرة مرة وبقا فدارهم..
واحد النهار كان كالس وهو يجيه ميساج من نمرة غريبة
سلام سعيد انا لبنى .. عارفاك راك كارهني .. ولكن آآ سعيد عافاك قرا الميساج .. أنا محتاجة نهضر معاك .. ماكاين لي يفهمني من غيرك و يخفف عليا ويعطيني حل .. غير سمعني ومن بعد إلى بغيت تسد عليا سد..
سعيد قلبو حنين بزاف دغيا كايتأثر وجاوبها
سعيد : واش راكي فاتحة الفايسبوك
لبنى : وي
سعيد : أوكي هانا نآآجوطيك ونكملو الهضرة تما
..
يتبع....
.
.
.



..
مسلسل "كفــاح الوصول"
..
_____________
الحلقة الخــامسة
_____________
.
.
.
.
.
.
.
.
.
.
..
.
سعيد آآجوطا لبنى وبداو كايهضرو..
سعيد : وي لبنى ياك لاباس شنو عندك..
لبنى : كولي بعدا واش باقي حاقد عليا
سعيد : هاداك موضوع آآخر خلينا دابا فهاد الموضوع ديالك راكي شوشتيني..
لبنى : سعيد مابغيتكش تقلق وأنا والله إلى حشمانة منك ولكن انت لي تقدر تعاوني عافاك محتاجاك..
سعيد : وي كولي شنو كاين
لبنى : بصراحة آآ سعيد أنا من موراك رجعت مع ياسين المهم تال مؤخرا ووقع بيناتنا شي صداع حيت هو طلب مني....... المهم راك عارف .. وانا مابغيتش .. ومن بعد ولا كايهددني بتصاوري لي عندو وبالميساجات د الفايسبوك .. وأنا بغيتك تعاوني .. خاصني كيندير باش ناخد الفايسبوك ديالو وأنا عارفاك كاتعرف شويا فهادشي
سعيد : وأنت آآش داك تصوري معاه ولا تعطيه تصاورك
لبنى : وا راه زغبني الله وتعميت وكنت كانبغيه
سعيد : الحب دمرتوه بأفكاركم .. المهم انا ماكانعرفش بزاف فالبيراطاج ولكن عندي صاحبي مجهد فهادشي يعاونا ..
عطاتو لبنى الفايسبوك ديال ياسين ومشا هضر مع صاحبو وكالو المشكل .. صاحبو قدر يعرف المودباص د ياسين غير بسهولة .. حيت ياسين كان ما مأمنوش .. المهم رجع سعيد كالها ل لبنى وعطاها المو د باص .. مسحات كولشي و ديزاكتيفات الفايس د ياسين ..
المهم ورجعات لبنى كاتهضر مع ياسين .. كالتلو شكرا بزااف أنت ولد الناس ماكنتش كانتصور غاتساعدني هاكدا و دابا آ سعيد بغيتك تسمحليا على كولشي .. أنا ماعمري نلقا بحالك .. أنا باغية نرجع معاك وكانواعدك غادي نتبدل..
سعيد : ولكن جرحتيني بزاف
لبنى : أنا كانعتارف بالخطأ ديالي وعافاك سمحليا .. وكانواعدك غاتلقاني كيما تمنيتيني..
سعيد : ماعرفت مانكوليك .. واش عندك شي وقت نتلاقاو
لبنى : آآه غدا خاوية العشية نتلاقاو مع 16.00
سعيد : أوكي
وصلات الوقيتة ومشاو تلاقاو بداو كايهضرو ولبنى كاتحاول تقنع سعيد وبدات كاتبكي وكاتبينلو أنها ندمات بزاف .. سعيد هز يدو ومسحلها دموعها وكالها صافي أنا نعطيك فرصة أخرى ونبداو صفحة جديدة ونساي لي فات.. لبنى فرحات ومشاو المهم الأمور ولات غاديا عادي .. داز العام وسمع سعيد أنهم دخلو شي برونش جديدة لافاك .. سعيد عجباتو البرونش ومشا رجع تقيد فلافاك .. تعكسو معاه فالأول وكالولو هاصك باك جديد وبزاف د الروينة مي بقا معاهم سعيد تا قبلوه يتسجل .. سعيد دار عقلو فالقراية وزير راسو ودازت الدورة الأولى وفاليدا الموديلات ديالو كاملين .. سعيد موراها سمع انه كاين واحد الكونكور وطالبين صحاب الباك.. وهاد الكونكور فيه الوراق بزاف وخاصهم الفلوس وهو مابقا عندو والو .. مشا كالها لباه وهي تسمعو مرات باه (حيت تزوج من بعد ما مات أم سعيد) سمعاتو وجات كاتغوت .. واش باقي أنت نصرفو عليك سير ضبر على راسك سوقك هاداك .. سعيد مشا عند واحد الدري تسلف عندو وكالو تخرج لابورس نردهوملك .. قاد سعيد وراقو دفع .. عيطولهوم يدوزو سعيد دار كولشي وماتقبلش وجا عندو واحد كالو إلى بغيتي ندوزك أنا هو المكلف .. جيب 3 دالمليون وماتكولها لتا واحد .. سعيد ما عندوش .. سمح فالكونكور ورجع يكمل القراية ف لافاك
ولبنى ولا كل مرة يتلاقاها كاتهضرلو غير على صاحبتها .. عرفتي آآ سعيد أسماء كاتمشي مع صاحبها للدار .. وكايبغيها بزاف .. عرفتي آ سعيد كالتلي أسماء صاحبها عنقها .. أسماء فعلها تركلها..
سعيد بدا كايوسولو الشيطان ومشات منو ديك الحشومية وكال مع راسو مادام هادي كاتعاودلي هاكا راه تكون باغيا داكشي..
دار معاها يتلاقاو فواحد البلاصو ومشا داها وشويا قدر يزعم وباسها فوجهها....
..
يتبع....
.
.
.



..
مسلسل "كفاح الوصول"
_____________
الحلقة السادسة
____________
.
.
.
.
.
.
.
.
.
.
سعيد زعم على لبنى وباسها فوجهها .. ماكالت والو بقات غير كاتشوف فيه .. شويا وبقا معنقها .. وهو مابقاش معنقو البوسان فالوجه شاف داكشي ساهل ولبنى باغية داكشي .. وبدا كايكوليها شنايفك زوينين ضحيكتك زوينة ولكن مازال مازعمش ديك الزعامة .. بدا كايقيسلها خدودها شويا زعم وكلسو فداك الوضع شحال ديال الوقت .. شويا بداو كايسمعو التخرشيش بين الشجر .. طل سعيد لقاه واحد الراجل فلاح مكلف كايسقي دوك الشجر .. صافي وكالتلو لبنى يالاه نتحركو .. مشاو صافي كلسو فواحد البلاصة تا وصلات 18.00 وزادو بحالهم .. بقاو كايتلاقاو عادي دازت تقريبا 15 يوم واحد النهار كالسين .. وكالتلو سعيد ..
سعيد : وي
لبنى : آآش هاداكشي وقع ديك النهار واش أنا وليتليك سلعة رخيصة لديك الدرجة.
سعيد : علاش ما كلتي هاد الهضرة ديك النهار و تال دابا عاد جابدة الموضوع.
لبنى : كنت حشمانة وعقلي ماكانش معايا..
سعيد : صافي سمحيليا تا انا ماعرفت آآش وقعلي .. مابغيتش نوسخ علاقتنا
لبنى كانت أكبر خداعة .. هي الرجوع ديالها معاه فقط غير باش تعمر الفراغ ديالها .. وجبدات معاه داك الموضوع واخا دازت عليه الوقت حيت كانت كاتقلب تفارق معاه من جديد .. حيت فديك الأيام .. رجع ياسين كايهضر معاها ومحاول يقنعها ترجع معاه وبقا معاها تا رجعات معاه .. ولات لبنى شادة معاهم بجوج .. لبنى كانت خداعة ولكن الغباء ديالها كان كبير بزاف .. مابدلاتش المو د باص .. سعيد فدوك الأيام شاف البنت تبدلات .. ناض فتح الفايسبوك ديالها ولقاها رجعات مع ياسين وكاتهضر معاه .. وكانبغيك ما كانبغيك .. مانسيتكش .. واش عقلتي على الكاضو لي جبتيليا...
سعيد ما عرف مايدير بقا ساكت ودار ماعلا بالو والو .. كاليها نتلاقاو .. بقات كاتهرب من الملاقيا تا قنعها .. صافي وكالها شنو شاف .. وكالها بسلامة..
صافي تفارقو..
سعيد رجع يكابل قرايتو .. كانت واحد العطلة فيها 10 أيام سعيد رجع للدار .. العداب والمعاناة مع الواليد ديالو ومراتو .. واحد النهار ناعس وجا باه خابط عليه الباب..
الواليد ديالو : وا داك الحلوف شفتك أنت ناعس كي البهيمة هنا ماعندك شغل
سعيد : آ الواليد راه عندنا عطلة وجيت نرتاح من العيا د القراية ماشي للصداع..
الواليد ديالو : كاتهز عليا يديك الخمار
سعيد : لا الواليد حاشا..
دخلات مرات باه فالهضرة .. الناس راه كايقراو هو واقيلا غير كايكدب
سعيد : سكتي أنت ماشي شغلك انا كانهضر مع الواليد..
الواليد ديالو : سكت البغل هادي راه مراتي .. شنو استافدت منك أنت كاع غير مضيعني .. خرج عليا من داري .. قرانك وصلو فين وصلو وأنت باقي ناعس .. من لي كنتي صغير وأنا غير كانصرف عليك .. ما درتيلي والو غير مضيعني .. واش نبقا أنا مكابلك غير أنت .. الرجال كانتلاقا معاهم وكايكولولي ولادنا دارو ولادنا فعلو
سعيد : هادوك الواليد عندهوم الفلوس كايدفعو على ولادهم الملاين يوظفوهوم وأنا ما عندي والو
الواليد ديالو : ماكاين لا ملاين لا ستة خمص هادوك خدمو وجتاهدو ما نعسوش بحالك الكلب .. ماعندي ماندير بيك .. ما انت ولدي ما انا باك .. خرج عليا من داري وماتعاودش دور بيا ولا تجي لهنا..
سعيد خرج كايبكي فالزنقة ما حس براسو تا لقا راسو فالمقبرة .. مشا كلس حدا قبر ميمتو كايبكي كايبكي مدة طويلة .. سعيد ظلامت الدنيا فعينيه .. الخيانة د لبنى .. باه طردو .. مو ماتت .. مابقا كايشوف والو قدامو..
سعيد مشا لواحد القنطرة وبغا ينتاحر...
..
..
يتبع.....
.
.
.
.



مسلسل "كفاح الوصول"
_____________
الحلقة الســـابعة
_____________
.
سعيد مشا وقف فالقنطرة وبدا الشريط د حياتو كــامل وبغا يديرها و ينتاحر .. فديك اللخظة بقا كايفكر فكولشي و بالصدفة كاتدوز حداه إكرام (إكرام هادي صديقة فايسبوكية ديالو كانت أكثر من ختو كان كايعاودلها كولشي .. كانت ساكنة فمدينة بعيدة ولكن أصلها من مدينة سعيد وكانت فكل عطلة كاتجي عند جداتها .. وإكرام كانت بنت الله يعمرها دار .. وأخلاقها كبيرة وقلبها كبير) .. شافتو فديك الحالة وجات عندو .. سعيد مالك.
سعيد : إكراام أنت هنا .. من فوقاش ؟؟
إكرام : عاد جينا الصباح .. بقيت كانتسناك غير تكونيكطا باش نكولهاليك.. وا كولي مالك و آآش هاد الحالة..
سعيد : إكرام .. صافي كولشي سالا و حتى حياتي غادي نساليها عييت
إكرام : واش أنت أحمق .. آآش هاد الهضرة كاتكول..
سعيد : عالم بيا غير الله آآختي..
إكرام : أجي أجي نكلسو بعدا فداك الكرسي وعاودليا..
سعيد دار الخاطر لإكرام حيت كانت عزيزة عليه بزاف .. مشاو كلسو وبدا كايعاودليها على الواليد ديالو وشنو دارلو .. جاوباتو
إكرام : سعيد كيما كان الحال هاداك راه الواليد ديالك .. ماتديرش هاد الخالة فراسك .. عاد هادي فرصة باش تكون قوي وتديها فقرايتك .. وأنت معاودلي أن القراية وليتي فيها مزيان وموديلاتك مفاليديين بنقط مزيانة
سعيد : آآه آآختي ولكن كولشي غضرني ها شنو دارتلي لبنى وها آآشنو دارت..
إكرام : سعيد هادشي ماعاودتوليش وموالف ماكاتخبي عليا والو .. وأصلا كون عرفت هادشي ماغاديش نخليك ترجعع معاها .. ديك البنت غير من خلال ما عاودتيلي عرفتها غير كاتضحك عليك..
سعيد : ماعاودتليكش حيت حشمت منك .. كانحتارمك بزاف وداكشي لي درتو خفتو يقلل من قيمتي عندك
إكرام : دابا لي وقع وقع .. عرفتي شنو دير .. واحد الجمعية دايرة واحد التكوين فالإعلاميات .. رجع للحي الجامعي وتما التاحق بيهم ودوز هاد العطلة تما
سعيد : الله يهديك فين راهم الفلوس
إكرام : ماكاين لا فلوس لا والو : هادي غير جمعية دايرة تكوين ديال شهر فابور لي بغا يتسجل وضغيا سربي راسك راه داكشي محدود.. دوز معاهم هاد 10 أيام تستافد علاين توصل القراية ف لافاك..
سعيد فكر فهضرة إكرام لقاها معقولة .. وسعيد كال لإكرام .. عرفتي آآختي تا كانوصل لوحد الوقت كانحقد على البنات كلهم بصفة عامة .. كانتفكرك أنت كانكول باقي بنات الناس..
سعيد رجع للحي الجامعي مشا لديك الجمعية بدا كايحضر لدوك الدروس .. هو ديجا عندو شويا مع الإعلاميات .. وزاد تبازا شويا بدوك الدروس..
وصلات القراية ف لافاك . رجع سعيد وزاد داها فقرايتو مزيان .. جات وقت الإمتحان .. وجد سعيد مزيان للإمتحان مشا دوز وفديك الوقت ديال الإنتظار د النتائج مشا ضبر فخدمة فواحد القهوة.. واحد النهار كالس كايسربي للكليان .. وبدا كايصوني التيليفون .. كان صاخبو لي ف لافاك هو لي كايصونيلو..
آآلو سعيد راه تآآفيشاو النتائج..
سعيد مشا عند مول القهوة وكالهالو صافي كالو سير وماتعطلش راك عارف اليوما كاين الماطش والقهوة غاتكون عامرة وخاص الخدمة .. كالو صافي كون هاني نشوف النتائج ونرجع..
سعيد شاف النتائج ودموعو سالو بالفرحة .. لقا راسو مفاليدي وبنتائج مزيانة بزاف..
سعيد ما طولاتش الفرحة ديالو حيت تفكر أنه هادا هو العام الأخير عندو فالحي وحتى فلابورس .. يعني خاصو العام الجاي يكري وهو ماعندوش .. رجع
مول القهوة : آآمضرة كي كانو النتائج
سعيد : مزيان الحمد لله آلباطرون .. ولكن كاين مشكل
مول القهوة : شنا هو ؟؟
سعيد عاودلو المشكل ديال الكراء والمصروف..
مول القهوة : كون هاني من هاد الناحية أنت ولد الناس وتستاهل الخير .. أنا عندي دار كانكريها للطلبة .. غانعطيك واحد البيت واخا صغير شويا ولكن غير صبر ..
سعيد : انا غير نلقا فين نتستر..
دوز سعيد الصيف خدام فالقهوة وسعيد سكن فديك البيت ..
لبنى كانت طايحة فياسين وهو كان غير كايبروفيطي فيها ومستاغلها .. واخد النهار كالها .. لبنى خاصني شي فلوس ضروري .. مشات مالقات والو .. ومشات للماريو د ماماها لقات واخد الدبالج و واحد السلسلة .. سرقاتهم وباعتهم .. جابولها شي 3000 درهم .. عطاتهم لياسين .. ماماها رجعات للدار مالقاتش الدهب .. سولاتها ومابغاتش تكولها بقات مزيراها .. لبنى مابغاتش تطيح بياسين .. فكرات شويا وطاحلها سعيد فالبلان وبغات تلصقهالو .. وكالتلها راه واحد الدري سميتو سعيد كانعرفو مصاحبة معاه كايهددني بشي تصاور ديالي وكالي راه عراني وغاينشرهوم وهددني وكالي إلى ماجبتلوش الفلوس غاينشرهوم..
مامات لبنى سولات تا عرفات فين ساكن سعيد مشات للدار وبدات كاتدق بقوة .. خرج عندها سعيد .. كالتلو انت سعيد . كالها آآه .. كالتلو آآجي دابا معايا للكوميسارية بلا شوهة..
سعيد مابغاش..
مامات لبنى شعلات وزادت تعصبات و...
..
يتبع.....
.
.
.
.



..
مسلسل "كفاح الوصول"
..
____________
الحلقة الثامنة
_____________
..
..
..
أم لبنى : كيفاش ماغاديش تمشي معايا واش عارف مع من كاتهضر..
سعيد : شكون تكوني كاع فملك الله
أم لبنى : الشفار إلى مارباوكش والديك يربيوك المخزن
سعيد : أجي أجي انت لي من الصباح ومارضاني وتعايري فين كاتعرفيني
أم لبنى : أنا مامات لبنى .. لقيتيها صغيرة الشفار وضحكتي عليها .. المخزن هو لي يعرفلك..
أم لبنى مشات للكوميسارية شكات بسعيد وعاوداتلهم شنو كاين وبلي استاغل بنتي وهددها بشي تصاور وبزز عليها تسرق الدهب وتجيبلو الفلوس .. البوليس جاو كايدقو على سعيد مالقاوهش .. مشاو للقهوة مينطوه وخرجوه .. مشاو لكومييسارية بداو كايحققو معاه وكالهم أنا ماهزيتلها ذهب ما والو .. أنا كانعتارف أنني كانعرفها وكانت صديقة ديالي ولكن هادشي دازت عليه مدة طويييلة ..
لبنى كيما كلتلكم كانت مكلخة بزاف .. واخا كاتخون وكاتخلوض ولكن الغباء ديالها كان كبييير .. المهم البوليس ماكايخليو تا سؤال .. سولو لبنى إمتى عطيتي الذهب لسعيد .. كالتلهم الثلاثاء الفايتة مع 17.00 .. وكالهم سعيد أنا نهار الثلاثاء كنت خدام فالقهوة النهار كامل .. كان الكلاسيكو د البارصا و الريال والقهوة كانت عامرة بزاف وماخرجتش وعندي الشهود .. جاو الشهود لي هوما - مول القهوة - و 4 د السربايا كايخدمو مع سعيد فالقهوة - شهدو وكالو نفس الهضرة لي كال سعيد .. صافي سعيد خدا البراءة ديالو وطلقوه البوليس .. وعاد من بعد زيرو لبنى وكراتلهم بكولشي..
سعيد صافي رجع وكاره حياتو حيت المشاكل ديما تابعينو .. سالا الخدمة داك النهار ورجع بالليل للبيت وبقا متكي كايفكر ودموعو مابغاتش توقف .. وكايكول لراسو الله يا ربي شنو درت فهاد الحياة .. بدا كايشكي للحيوط وماعندو لي يفهمو .. شويا تفكر إكرام حيت كانت كاتخفف عليه شويا .. سيفطلها ميساج كالها إكرام تكونيكطاي بغيت نهضر معاك .. جاوباتو أنا هنا آآ سعيد راه غير دايرة الأوغ لاين ..
سعيد : إكرام أنا عييت من هاد الحياة إلى إمتى يبقاو تابعيني المشاكل
إكرام : حاسا بيك آآخويا .. ولكن صبر ربي كايمتاحنك .. ولكن كولي شنو لي فكرك ياك شحال هادي كنتي إنسان آآخر وفرحان..
سعيد : ها شنو وقع مع لبنى وغير ربي كبير وصافي
إكرام : ها أنت كلتيها ربي كبير .. إوا غير صبر وراه ما كايسد ربي باب حتى كايفتح بيبان .. ودابا سير ترتاح راك عيان
سعيد : واخا آآختي .. والله يخليك ليا ماكاينش لي يفتحلي قلبي من غيرك
إكرام : ماتكولش هاكدا أنت راك خويا وتستاهل كل خير .. والله كون كان بيدي ماندير كون عاونتك بحاجة أكثر..
النهر الأخر سعيد كان ف لافاك وشويا كاتنوض واحد المواجهة بين جوج د الفصائل .. السيوفا و المزابر وبنادم كايجري .. سعيد كانو تابعينو من نهار كان ف الحي الجامعي حيت هو واخا ماكان منتمي لحتى فصيل ولكن كانو شاكين فيه حيت الشومبر فاش كان .. كان ساكن فيها واحد من الريوس الكبار ديال واحد الفصيل .. والفصيل الآخر بقاو شاكين فسعيد .. فديك المواجهة ضربوه بسيف .. جات الضربة ورا كتفو .. هزوه للسبيطار ولحسن حظو كانت الضربة ماشي خطيرة بزاف .. دوز سعيد شي أيام فالسبيطار تا تشافات الجرحة ورجع سالم..
مشات الأيام سعيد من الخدمة .. لافاك .. الدار.. واحد النهار الأب ديال مول القهوة توفا .. صافي دخلو الورثة فالقضية والقهوة باعوها وسعيد خرج منها وخرج حتى من البيت لي كان ساكن فيها .. خرج ولقا راسو لا حنين لا رحيم غير الزنقة .. وفديك اللحظة بدا كايفكر شنو غايدير وفين غايمشي .. بالخصوص كانت ديك الوقت قربات الإمتحانات د السوميستر 4 .. بات ديك الليلة غير فالزنقة فواحد الجردة وفالصباح...
..
يتبع.....
.
.
.
.



..
مسلسل "كفاح الوصول"
________________
الحلقة التــــاسعة
________________
..
..
سعيد فاق الصباح ماعرف مايدير وماعرف شكون يقصد .. بقا غادي شويا ويتلاقا بيه داك صاخبو لي كان داه النهار الأول واستاغلو فلابورس ومشاو يفسدو ..
صاحبو : آآفين آآخاي سعيد..
سعيد : أنا ماصاحبك ما والو غير بعد مني..
صاحبو : واش بقا فيك الحال على ديك المرة .. سمحلي راك عارف مبلي بيهم .. وماكانوش عندي الفلوس .. ولكن حتى أنت راه كان خاصك تكون عايق وفايق الوقت راه صعابت.. ولكن كولي بعدا آآش واقع شفتك هاز الصاك..
سعيد : آآودي تلامو عليا المشاكل ومالقيت تا فين نسكن .. آآجي أنت بعدا مازال عندك عام فالحي .. ؟؟
صاحبو : واراه وقعلي مشكل معاهم وتطردت من الحي .. ولكن العام لي فات خويا طلع لا فاك وتعطاه الحي وتخشيت معاه..
سعيد : بففف على زهر .. كلت زعما تديبانيني..
صاحبو : نديبانيك آآخاي سعيد وراه عندك الزهر .. صحاب الدار رحلو لهنا .. وصافي غانسكنو هنا..
سعيد : والشومبر.. ؟؟
صاحبو : مازال مادرنا فيها والو .. كال خويا بلي غايردلهوم الوراق وصافي ينساحب
سعيد : لا لا عافاك هضر معاه خليوهالي راني محتاجها .. أنا نشريها عليكم..
صاحبو : أوكي أنا نهضر مع خويا .. وماتخلصني ما والو .. هادي هي لافرصة فين نرجعلك داكشي لي ضيعتك فيه.
مشا صاحبو عند خوه قدر يقنعو وجابولو الساروت.. وكال لسعيد .. عافاك ماتبقاش تكتر الخروج والدخول باش الإدارة د الحي ماتكولكش على لاكارط د الحي ولا شي حاجة ..
سعيد : لا لا كون هاني أنا غير ندوز هاد المدة د البريباراسيون وندوز الإمتحان ومن بعد نضبر على راسي..
سعيد صافي فك المشكل د السكن ورجع للحي .. وبقا ساكن تما كايوجد للإمتحان.. سعيد دوز الإمتحان 3 دالموديلات دوزهوم مزيان .. ولكن الموديل الرابع مادوزوش كان مريض وغيب داك النهار .. سعيد خاصو ضغيا يدير شهادة طبية قبل ماتفوت 24 ساعة باش يعطيوه الراطراباج .. مشا كايتجارا واخا هو مريض .. مشا للسبيطار وتا واحد ما داها فيه .. فقد الأمل وهو محتاج يفاليدي كولشي .. شويا كايتصادف مع واحد الطبيب .. كالو واش أنت سعيد ولد فلان ؟؟
سعيد : آآه
الطبيب : آآشنو كادير هنا
سعيد : خاصني شهادة طبية ضروري للإمتحان..
الطبيب طلب من سعيد يدخل معاه .. بدا كايكتبلو الشهادة الطبية وكايهضر معاه كالو أنا راه صاحب قديم ديال الواليد ديالك وشحال دوزنا بجوج.. ودابا هاك سير تقضي الغرض وهاك ها نمرتي ملي تسالي إمتحانك ورجع عندي..
سعيد مشا كايجري لافاك دفع الشهادة الطبية .. خرجو النتائج وفعلا دوك الموديلات بثلاثة فاليداهم مزيان .. وتعطاه الراطراباج للرابع.. دوزو وجاب فيه مزيان..
سالا العام وتفكر سعيد داك الطبيب .. اتاصل بيه ورجع عندو وبدا كايعاودليه كولشي .. الطبيب بقا فيه سعيد .. كالو أنا غادي نعطيك واحد البيت تسكن فيه .. وقاطعو سعيد وكالو أنا غير فين نسكن أما ماكلتي وداكشي راه نحدم ونديباني راسي .. صافي خدا سعيد البيت .. وضبر خدمة فواحد المحلبة ومشات الأمور عادي .. واحد النهار كايتاصل بيه صاحبو د لافاك
آآلو سعيد الكونكور د البوليس راه خرج سير ضغيا وجد وراقك تدفع و أنت راه عندك الإس 1 و الإس 2 .. دفع للمفتشين ..
سعيد : الله يهديك غادي غير نضيع الوراق .. راه داكشي كامل معارف وفلوس 1% لي كايدوزو هاكداك ..
صاحبو : وانوض صاوب وراقك باراكا من الهضرة .. شكون كال أنت غادي تكون من ديك 1 %.
صاوب سعيد وراقو ودفع .. عيطولهوم للكتابي يدوزو .. دوز كولشي مزيان .. صافي مشات شي مدة بداو كايردو لي كونفوكاصيون .. سعيد ماوصلو والو.. مشا كالها لصاحبو .. كالو مايمكنش غير عاود شوف كيفاش..
سعيد : آآش غانشوف راه ماوصل والو يعني ماكاين والو..
صاحبو : لا لا ضروري كاينة شي حاجة..عرفتي آآش دير .. يالاه معايا لابوسط نسولو ..
مشاو لابوسط بداو كايسولو .. كالهم الفاكتور أنه فرق كولشي وسولوه على السمية وكالهم ها فين ديتها .. سعيد كال لصاحبو صافي يالاه .. راه رماها لواحد الناس ساكنين خدا ديك الدار لي فيها البيت فاش ساكن انا.. رجعو بالزربة لقاو دوك الناس ماكاينينش وبلي سافرو.. سولو واش ماكاينش لي يعطيهم النمرة ديالهم إتاصلو بيهم .. كالهم واحد أنه كاينة واحد خالتهم فواخد الحي بعيد شويا .. سعيد شد الطوبيس ومشا لداك الحي كايسول على ديك خالتهم....
..
يتبع....
.
.
.
.


..
مسلسل "كفاح الوصول"
__________________________
الحلقة العــــاشرة .. (قبل الأخــيرة)
__________________________
.
.
.
.
.
سعيد شد الطوبيس ومشا لداك الحي .. بدا كايسول على دوك الناس عيا مايسول و والو .. الحي كبير وماشي شعبي باش الناس يعرفو الناس .. لي سولو وماكايعرفوش ديك السمية .. سعيد عيا وكلس فواحد الطروطوار .. جات دايزة واحد المرأة كبيرة شويا وكال مع راسو يمكن هادي تكون عارفة .. ناض عندها..
سلام خالتي سمحيلي نسولك..
المرأة : مرحبا آوليدي..
سعيد : كانسول على واحد الناس هنا وتا واحد ما عرفهم .. ها هي سميتهم.. وها شنو سميت ديك المرأة..
المرأة : أنا هي آآوليدي لي كاتسول عليها..
سعيد : الحمد لله لي لقيتك .. بغيتك ضروري تعطيني النمرة ديال اختك .. راه الفاكتور رما واحد الكونفوكاصيون ضرورية بالغلط عندهم فالدار وخاصني نجيبها ضروري..
المرأة : بلا ماتعدب راسك بالنمرة آآوليدي أنا راني شادة الدار وعندي الساروت .. واش تقدر تصبر نقضي شي غرض فالدار ونمشي معاك نفتحلك الدار..
سعيد : واخا آآ خالتي أنا نتسناك..
سالات المرأة الغرض ديالها وجات عند سعيد شدو الطاكسي ورجعو للدار .. لقاو الكونفوكاصيون .. خداها سعيد ولقا فيها بلي باقي غير 3 أيام فقط لليوم لي خاصو يكون فيه ف "بو القنادل" .. سعيد صافي وجد مسائلو داك النهار وشد الكار ديال القنيطرة .. من بعد مشا لمركز بو القنادل تما غايدوزو السطاج .. سعيد كان ماكايهملش صحتو .. واخا كل ماداز عليه كان سبورتيف .. هادشي خلاه يدوز الإختبارات البدنية بكل سهولة .. مشاو للإختبارات د البسيكو دوزهوم مزيان .. صافي سعيد تقبل وغايدوز عام ديال السطاج قبل مايتخرج .. سعيد نسا كل همومو ولا إنسان آآخر والسطاج ولا كايعلمو بزاف د الحوايج أخرى فالحياة .. سعيد مابقاتلو غير إكرام فحياتو وطبعا صاحبو د لافاك لي ماعمرو ينسى خيرو .. واخا ماعمرو عاونو ماديا ولا شي حاجة حيت كان تا هو على قد الحال .. ولكن كان باغيلو غير الخير .. وأي كونكور كان كايعيطلو ويشجعو .. سعيد من خلال إكرام وصاحبو د لافاك بقا مآآمن بواحد الحاجة .. أنه باقيين ولاد الناس وبنات الناس .. المهم سعيد بقا كايهضر مع إكرام بزاف .. ولفها وولا كايتقرب منها.. سعيد سالا السطاج وتخرج مفتش شرطة .. ومن حسن الصدف تخرج فالمدينة لي ساكنة فيها إكرام .. المهم بدا كايهضر معاها وكل نهار كايتكونيكطا معاها .. سعيد بدا كايحس بشي حاجة من جيهة إكرام .. وكال فنفسو ماغاديش نلقا لي نشرك معاها حياتي أحسن من إكام .. واحد النهار بدا كايجبدلها الموضوع ديال الحب وكالها إكرام واش عمرك بغيتي
إكرام : لا آآسعيد ماعنديش مع هاد التخربيق هادشي غير تفلية وزايدون راني معاودالك على بابا والتعامل ديالو .. هو ظريف معانا ومامخصصنا تا حاجة ولكن يشوف شي وحدة فينا تململات يقدر يقتلها و أنا عارفاه يديرها..
سعيد : إوا وإلى كان شي واحد لي ماشي باغي غير يتصاحب ولا شي حاجة .. هذا مثلا باغي يخطبك من داركم..
إكرام : ههههه واخا يجي راه الدار مايبغيوش .. الدار عندهم ديك العقلية القديمة وراه صافي دايرين يزوجوني لولد خالتي راه كايتسناو غير يجي من الخاريج..
سعيد : إكرام ماكاين مانخبي عليك .. أنا دابا الحمد لله ضمنت مستقبلي والضامن الله .. الحمد لله خدام وماخاصني والو .. أنا ولفتك بزاف وماغاديش نلقا أحسن منك .. بغيتك تكوني ليا ونجي نخطبك من داركم..
إكرام : سعيد أنت ولد الناس ولكن بلا ماتصدع راسك غادي غير تعدب راسك وراني كولتليك السبب .. صحاب الدار راه حاسبيني مخطوبة..
سعيد : غادي نجي لداركم ولي ليها ليها..
سعيد خدا كونجي فديك الوقت .. وخاصو لي يمشي معاه .. مالقا قدامو غير داك الطبيب صاحب الواليد ديالو .. مشا عندو وكالو شنو كاين .. وافق داك الطبيب وجاب مراتو معاه وجاو معا سعيد..
فديك الوقت ولد خالة إكرام جا من الخاريج..
المهم سعيد والطبيب مشاو لدارهم لإكرام دقو مالقاوش باباها وكالولهم غير كلسو راه دابا يجي مشا غير للسوق .. بقاو كالسين .. جا باباها لإكرام .. ودخل للدار....
..
يتبع.....
.
..
.



مسلسل "كفاح الوصول"
___________________
الحلقة الأخيرة
___________________
..
..
..
..
..
دخل باباها لإكرام للدار مشا نيشان لوسط الدار وعيط على مراتو وبنتو وكالهم .. عرفتو شنو شفت .. وأنا جاي من السوق شفت ولد أختك خارج من واحد الدار ومعاه شي بنات ودراري وكاملين سكرانين وكايغوتو .. كولشي تصدم فيه .. كالهم أنا صافي ماقابلش على هاد الزواج ومستحيل نعطي بنتي لإنسان سكايري ومنافق .. كايعطينا وجه وهو فالأصل بوجه آآخر .. كالولو إوا الحمد لله لي ربي عرفنا على حقيقتو .. و دابا سير راه شي ضياف جاو من قبيلا و راهم كايتسناو فبيت الضياف .. دخل أب إكرام للبيت .. سلم على الناس .. كلسو .. كالهم آآش حب الخاطر .. وبدا كايهضر داك الطبيب وقدملو راسو وقدملو سعيد .. وكالو المهم حنا جينا طالبين راغبين فيد بنتكم إكرام لسعيد على سنة الله ورسوله .. كالهم مرحبا وكالو واش أنت الواليد ديالو .. كالو لا أنا صاحب باه .. وها شنو كاين ماماه ماتت و باه تخلاه عليه من شحال هادي وعاودولو قصتو من الأول .. الأب كالهم أنا ماعندي مانكول .. البنت إلى قبلات ماغانزيدكم غير دعوة الخير .. خرج لوسط الدار وعيط لإكرام وكاليها شنو كاين ..
جاوباتو وكالتلو : لي درتيها آ با أنا قابلة بيها..
صافي قراو الفاتحة واتافقو على المسائل د الخطوبة .. وجاو من بعد خطبوها خطوبة رسمية .. داز الوقت وتزوجو .. صافي سعيد دار الدار وعاش حياة جميلة مع إكرام بداو كايبغيو بعضياتهم وديما فرحانين .. إكرام كانت وباقة مع سعيد بنت الناس ..
واحد النهار سعيد رجع من الخدمة.. وتعرضاتلو إكرام فالباب..
سعيد بغيت نكوليك واحد الحاجة ودارت راسها غضبانة..
سعيد : إكرام مالك شنو واقع..
إكرام : أنا فرحانة
سعيد : هههه ومالك معبسة
إكرام : ههههه غير بغيت نخلعك شويا
سعيد : إوا شنو كاين..
إكرام : أنا حاملة..
سعيد بغا يطير بالفرحة ماعرف مايكول بكثرة الفرحة .. وكال لإكرام بلي اليوم غايخرجها ويدوزو عشية زوينة على برا..
سعيد كال لإكرام .. هاد الولد ولا بنت لي فكرشك أنا بغيت نعيشو أجمل عيشة .. مانخليهش أبدا يدوز من داكشي لي دزتو .. وفالسبوع إن شاء الله غانديرلو أكبر سبوع .. سعيد بدا كايجمع واحد القدر من المال كايوفرو خصيصا للسبوع ..
واحد النهار كانت إكرام ف شهرها السابع .. فديك الأيام كانت واحد الحملة فالبلاد كاملة .. البوليس خاصهم بقاو يدورو ينقيو المدن من الشماكرية وبنات الليل.. سعيد فالكوميسارية ديالو كلفو العميد بهاد القضية وخاصو يسهر عليها .. رجع سعيد للدار وكالها لإكرام .. وكالها بلي الدار ماغاديش بقا يكثر فيها هاد الأسبوع كــامل .. وكالها بلي مايقدرش يخليها بوحدها فالدار .. وكالها غانديك لداركم تبقاي تما علاين نسالي .. إكرام بكل فرحة وإبتسامة دايمن فوجهها .. كالتلو واخا .. وقبلات تمشي واخا هي كانت ماكاتقدرش تحرك بزاف .. ومشات معاه .. واخا ماباغياش تمشي حيت دراهم فيها الناس بزاف .. وكايكون بزاف الصداع والضجيج وهي حاملة وكاتبغي شويا الكالم .. بكل فرحة مشات إكرام لدارهم .. بقا سعيد مع الخدمة .. واحد النهار بالليل خدامين فالحملة .. وهوما يدخلو لواحد الدار ساكنة فيها واحد المرأة خدامة فواحد الشبكة كبيرة ديال الدعارة خدامة فالبلاد كاملة .. خرجوها من تما .. وكالولها أنها تعيط للبنات كاملين لي خدامين معاها .. ملي جاو كاملين كل وحدة جابتها من قنت .. فجأة شاف سعيد لبنى بيناتهم .. بقا كايشوف فيها وشد على جبهتو وكال " لاحول ولا قوة إلا بالله" .. صافي سالات الحملة وكل مذنب تعاقب ..
سعيد اتاصل بإكرام وكالها أنه سالا وبلي غايجي يجيبها .. إكرام فرحات حيت توحشاتو .. المهم رجعو ومشات الأمور كيما كانت ..
واحد النهار كايجيه إتصال .. كالولو أنه الواليد ديالو مريض بزاف .. مشا سعيد بالزربة للبلاد لقا باه مليوح تا واحد مادايها فيه .. مراتو خلاتو بوحدو ..
هزو وداه للسبيطار لي كاين فالمدينة فاش خدام .. كالولو أنه ضروري يدير عملية وكان خاصها بزاف د الفلوس ..
رجع سعيد للدار وكال لإكرام شنو كاين ..
وهي تجاوبو : بلا ماتقلق غادي نلقاو حل .. وهي تكولو آآه داكشي لي راك جامع للسبوع .. سير خودو دابا وداوي بيه الواليد ..
سعيد بدا كايشوف فإكرام..
جاوباتو : أنا فهمت شوفاتك .. باباك هو الأول آ سعيد .. والفلوس والسبوع نقدرو نعوضوه من بعد إلى رزقنا الله شي ولد من بعد هذا ..
سعيد غرغرو عينو بالدموع حيت عندو زوجة بحال هادي .. هو يضمها لعندو وباسلها راسها وكالها مستحيل يكونو باقيين بنات الناس بحالك..
مشا سعيد للبنكة وخرج ديك البركة .. دار الواليد ديالو العملية ورجع بيخير وتسامح هو والواليد ديالو .. وبقا ساكن معاه..
ولدات إكرام من بعد ولد .. فرحو بيه ودارولو سبوع وربي دار فيه البركة وماخصهوم خير..
بقات حياة سعيد هاكداك كولها فرحة .. عندو زوجة صالحة .. وباه ولا راضي عليه..
وولدو قرر يربيه أحسن تربية ويعيشو فأحسن عيشة..
وكانلو داكشي لي بغا والأمور فالأخير ولات جميلة..
..
..
السلسلة إنتهت .. الغرض منها ماشي يبقا فيكم سعيد أولا تأثروا بيه .. بل الغرض هو الرسائل الكثيرة لي من ورا هاد السلسلة لي خاصكم تستوعبوها..
..
.
.
.
.
.
الكــــاتب